PASQYRA e SHARRIT

Njoftim për vizitorët e "Pasqyrës së Sharrit"

2010-01-20T03:16:00.000-08:00

Të nderuar vizitorë,
Me kënaqësinë më të madhe ju njoftojmë se në këtë ueb-faqe nuk do të ketë artikuj të ri! Kontraverse, apo jo? E themi me kënaqësi që nuk do të ketë rifreskim!
Po, të dashur miq, me kënaqësi, sepse tanimë kemi ueb-faqen profesionale të radios sonë... Radio SHARRI. Shpresoj se aty do të njoftoheni edhe më shumë, në lidhje me ngjarjet e këtushme, sepse kjo faqe, megjithatë, është vetëm një Blog, ndërsa faqja e radios është shumëdimensionale.
S’po them asnjë fjalë më tepër, sepse ju do të vlerësoni, sapo të shfletoni faqen:

www.radio-sharri.info

Përshëndetje miqësore, nga komuna e Dragashit.

_________________________________________________________

Interes, politikë apo dashuri ndaj Serbisë?!

2008-09-15T12:50:00.000-07:00

Nga: Beqir BEQAJ

Sharr, shtator 2008 - “Dërgoni fëmijët në shkollë... mos i merrni në qafë” - ishin fjalët që ua drejtuan më 27 prill të vitit 2005 në Sharr, zyrtarët e lartë të Ministrisë së Arsimit... dhe UNMIK-u, përfaqësuesve të minoritetit gorano-boshnjakë.
Sekretari i Përhershëm në atë kohë i Ministrisë së Arsimit, Shkencës dhe Teknologjisë (MASHT), Isuf Zeneli, u pat thënë goranëve, të cilët po në atë kohë përfaqësoheshin nga i ndjeri Rystem Ibishi, kryetar i Iniciativës Qytetare të Gorës (GIG) dhe deputet në Kuvendin e Kosovës, se zvarritja në përkrahjen e plan-programeve të reja të Kosovës, shkon në dëm të fëmijëve të tyre “Sistemi i ri arsimor ju hap rrugët e integrimit në Evropë... Ju e kryeni shkollimin fillor dhe të mesëm në Dragash, ndërkohë që atë të lartë mund ta vazhdoni kudo në Evropë”, e pat arsyetuar thënien e tij Zeneli.
Por, goranët nuk u joshën nga kjo! Përkundrazi, ata u revoltuan dhe një pjesë e tyre e braktisë sallën, ku zhvillohej ky takim. Rystem Ibishi i ndjerë u pat thënë mysafirëve nga Ministria se Institucionet e Kosovës e kanë për obligim t’i mbrojnë kërkesat e minoritetit dhe se UNMIK-u nuk duhet të hesht në lidhje me këtë “Unë jam për atë që në Prizren të hapet një universitet në gjuhët e sllavëve të Jugut, ku do të mësonin jo-shqiptarët”, më ishte përgjigjur shkurt Ibishi, kur e pata pyetur, nëse ai po e mbron gjuhën apo sistemin arsimor të Serbisë.
Nga qëndrimet e Ibishit ishte distancuar nënkryetari i KK të Sharrit nga minoriteti gorano-boshnjak, Sabedin Çufta, i cili e tani e mban po këtë post. Ai pat deklaruar se nuk është ky problem i goranëve në tërësi, por vetëm i pjesës që përfaqësohej nga i ndjeri Rystem Ibishi “Një pjesë bukur e madhe e boshnjakëve i ndjekin mësimet me plan-programet e Kosovës... Ne duhet t’i përcjellim reformat e vendit ku jetojmë... Unë kur e kam pranuar postin e nënkryetarit, sigurisht që i kam pranuar edhe ligjet dhe reformat e Kosovës... Lus Rystemin dhe profesorët goranë që më shumë të angazhohen në ndihmë për arsimin e popullatës sonë dhe jo të marrin qëndrime politike”, pat thënë Çufta, mirëpo askush nga goranët nuk e kishte dëgjuar, sepse, më të dalë ai në foltore, të gjithë prindërit e nxënësve që mësonin me plan-programet e Serbisë e patën braktisur sallën, pa u interesuar se çfarë do të thoshte nënkryetari komunal që i përfaqëson ata.

Serbia i "shpërblen" goranët për “punën” që bëjnë në Sharr

Konvoji prej tre kamionësh me regjistrim të Beogradit dhe me emblemën e Kryqit të Kuq të Serbisë, ka arritur në gjysmën e parë të vitit 2005, për t’iu sjellë banorëve të Gorës së Sharrit ndihma ushqimore. Një kontingjent i ngjashëm arriti edhe në muajin nëntor. Gjithsejtë gjashtë kamionë me ushqim i solli gjatë vitit 2005 Serbia në Sharr dhe mjaftuan që goranët të besojnë se qeveria në Beograd po “interesohet” për mirëqenien e tyre, edhe pse qeveria lokale e Sharrit e ka ndarë buxhetin komunal, sipas statistikave të cilat i ka vlerësuar UNMIK-u si më të sakta, pothuajse përgjysmë, edhe pse shqiptarët e përbëjnë rreth 70% të popullsisë së kësaj komune.
Pavarësisht kësaj, u bë më se e dukshme se në këtë komunë shumica e goranëve edhe më tej e preferojnë gjuhën serbe dhe sistemin arsimor të Serbisë nëpër shkolla. Edhe pse disa herë e kanë vizituar komunën e Sharrit krerët e ministrisë së Arsimit, nuk është arritur që kjo popullatë të kyçet në tërësi në planin arsimor kosovar. Kjo, sepse krerët e Iniciativës Qytetare të Gorës, gjithnjë e kundërshtojnë planin arsimor të Kosovës dhe gjuhën boshnjake. Kreu i atëhershëm i kësaj Iniciative, Rustem Ibishi, publikisht ka kërkuar që të mos implementohet plani kosovar i arsimit, për shkak se “nxënësit goranë nuk mund ta vijojnë mësimin nëpër fakultetet e Serbisë”. Kjo ka bërë që kryetari i atëhershëm i KK të Sharrit, Halim Shemsidini, ta quaj Ibishin “ambasador të Serbisë”.
Sido që të jetë, edhe pse institucionet legjitime të Sharrit, si Kryqi i Kuq dhe Inspektorati sanitar komunal, kanë konstatuar se kësaj popullate Serbia po u sjell, madje edhe ushqime të prishura, këta të fundit e falënderojnë Beogradin dhe, edhe më tej i mbesin besnik, duke ia ruajtur gjuhën dhe sistemin arsimor në këtë komunë.

Pushtetarët e Sharrit dorëzohen para mësimdhënësve goranë

Kinse, për hir të statusit të pazgjidhur të Kosovës dhe për ta ruajtur paqen e qetësinë në komunë, gjendja e arsimit në shkollat gorane ende mbetet e paqartë edhe gjatë vitit 2006, ndonëse mësimi, sipas zyrtarëve të Drejtorisë së Arsimit në Sharr, po zhvillohej normalisht. Koordinatori për shkollat gorane në Drejtorinë e Arsimit, Bajram Hoxha, deklaronte se mësimi është normalizuar, por nuk është nën kontroll të plotë të institucionit të tyre “Mësimi është normalizuar, por çështja legjislative ende mbetet anarki. Vetëm në shkollën e Krushevës mësohet me plan-programin kosovar, ndërkohë që në shkollat tjera kemi probleme”, pat thënë në këtë kohë Hoxha. Drejtori i shkollës së vetme të Gorës, ku mësimi zhvillohet krejtësisht me ligjet kosovare, Nasuf Brenolli, pat deklaruar se ai do ta ruaj këtë gjendje me çdo kusht “Në shkollën e Krushevës mësohet vetëm me ligjet kosovare. Assesi nuk do të pranoj ndikime nga jashtë”, pat këmbëngulur Brenolli.
Drejtori i asaj kohe i Drejtorisë komunale të Arsimit, Xhemal Iljazi, nuk donte të fliste për këtë gjendje me media, por e pranonte se asgjë nuk është e qartë nëpër shkollat gorane “Asgjë nuk mund të them, sepse asgjë nuk është e qartë”, pat thënë shkurt Iljazi, i cili lente për të kuptuar se gazetarët nuk janë të dëshirueshëm në zyrën e tij.Në mbledhjen e radhës së Kuvendit Komunal, kryetari Halim Shemsidini u pat thënë këshilltarëve se pushteti lokal dhe ai qendrorë kanë punuar mjaftë, por që mësimdhënësit goranë nuk kanë pranuar t’i nënshkruajnë kontratat e punës “Mësimdhënësit goranë marrin afro tetëqind euro pagë nga Serbia, vetëm që të mbajnë lidhje me ministrinë e atjeshme të Arsimit dhe jo me ministrinë tonë. Ne kemi ra në pat-pozicion me këta mësimdhënës”, kishte pranuar ish-kryetari Shemsidini para këshilltarëve të KK-së. Por, këshilltarët e KK-së nuk e pranuan dorëzimin e kryetarit. Ata kërkonin që të zbatohen ligjet në fuqi, ndërkohë që mësimdhënësit goranë i kanë quajtur “shërbëtorë të djallit”. Mirëpo, kreu komunal, Shemsidini, ka kërkuar nga ta që të gjendet një modul për tejkalimin e kësaj situate, për hir të gjendjes në të cilën ndodhej atë kohë Kosova “Bëhuni pak tolerantë... Kur kemi toleruar një kohë të gjatë, të tolerojmë edhe pak muaj, sepse definimin e statusit e kemi shumë afër”, u pat thënë Shemsidini këshilltarëve, duke potencuar se e drejta ligjore është në anën e pushtetit, por që ata nuk dëshirojnë ta kopjojnë Milosheviqin.

Në arsimin e Sharrit tentohet të bëhen reforma rrënjësore

Një aksion i stilit “Fshesa” u tentua të bëhej në gjysmën e dytë të gushtit më 2006-tën, konkretisht në shkollat gorane. Reduktimi i numrit të punëtorëve dhe shpallja e një konkursi për të gjitha vendet e punës në shkollat e Gorës, ishte aksion që rezultoi të jetë “thikë me dy tehe”. Drejtori i atëhershëm i Drejtorisë Komunale për Arsim... në Sharr, Xhemal Iljazi, e arsyetoi këtë veprim si shkak i shkurtimeve buxhetore, dhe se duhej të bëheshin reduktime të numrit të punëtoreve në të gjitha shkollat e Sharrit “Pas shkurtimeve buxhetore, të cilat i ka kërkuar Ministria e Ekonomisë dhe Financave, numri i punëtorëve në 12 shkollat fillore në Opojë dhe Gorë, do të reduktohet për 25 punëtorë. Numri në arsimin fillor duhet të jetë 487, aq sa ka lejuar MEF-i”, pat deklaruar Iljazi, duke shtuar se shkolla e mesme “Ruzhdi Berisha” në Sharr, nuk do të preket nga kjo reformë e reduktimit. E vërteta ishte se konkursi është shpallur për punëtorët arsimor në disa shkolla opojane, ndërkohë që për shkollat gorane konkursi kishte të bënte me të gjitha vendet e punës. Konkursi kishte për qëllim largimin e punëtorëve arsimor nga Gora, të cilët marrin paga edhe nga Serbia edhe nga buxheti kosovar.
Ndryshe, edhe pas këtij aksioni në trevën e Gorës vazhdoi mbarëvajtja e arsimit me plan-programin arsimor të Serbisë. Krerët komunal të Sharrit, sidomos ata të arsimit, e kuptuan në fund se aksioni dhe plani i tyre ishte vërtetë “thikë me dy tehe”. Për këtë ata u binden kur data e mbylljes së konkursit, 23 gushti, afrohej por që interesimi i goranëve për të konkurruar ishte shumë i zbehtë.

Vendimi i Sanda Rashkoviq-Iviqit, qartësoi gjithçka

Një vendim i Qeverisë serbe, në mars të vitit 2007, me të cilin ajo kërkon nga serbet e Kosovës që t’i shkëpusin kontratat e punës me institucionet kosovare, bëri që edhe qeveria lokale e Sharrit të diskutoj për këtë çështje. Kjo, sepse, ndonëse në këtë komunë nuk ka serb, një pjese të punëtorëve, sidomos atyre arsimor të cilët edhe më tutje marrin paga nga buxheti i Serbisë, u ka ardhur një letër kërcënuese nga qeveria serbe, se do t’u ndërpriten këto të ardhura, nëse nuk e zbatojnë plan-programin arsimor të Serbisë në këtë komunë. Kryeshefi i atëhershëm i ekzekutivit në Sharr, Bexhet Xheladini, pat kërkuar nga goranët që të jenë të kujdesshëm në veprimet që do t’i marrin “Kini kujdes... Mos bini pre e provokimeve që vijnë nga qeveria serbe, misionarët e të cilës janë aktivizuar kohët e fundit, për të destabilizuar Kosovën dhe gjendjen tuaj sociale”, u pat thënë Xheladini goranëve. Ai pat kërkuar nga mësimdhënësit goranë që të nënshkruhen në listën e pagave për muajin mars dhe të mos bien pre e premtimeve të kota nga qeveria serbe “Mund të ndodh që goranët të mbetën pa asnjë të ardhur, nëse bëhen pjesë e lojës së qeverisë serbe, e cila ka ndërmarrë provokimin e fundit për ta destabilizuar Kosovën”, parashikonte në atë kohë Xheladini. Por, një pjesë e madhe e mësimdhënësve të Gorës vazhduan të punojnë sipas plan-programit të Serbisë edhe gjatë vitit 2007. Parashikimet e Xheladinit rezultuan të gabuara, sepse ata, jo vetëm që nuk mbetën pa asnjë pagë, por Serbia u jepte rroga sa trefishi i asaj që do të merrnin nga buxheti i Kosovës.

Ministria e Arsimit... edhe në shtetin e Kosovës iu bën “rixha” goranëve

Mësimdhënësit dhe stafi drejtues i shkollave fillore dhe asaj të mesme, e cila është themeluar nga vetë goranët, të përkrahur nga komuna fantazmë e Gorës dhe qeveria e Serbisë, edhe në Republikën e Kosovës po e refuzojnë plan-programit e saj, madje ata nuk i duan as pagat nga buxheti i Republikës së Kosovës. Refuzimin e plan-programit mësimor, atyre ua legjitimon edhe vet kushtetuta e Kosovës, me ligjin e ri për arsimin, i cili me nenin 12.2 serbëve dhe joserbëve që mësojnë në Kosovë në gjuhën serbe ua mundëson përdorimin e plan-programit dhe teksteve të hartuara nga Ministria e Arsimit e Serbisë. Njëkohësisht, një pjesë e goranëve nuk e çajnë kokën as për nënshkrimin e kontratave të punës me Drejtorinë komunale të Arsimit në Sharr.
Në saje të gjetjes së zgjidhjes në arsim, të krijuar gjatë dekadës paraprake në trevën e Gorës, krerët e Ministrisë së Arsimit, Shkencës dhe Teknologjisë u takuan edhe këtë fillimvit shkollor në Sharr me mësimdhënësit dhe krerët e partive politike që përfaqësojnë goranët. Edhe pse tashmë Kosova ka shpallur shtetësinë e saj, mësimdhënësit goranë nuk hezitojnë t’i thonë JO plan-programeve kosovare dhe të deklarohen publikisht se dëshirojnë plan-programin dhe gjuhën serbe. Sërish, kreu i Iniciativës Qytetare të Gorës, pasardhësi i Rystem Ibishit, Mursel Halili, del në ballë të mbrojtësve të plan-programit dhe gjuhës serbe. Deputeti i vetëm jo-serb në Kuvendin e Kosovës, i cili nuk e nënshkroi deklaratën e shpalljes së pavarësisë, Mursel Halili, u tha haptazi krerëve komunalë të Sharrit dhe përfaqësuesve të MASHT-it se Kushtetuta e Kosovës u lejon atyre që ta përdorin gjuhën dhe plan-programin serb. Por, struktura e re komunale e Sharrit, e drejtuar nga Salim Jenuzi, kryetar dhe Avni Nebiu, drejtor i Administratës dhe Personelit, nuk pranuan që edhe këtë vit të vazhdohet me arsimin e dirigjuar nga Serbia.
Fillimisht ata apeluan tek mësimdhënësit, prindërit dhe nxënësit goranë që t’i kthehen realitetit të ri në Kosovë, sidomos pas datës 17 shkurt. Më pas, ata hapën konkurs për pranimin e mësimdhënësve legjitim. Dhe, kur hasën në mosdëgjueshmëri nga goranët, të cilët në fshatin Mlikë hapën edhe gjimnazin serb, nisën masat ligjore. Kjo rezultoi më pllombimin e dyerve të këtij gjimnazi serb, por që as kjo nuk i ndaloi goranët në vendosmërinë e tyre për ta ruajtur sistemin arsimor të Serbisë në trevën e Gorës. Ata e kanë hequr pllombën dhe kanë hyrë në objektet e kësaj shkolle, për ta vazhduar mësimin me plan-programet e tyre dhe si punëtorë të evidentuar në Ministrinë e Arsimit të Serbisë.
Përfundimisht, sipas asaj që i ka deklaruar “Radio Sharrit” kryetari i Komunës së Sharrit, Salim Jenuzi, midis institucioneve lokale, tyre qendrore dhe përfaqësuesve goranë është arritur një “armëpushim”, i cili do të zgjasë vetëm një muaj. Pas kësaj kohe do të dihet përfundimisht se cili do të dal fitimtar. Pushteti kosovar, i cili i ka të gjitha kompetencat ligjore dhe juridike, apo një grup goranësh, të cilët veprojnë ilegalisht në çdo fushë të jetës në këtë trevë, madje kanë themeluar edhe Komunën e Gorës, me seli në fshatin Vraniç, të cilën e financon Serbia.

Kryqëzohu Orhan, Gora nuk të do!

2008-04-27T03:16:00.001-07:00

Sharr, 27 prill 2008 - Pas shumë lëvizjeve që po bëhen rreth përcaktimit të minoritetit nga Gora e Sharrit, nëse e përkrahin Kosovën apo Serbinë si shtet të tyre, në këtë fundjave dikush ka shkruar parullën në “Sheshin e Dëshmorëve” në Sharr, me përmbajtje kundër kryetarit të Iniciativës Qytetare Gorane (GIG), me seli në Beograd, Orhan Dragash.
Ky subjekt politik, ditë më parë ka arritur të mbledh mbi 10 mijë nënshkrime, ku edhe merr të drejtën për të garuar në zgjedhjet që do të mbahen në Serbi më 11 maj të këtij viti. /b. beqaj

Kreu i GIG-ut ende mbetët lider i dyanshëm!

2008-04-25T17:03:00.000-07:00

Sharr, 26 prill 2008 - Lideri i subjektit politik goran, Iniciativa Qytetare e Gorës (GIG), Mursel Halili, ka deklaruar të premten, pasi është takuar me ministren bullgare për Integrime Evropiane, Gergina Gërnçareva, e cila ka vizituar zyrën e tij në Sharr, se ai dhe popullata që përfaqëson, nuk janë bullgarë por goranë. Halili e ka mohuar faktin që Gërnçareva ta ketë vizituar Gorën, me kërkesë të goranëve që dëshirojnë të jenë pakicë bullgare në Kosovë. “Para së gjithash, ne kemi biseduar për problemet që ka komuniteti goran dhe për format se si do ta ndihmonte Bullgaria komunitetin tonë. Ministrja nuk ka ardhur tek ne për të biseduar që të bëhemi bullgarë, siç kanë raportuar disa media”, thotë Halili, duke potencuar se edhe Gërnçareva u ka thënë se i respekton ata si goranë.
Pa dashur ta komentoj arsyen, se përse ministrja bullgare, e shoqëruar edhe nga ambasadori i Bullgarisë në Prishtinë, nuk i ka përfillur institucionet komunale, por drejtpërdrejt ka vizituar vetëm GIG-un, Halili thotë se i kanë njoftuar mysafirët me problemet me të cilat ballafaqohet popullata e Gorës, gjendjen e së cilës e pasqyron tejet të vështirë “I thamë ministres që ne kemi probleme ekonomike dhe i treguam se gjendja në Gorë është tejet e keqe. Ajo na tha se do të angazhohet që t’i sjell disa kompani bullgare tek ne, për të parë nëse mund të investohet në rajonin tonë. Njëherësh, ajo na premtoi se shteti i saj do t’i financoj studimet për dhjetë student goranë në universitetet bullgare”, tha Halili.
Një ditë para se të vizitonte subjektin politik goran (GIG), një medium serb nga Kosova citon ministren Gërnçareva të ketë thënë se në Gorë do të vizitoj Mursel Halilin, sepse ka një kërkesë nga goranët që të pranohen si pakicë kombëtare bullgare në Kosovë. Kjo kërkesë e goranëve, sipas këtij mediumi serb, i cili thirret në disa media bullgare, vjen pasi gjuha që flasin goranët është e ngjashme me gjuhën bullgare. Mirëpo, Halili e mohon këtë, duke thënë se krenohet që i përket, siç thotë ai, kombësisë gorane “Unë veten e konsideroj goran dhe jo bullgar. Ne krenohemi që jemi goranë. Jemi shtetas të Republikës së Serbisë dhe nuk kemi asnjë arsye ta ndërrojmë identitetin”, i ka thënë Halili një radioje serbe nga Kosova.
I pyetur, nëse kjo radio ka bërë ndonjë gabim në citatin e tij, përkitazi me shtetësinë, Halili as nuk e mohon dhe as nuk e pohon. Ai madje e ndërlidhë shtetësinë me faktin që shumica e kosovarëve posedojnë pasaporta serbe, sikurse ai “Përderisa ne kemi këto pasaporta dhe përderisa të mos ulen një ditë Prishtina dhe Beogradi dhe t’i qartësojnë marrëdhëniet, asgjë nuk do të jetë definitive”, thotë ai. Të kota ishin tentimet tona që Halili të na thotë nëse ndihet si shtetas kosovar apo serb. Por, ai këmbëngul se i përket nacionalitetit goran dhe jo bullgar. Për herë të parë popullata e trevës së Gorës u quajtën goranë, sipas nacionalitetit, me ardhjen e Sllobodan Milosheviqit në krye të Serbisë, kur edhe komuna e Sharrit u nda në dy pjesë. Komuna e Gorës, me seli në Sharr dhe Komuna e Opojës, pa seli fare. /b. beqaj

Përfundoi në Sharr Turniri “Kupa e Legjendarit”

2008-03-08T00:03:00.000-08:00

Sharr, 06 mars 2008 - Në një ambient të bukur pranveror, edhe pse sipas kalendarit ende është dimër, 28 ekipe futbolli nga komuna e Sharrit i kanë përfunduar garat në futboll të vogël, në kuadër të turnirit tradicional “Kupa e Legjendarit”, i cili organizohet për të tetën herë me radhë nga Rinia Demokratike e Sharrit.
Në ndeshjen finale, e cila u zhvillua të mërkurën në stadiumin e shkollës fillore “Nezim Berati” në Sharr, ekipi i fabrikës së mishit “Meka” nga Plava, ka arritur ta sfidoj ekipin e fshatit Pllajnik, pas ekzekutimit të penalltive. Ndryshe, Pllajniku ka qenë bartës i kësaj kupe nga viti i kaluar, por që në ndeshjen e sotme sikur nuk ka dhënë maksimumin që pritej.
Edhe këtë vit turniri u zhvillua pa pjesëmarrjen e goranëve. Arben Muhameti, kryetar i degës së Rinisë Demokratike në Sharr, i tha “Lajmit” se këtë vit shumëçka ka ndryshuar në aktivitetin e tyre tradicional, por as kësaj radhe nuk u përfshinë goranët, ndonëse ftesa ka qenë e hapur. “Fillimisht statusi i Kosovës, ku për herë të parë i zhvillojmë garat në shtetin e pavarur... Përkrahja që kemi pasur nga pushteti lokal si kurrë më parë, deri tek moti i mirë që po mbretëron këto ditë, janë të mirat që na sjell ky vit, për dallim nga vitet e kaluara. E vetmja gjë që ka mbetur me të vjetrën është refuzimi i ekipeve gorane në këtë turnir, e që shpresojmë se vitin e ardhshëm edhe kjo do të bëhet”, tha Muhameti, i cili, megjithatë, kërkoi që ky organizim të kaloj nën kompetencat e Drejtorisë së Sportit... dhe jo të mbetet barrë e tyre. “Shpresoj që vitin e ardhshëm ta merr Drejtoria e Sportit këtë organizim, sepse ne jemi lodhur dhe nuk do të mund ta vazhdojmë në të ardhmen”, tha Muhameti. /b. beqaj

Kreu i KFOR-it në Kosovë vizitoi Sharrin

2008-03-08T00:01:00.000-08:00

Sharr, 05 mars 2008 - Duke apostrofuar gjendjen e sigurisë, pas shpalljes së pavarësisë, komandanti i përgjithshëm i KFOR-it, Ksavier de Marnak, tha të mërkurën në Sharr se situata e sigurisë në Kosovë është stabile dhe nuk pritet ndonjë konflikt i mundshëm. Gjenerali Marnak ka premtuar se KFOR-i është i gatshëm që të reagojë në çdo kohë dhe çdo rrethanë, kur atyre do tu kërkohet një gjë e tillë “Ju përgëzoj për faktin që keni arritur të bëheni shembull i mirë i bashkëjetesës, tolerancës dhe gjendjes së sigurisë në Kosovë. Është shumë i rëndësishëm ky fakt në këtë moment, kur Kosova po kalon nëpër një histori të re”, tha Marnak në takimin që zhvilloi me kryetarin e KK-së, Salim Jenuzin dhe më pas edhe me këshilltarët e KK-së.
Marnak i ka përgëzuar edhe qytetarët që, siç u shpreh, kanë treguar maturi dhe pjekuri ndaj të gjitha lëvizjeve provokuese, si dhe për bashkëpunimin me trupat e KFOR-it “Më vjen mirë që keni bashkëpunim të mirë me pjesëtarët e KFOR-it dhe organet tjera të sigurisë, si udhëheqësit ashtu edhe qytetarët, sepse kjo situatë e lakmueshme dhe stabile nuk mund të mbahet pa ndihmën tuaj”.
Përkitazi me paralelizmin e institucioneve arsimore në këtë komunë, për të cilën i shprehën brengosje politikanët e Sharrit, kreu i KFOR-it tha se kjo çështje do të merr pak kohë, derisa të zgjidhet. “Duhet ta kuptojnë të gjithë se kjo do të zgjidhet ngadalë, por që nuk lidhet direkt me KFOR-in, sepse nuk ndikon në siguri. Megjithatë, ne i përcjellim me shumë kujdes këto veprime”, tha Marnak.
Rreth incidenteve që po ndodhin kohët e fundit nga ana e serbëve në Kosovë, kreu i KFOR-it, Ksavier de Marnak, ka theksuar se për momentin situata është nën kontroll “Incidentet i kemi dënuar gjithnjë dhe KFOR-i është i gatshëm të intervenoj në çdo situatë, nëse i kërkohet kjo nga UNMIK-u”. Ai tha se mandati i tyre nuk është që të veprojnë, nëse kjo gjë nuk iu kërkohet. Por, sipas tij, sa herë që është kërkuar intervenimi i tyre, ata me shpejtësi kanë intervenuar.
I pyetur për helikopterin e rrezuar ditë më parë në kufirin Kosovë-Shqipëri, komandanti i KFOR-it e ka mohuar të jetë rrëzuar ndonjë helikopter i tyre “Helikopterin për të cilin flitet shumë, nuk i përket KFOR-it, edhe pse për një rrëzim të tillë kemi dëgjuar në media”, tha Marnak.
Paralajmërimeve se Azerbajxhani do t’i tërheq forcat e stacionuara në jug të Kosovës, ku një kontingjent ndodhet edhe në Sharr, gjenerali Marnak u është përgjigjur se në KFOR ende nuk ka ndonjë lëvizje të tillë. “Ne jemi kompakt, ashtu siç kemi qenë edhe më parë. Asnjë shtet nuk na ka paralajmëruar se do t’i tërheq forcat e tij”, konfirmoi kreu i KFOR-it në Kosovë, Ksavier de Marnak. /b. beqaj

Momqillo Trajkoviq vizitoi Sharrin dhe Vraniçin

2008-02-29T07:07:00.000-08:00

Sharr, 29 shkurt 2008 - Momqillo Trajkoviq ka qëndruar në Sharr, por askush nuk e kishte hetuar vizitën e tij. Ai i ka anashkaluar institucionet lokale të Sharrit, duke u takuar vetëm me krerët e Iniciativës Qytetare të Gorës (GIG) dhe me udhëheqësit e komunitetit goran në fshatin Vraniç të Gorës, ku qeveria serbe ka hapur zyrën e saj. Kryetari i GIG-ut, Mursel Halili, e ka mohuar të jetë takuar me Trajkoviqin, duke theksuar se ai është takuar të mërkurën vetëm me një delegacion bullgar, i drejtuar nga Nikolay Kolev, shef i Zyrës Bullgare në Prishtinë dhe Krasimir Karakachanov, parlamentar i Bullgarisë. “Vetëm kamë dëgjuar se Trajkoviq ka qenë këtu, ku ka qëndruar në një kafene të qytezës. Unë nuk kam pasur asnjë takim me të, andaj nuk mund të them asgjë më tepër. Ndërkaq, me delegacionin bullgar kam biseduar rreth ndihmës që ky shtet u jep komuniteteve. Kam kërkuar që në kuadër të kësaj ndihme të përfshihen edhe goranët”, tha Halili.
Sipas tij, bullgarët kanë shprehur gatishmëri që të dërgojnë dhjetë studentë të kësaj treve për studime në Bullgari, si dhe mundësitë për ndihma të tjera këtij komuniteti.
Halili thotë se delegacioni bullgar i ka ftuar ata që të marrin pjesë në manifestimin e Ditës së shtetësisë së Bullgarisë, e cila do të shënohet në Prishtinë.
Burimet tona mësojnë se Trajkoviq, pasi ka qëndruar në zyrën e GIG-ut, ka rrugëtuar deri në fshatin Vraniç të Gorës, ku është takuar me përfaqësues të komunitetit goran, si dhe me koordinatorin e Zyrës së qeverisë serbe në këtë fshat, Abdi Alia. Gjatë kësaj vizite, Trajkoviq i ka ftuar goranët që t'u bashkohen protestave kundër pavarësisë së Kosovës, si dhe ka kërkuar nga policët e këtij komuniteti që ta bojkotojnë SHPK-në.
Trajkoviq ka mbetur i dëshpëruar, sepse merret vesh që kërkesat e tija janë refuzuar nga goranët, të cilët nuk kanë gjetur asnjë arsye për ta rrezikuar lirinë dhe të drejtat që gëzojnë në këtë komunë.
Trajkoviq u ka propozuar atyre alternativën tjetër; udhëtimin e organizuar deri në Mitrovicë, për t'iu bashkuar protestuesve serb.
Nga ana tjetër, përfaqësuesit e subjektit politik boshnjak nga Gora "Vatan", nuk kanë dashur të merren me këtë vizitë, duke thënë se kanë dëgjuar për një vizitë të tillë, por që nuk iu ka interesuar më shumë. /b. beqaj

Goranët nga Serbia nuk e njohin shtetin e Kosovës

2008-02-23T11:35:00.000-08:00

Sharr, 23 shkurt 2008 - Një ditë pasi popullata gorane ka festuar shpalljen e pavarësisë së Kosovës, në fshatin më të madh të Gorës dhe komunës së Sharrit, Restelicë, Iniciativa Qytetare Gorane (GIG), me seli në Beograd u ka bërë thirrje bashkëkombësve në Kosovë që të mbesin në vatrat e tyre, por që ta respektojnë legjislacionin e Serbisë dhe shtetin serb. Kjo organizatë politike, krerët e së cilës vazhdojnë të jetojnë në Serbi, ka apeluar tek bashkëkombësit që mos ta pranojnë shpalljen e Kosovës shtet të pavarur. “Ju bëjmë ftesë që mos ta lëshoni Gorën dhe Kosovën e Metohinë dhe mos ta njihni pavarësinë e krahinës jugore të Serbisë. Ky është çasti më i rëndë në historinë e goranëve, prandaj mos lejoni që me provokime të ju shtyjnë t’i lëshoni vatrat tuaja", thuhet në komunikatën e lëshuar nga ky subjekt politik me seli në Beograd, duke i porositur edhe institucionet e Serbisë që në kuadër të aktiviteteve të tyre në Kosovë, mos t’i injorojnë goranët.
Kryetari i Iniciativës Qytetare të Gorës (GIG), me seli në Sharr, Mursel Halili, tha se të gjitha qëndrimet e kësaj organizate nga Beogradi janë çështje të tyre dhe nuk ndërlidhen me subjektin që drejton ai “Kjo shoqatë që ngjason me emrin e subjektit tonë politik, vepron në Beograd dhe nuk ka të bëj me ne. Çfarëdo që të kenë deklaruar ata, mbetët çështje e tyre”, tha deputeti i Kuvendit të Kosovës, Halili, duke mos u deklaruar në lidhje me qëndrimin e subjektit të tij, në lidhje me deklaratën e pavarësisë, ku ai nuk mori pjesë si deputet. “Ne do të dalim me një qëndrim të qartë për publik, por ende nuk kemi arritur të mblidhemi në kryesi për ta diskutuar këtë çështje. Sa i përket mungesës sime në Kuvendin e Kosovës, faji mbetet tek administrata e këtij institucioni, i cili nuk ma ka dërguar ftesën me kohë. Unë kur e kam marrë ftesën, pasi kam dëgjuar në media se po mbahet kuvendi, ka qenë e pamundur të arrij nga Sharri në Prishtinë”, tha Halili.
Nga ana tjetër, goranët që tashmë e quajnë vetën boshnjakë, vazhdojnë të festojnë sikurse edhe shqiptarët, pa dashur të merren me bashkëvendësit e tyre, të cilët vetën e quajnë goranë, sipas kombësisë. Sabedin Çufta thotë se popullata boshnjake tashmë po merr frymë lirshëm dhe shpreson që secili do ta kuptoj se Kosova tashmë është shtet. “Ne kemi zier hallvë, për ta shënuar lindjen e shtetit të Kosovës. Kjo është traditë e jona kur na lindin fëmijët”, tha Çufta. /b. beqaj

Restelica festoi shtetësinë e Kosovës

2008-02-19T09:22:00.000-08:00

Restelicë, 18 shkurt 2008 - Qytetarët nga fshatrat e Gorës iu përgjigjën ftesës së restelicasve, të cilët organizuan festë për nderë të shpalljes së pavarësisë së Kosovës. Në këtë festë morën pjesë të gjitha strukturat komunale dhe ato të sigurisë, ku edhe u ngrit për herë të parë flamuri i shtetit të Kosovës. Në tubim u tha se shteti më i ri në botë u takon edhe popullatës së Gorës, sikurse që u takon popujve të tjerë që jetojnë në Kosovë.
Të pranishmëve iu drejtuan kryetari i fshatit Restelicë, Isa Mutash, pastaj edhe imami i fshatit, Haxhi Shabani, i cili tha se këtë ditë restelicasit e kanë pritur me shekuj dhe se kjo ditë shënon fundin e mashtrimit të popullatës së kësaj treve me iluzione të parealizueshme. Ai përmendi se kjo popullatë nuk është me kombësi gorane, por si e tillë quhet në bazë të emrit të trevës. Sipas imamit, termi goran si etnitet, është vënë nga regjimi serb, për ta zhdukur termin e vjetër nacional, mysliman.
Te pranishmëve në këtë tubim iu drejtua edhe kreu komunal, Salim Jenuzi, i cili në gjuhën boshnjake u tha të pranishmëve se pavarësia e Kosovës është për të gjithë dhe jo vetëm për shqiptaret “Në Kosovë nuk do të ketë popuj shumicë dhe pakicë, por do të jenë të gjithë të barabartë”, tha Jenuzi.
Masës së tubuar iu drejtuan edhe dy deputetët boshnjakë në Kuvendin e Kosovës, të cilët nënshkruan deklaratën e pavarësisë, Sadik Idrizi dhe Xhezair Murati. Njëherësh, masës iu drejtuan edhe pjesëtarët e TMK-së, të cilët u zotuan se do të jenë siguri për të gjithë. /b. beqaj

Në Sharr festojnë të gjithë

2008-02-19T09:18:00.000-08:00

Sharr, 17 shkurt 2008 - Pleqtë nga Restelica e Gorës së Sharrit, Misin Ejupi dhe Mevlan Kushi, ndër të parët nisën të festojnë në qendër të Sharrit, duke i valëvitur flamujt kombëtarë shqiptar. Ata thanë se kanë rrugëtuar rreth 30 kilometra nga Restelica, për t’iu bashkëngjitur kremtes së madhe të pavarësisë. “Nuk kemi besuar se do të vij kjo ditë, së paku ne nuk do ta prisnim, por ja që po e shijojmë edhe ne shpalljen e shtetit të Kosovës”, thanë njëzëri këta pleq.
Fshati Restelicë njihet si përkrahësja më e madhe e inspiratave të popullatës shumicë të Kosovës, për shtet të pavarur dhe sovran. /b. beqaj

Sharri përgatitet për kremtimin e pavarësisë

2008-02-13T12:46:00.000-08:00

Sharr, 13 shkurt 2008 - Krerët komunalë të Sharrit kanë tubuar të martën të gjitha strukturat e sigurisë, si dhe drejtuesit e partive politike, për t’u përgatitur sa më mirë në kremtimin e manifestimit, menjëherë pas shpalljes së pavarësisë së Kosovës. Të gjithë i janë përgjigjur ftesës pozitivisht, ndërkohë që përfaqësuesit e Iniciativës Qytetare të Gorës (GIG) munguan në këtë takim.
Kryetari i Sharrit, Salim Jenuzi, njoftoi se kremtimi do të bëhet me shumë këngë e valle, por pa asnjë fjalim, në mënyrë që t’u shmangen keqkuptimeve që do të pasonin pas fjalimeve në këtë ditë. “Nuk do të ketë fjalime nga askush, por vetëm këngë, valle dhe argëtim. Kjo na është sugjeruar edhe nga Prishtina”, tha Jenuzi, pas së cilit propozim reagoi kreu i OVL të UÇK-së, Shpejtim Kamberi, i cili e konsideroi manifestimin si gjysmak. “Nuk ka kuptim nëse nuk do të lejoheshin fjalimet në këtë ditë të madhe”, tha Kamberi. Edhe kryetari i degës së AKR-së, Ismet Lecaj, insistoi që të paktën kryetari i komunës t’u drejtohet qytetarëve në këtë manifestim. “Nuk bën hiq, nëse ju z. Kryetar nuk i drejtoheni masës, të paktën sa për t’ua uruar shpalljen e pavarësisë”, tha Lecaj.
Nga ana tjetër, përfaqësuesit e dy partive boshnjake u zotuan se do të marrin pjesë në kremtimin e shpalljes së pavarësisë. Zv-kryesuesi i KK-së, Sabedin Çufta, kërkoi që kremtimi të bëhet në mënyrë dinjitoze, ku do të merrnin pjesë edhe popullata e Gorës. “Pavarësia bëhet për krejt popullin e Kosovës dhe jo vetëm për shqiptarët. Këtë do të mundohem t’ua sqaroj edhe bashkëkombësve të mi, në mënyrë që edhe atë të festojnë”, tha Çufta. Edhe përfaqësuesit e Partisë së Aksionit Demokratik (SDA) premtuan se do të marrin pjesë në këtë kremte të madhe. E vetmja gjë që i frikësohen partitë nga Gora është provokimi i mundshëm i tyre nga shqiptarët, e që mund të shkaktoj ndonjë të keqe.
Ndërkaq, përfaqësuesit turq të KFOR-it, pasi kërkuan që mos të ketë armë në ditën e kremtes, paraprakisht ia uruan kosovarëve pavarësinë. “Edhe pse nuk e dimë se kurë do të ndodhë kjo, ne ju urojmë, që tani, arritjen e pavarësisë suaj. Prandaj, festoni, por pa armë ju lutemi”, tha njëri nga oficerët turq të KFOR-it.
Të gjithë të pranishmit u zotuan se do të angazhohen që simpatizantët e tyre t’i këshillojnë dhe t’i lusin që kjo kremte të kalojë si është më së miri. Edhe ish-kryetari i KK-së, Halim Shemsidini, u zotua se do ta përkrahë pushtetin aktual në organizimin e kësaj feste të madhe që pritet t’iu ndodhë kosovarëve. /b. beqaj

Jenuzi premton punë dhe transparencë maksimale

2008-02-12T14:10:00.000-08:00

Sharr, 12 shkurt 2008 - I vetëdijshëm që e presin vështirësi të shumta gjatë këtij mandati, si njeriu i parë i një komune të varfër, kryetari i Sharrit, Salim Jenuzi, shpreson se me angazhim të të gjithëve do t’ia arrijë që mos t’i zhgënjejë qytetarët e dy trevave të kësaj komune, duke i shpërblyer ata për besimin që ia kanë dhënë. Jenuzi thotë se do të kujdesët që shpenzimi i parasë publike te bëhet me “kimet”, ndërsa përqendrimin kryesor në zhvillim do ta ketë në realizimin e projekteve që do të qojnë në zhvillimin e bujqësisë, blegtorisë dhe turizmit. “Që nga dita e parë e punës sime jam marrë me identifikimin e prioriteteve, me të cilat duhet të merrem pa humbur kohë”, thotë Jenuzi, duke premtuar se do t’i mbyllë ventilet që e kanë avulluar buxhetin komunal gjatë mandatit të paraardhësve të tij. “Për tre autobusët, pronë të komunës, nga shtatori i këtij viti do të gjejmë zgjidhje tjetër, sepse ata i kanë kushtuar mjaft komunës. Edhe shpenzimet e telefonave që kanë qenë të fryrë, ne i kemi reduktuar deri në maksimum”, sqaron Jenuzi.
Sa u përket investimeve, sipas Jenuzit, për qeverinë e re lokale prioritet është asfaltimi i aksit të ri të rrugës Bellobrad – Mejdan, i cili ka gjatësinë 2.5 kilometër, por që nuk është kryer, edhe pse ai ka nisur së realizuari para disa vjetësh. “Përveç kësaj, ne do të gjejmë forma për sigurimin e mjeteve, në mënyrë që këtë vit t’i asfaltojmë edhe rrugët që shpien nga magjistralja Zhur – Sharr, drejtë fshatrave Plavë, Buçe dhe Rrenc. Të gjitha këto në trevën e Opojës, ndërsa në trevën e Gorës do ta asfaltojmë rrugën që lidh fshatin Radeshë me Sharrin”, premton Jenuzi, duke shtuar se ka premtime nga CIMIC-u gjerman se do të ndihmohet komuna në hapjen e disa rrugëve drejtë kullotave të larta, që kjo komunë ka sipërfaqe të mëdha.
Lidhur me arsimin, Jenuzi ka nënvizuar se shpreson që gjatë këtij viti të realizojë aneksin e shkollës fillore në Llopushnik dhe shkollën e fshatit Rrenc.
Për problemet e gjetura, Jenuzi ka bërë të ditur se ka trashëguar nxehjen nëpër disa shkolla. “Kemi probleme me shkollën e mesme “Ruzhdi Berisha”, QKMF-në dhe në të gjitha shkollat fillore. Lëndën djegëse këto institucione e kanë në përfundim e sipër”, ka thënë Jenuzi.
Në fund, numri një i Sharrit ka premtuar transparencë në punën e tij, e që kjo u ka munguar në të kaluarën qytetarëve. “Maksimalisht do të jemi transparentë gjatë punës sonë. Të gjithë qytetarëve iu premtoj qasje të plotë në dokumentet zyrtare, pos atyre që me akte ligjore nuk lejohen. Ata do të kenë të drejtë të kontrollojnë çdo gjë që mund të kontrollohet, ngase puna jonë do të jetë e hapur, në veçanti për çështjet që janë në interesin e tyre. U premtoj qytetarëve se do të kenë një administratë të efektshme, sepse administrata komunale është në shërbim të tyre, e jo ata në shërbim të saj”, ka përfunduar Jenuzi. /b. beqaj

Në Sharr mbretëron paqja dhe siguria

2008-02-05T08:53:00.000-08:00

Sharr, 05 shkurt 2008 - Situata e sigurisë në komunën e Sharrit është e mirë dhe stabile, vlerësuan të martën në sallën e KK-së në Sharr përgjegjësit kryesor të ruajtjes së paqes dhe rendit, duke premtuar se do të bëjnë përpjekje që edhe në të ardhmen të ruhet kjo gjendje.
Të pranishëm në këtë takim ishin kryetari i KK-së, Salim Jenuzi, zv. komandanti Rajonal i policisë në Prizren, n.kolonel Faton Alia, komandanti i policisë në Sharr, kapiteni Gëzim Zogaj, nënkryetari komunal nga minoritetet, Sabedin Çufta, gjyqtarët e Sharrit, kryetarët e fshatrave të kësaj komune, KFOR-i gjerman dhe ai turk, si dhe policia e UNMIK-ut. /b. beqaj

Zgjedhjet serbe i përçajnë goranët e Sharrit

2008-02-03T06:06:00.000-08:00

Beograd - Sharr, 03 shkurt 2008 - Iniciativa Qytetare e Goranëve, e cila vepron në Beograd, u ka bërë apel bashkëkombësve të tyre që të votojnë të dielën për presidentin aktual të Serbisë, Boris Tadiq. Këtë ia kanë konfirmuar Agjencisë serbe të lajmeve “Beta” krerët e kësaj iniciative. “I ftojmë të gjithë goranët e Gorës, Serbisë dhe kudo në diasporë që në raundin e dytë të zgjedhjeve presidenciale të dalin masovisht dhe ta votojnë kryetarin aktual, Boris Tadiq”, citon agjencia “Beta”, komunikatën e lëshuar nga ky subjekt politik i goranëve që vepron në Serbi.
Njëkohësisht, ky subjekt politik ka konkluduar se njerëzit si kundërkandidati i Tadiqit, Tomislav Nikoliq, janë përgjegjës për situatën e krijuar në vend. “Apelojmë edhe tek serbët e Kosovës që mos të votojnë për ata të cilët Kosovën e kanë pru në këtë gjendje, por t’i kthehen ardhmërisë evropiane. Nuk është e rastësishme që BE-ja e ka pezulluar nënshkrimin e marrëveshjes për stabilizim-asocim me Serbinë. Ata duan t’i presin rezultatet e këtyre zgjedhjeve, pastaj të veprojnë. Mos lejoni që komuna e Gorës të mbetet e vetmuar në luftën demokratike për Kosovën”, thuhet më tej në këtë komunikatë, përmes së cilës bëhet e ditur se në raundin e parë të votimit, në tri vendvotime të Gorës kanë dalë 64% e votuesve, prej të cilëve 58% kanë votuar për Tadiqin ndërsa vetëm 9.5% për Nikoliqin. Sipas agjencisë “Beta”, në Serbi janë të regjistruar në listat e votimeve 54 mijë goranë.
Nga ana tjetër, në një prononcim për media, kryetari i Iniciativës Qytetare të Gorës (GIG) me seli në Sharr, Mursel Halili, ka thënë se “GIG-u” që drejton ai nuk ka asgjë të përbashkët me “GIG-un” që vepron në Beograd. Halili nuk e ka fshehur angazhimin e tij që treva e Gorës të jetë njësi vetadministruese, por që nuk ka përmendur nëse fjala është për themelimin e komunës së Gorës. “Goranët, përmes Kuvendit të Kosovës, ku jam edhe unë deputet, do të tentojnë t’i zgjedhin në mënyrë institucionale problemet që i preokupojnë, sikurse që është çështja e arsimit. Presin që ta realizojmë të drejtën e vetëadministrimit lokal, ku do t’i zgjidhnim shumë probleme që na janë grumbulluar”, thotë Halili.
Sa i përket zgjedhjeve të raundit të parë dhe shifrës që kanë publikuar mediat serbe në lidhje me pjesëmarrjen e goranëve, Halili thotë se ato janë shifra të fryra dhe as përsëafërmi nuk ngjasojnë me realitetin “Nuk janë të sakta këto të dhëna. Unë disponoj me të dhëna të sakta, sipas të cilave vetëm rreth 15% e votuesve nga Gora kanë dalë në votime. Këto të dhëna janë manipulime që vijnë nga qarqe të ndryshme të Beogradit, duke veçuar me këtë rast edhe Rexhep Hoxhën, dikur zyrtar i lartë i Beogradit. Ata me kohë e kanë përgatitur raportin, në bashkëpunim me koordinatorin e Qendrës Koordinuese serbe, me seli në Vraniç të Gorës, që drejtohet nga Abdi Alia”, tha Halili.
Edhe zyrtarët e koalicionit “Vakat”, vlerësojnë se shifra e paraqitur në mediat e Beogradit është tepër e fryrë, ndonëse vlerësojnë se edhe ky numër i votuesve , rreth një mijë, është brengosës. Siç thonë ata, në votimet e raundit të parë, pos atyre që marrin paga nga Serbia, është vërejtur se kanë marrë pjesë edha ata marrin paga nga buxheti i Kosovës.
Në raundin e parë për zgjedhjet presidenciale në Serbi, kutitë e votimit janë hapur në tri vendbanime të Gorës; Glloboçicë, Vraniç dhe Mlikë, ku pos qytetarëve nga këto fshatra, kanë marrë pjesë edhe qytetarë nga fshatrat tjera të Gorës. E njëta gjë pritet të ndodhë edhe sot, kur po zhvillohen zgjedhjet e rrethit të dytë për kryetar të Serbisë /b. beqaj

Në Bresanë u përurua shkolla e re

2008-01-31T12:03:00.000-08:00

Sharr, 31 janar 2008 - Të enjten banorët e fshatit Bresanë të Opojës së Sharrit patën festë, pasi atyre iu përurua shkolla e re shtesë, në kuadër të asaj ekzistuese “28 Nëntori”.
Krahas strukturave të pushtetit lokal, në këtë ceremoni morën pjesë mysafirë nga Zyra Ndërlidhëse e Gjermanisë në Prishtinë, përfaqësues të Shoqatës për Bashkëpunim Teknik (GTZ), si dhe përfaqësues të firmave të ndryshme që morën pjesë në ndërtimin e kësaj shkolle, e cila kap sipërfaqen shfrytëzuese prej 650 metrash katrorë.
Kjo shkollë ka nëntë klasë mësimi, si dhe një dhomë për kabinetin e informatikës, që do t’u vihet në dispozicion rreth 900 nxënësve të kësaj shkolle.
Me duartrokitje frenetike, ushtarët e kontingjentit gjerman të KFOR-it, në krye me komandantin Robert Bund, drejtori i Drejtorisë së Arsimit në Sharr, Hajri Ramadani, si dhe kryetari i fshatit Bresanë, Ymer Ademi, në mënyrë solemne bënë përurimin e shkollës së re të këtij fshati.
Vënia e gurthemelit ishte bërë në maj të vitit të kaluar, ndërsa kostoja e përgjithshme e këtij projekti arrin vlerën prej 180 mijë eurosh, të cilën e kishin ndarë Komuna e Sharrit dhe GTZ-ja gjermane. /b. beqaj

Në Sharr u debatua për projekt-kushtetutën e Kosovës

2008-01-30T10:26:00.000-08:00

Sharr, 30 janar 2008 - Eqrem Kryeziu, Kadri Kryeziu dhe Bajram Latifi nga minoritetet, të martën qëndruan në Sharr, ku si anëtarë të Komisionit kushtetues shpalosën në shtylla të trasha përmbajtjen e draftit kushtetues që pritet të hyj në fuqi pas shpalljes së pavarësisë së vendit.
Organizuar nga Qendra e Trajnimeve dhe Burimeve për Avokim (ATRC), në sallën e kuvendit Komunal të Sharrit, ku i pranishëm ishte edhe kryetari komunal, Salim Jenuzi, përpiluesit e kushtetutës së ardhshme të vendit sqaruan se Kosova do të ketë këtë dokument bazë të shtetësisë nga më të avancuarit në rajon. Sipas tyre, kushtetuta e ardhshme e Kosovës e radhitë vendin në sistemin parlamentar, por që presidenti do të ketë shumë kompetenca edhe pse Kuvendi do te jetë organi më i lartë i vendimmarrjes. “Draft-kushtetuta i ka 157 nene, për të cilat jemi angazhuar shumë, në mënyrë që secilën fushë jetësore ta rregullojmë me kushtetutë, sidomos të drejtat e njeriut”, tha Eqrem Kryeziu, duke sqaruar se element bazë ka qenë plani i Ahtisarit.
Edhe Kadri Kryeziu ka konkluduar se kushtetuta e Kosovës do të jetë ndër dokumentet më të avancuara në rajon, ku sipas tij, e drejta e pakicave kombëtare është aq e avancuar sa që mund të thuhet se është bërë diskriminim pozitiv ndaj tyre. “Përpos barazisë së qytetarëve, simboleve shtetërore dhe çështjeve që kanë të bëjnë me rregullimin e shtetit, pakicat zënë vend të posaçëm. Ato do të kenë edhe më tej 20 vende të rezervuara në Kuvend, nga 120 sa do të ketë gjithsejtë”, tha Kryeziu, duke shtuar se me këtë draft-kushtetutë parashihen edhe Forcat e Sigurisë, të cilat do të numërojnë rreth 2500 pjesëtarë me armatim të lehtë. “Ne do të jemi pjesë e NATO-s, prandaj nuk do të kemi nevojë për armatim të rëndë”, tha Kryeziu.
Sipas panelistëve, presidenti i vendit do të jetë komandant suprem i forcave të sigurisë dhe zbatues i të gjitha përgjegjësive që do t’i marr ai nga Kuvendi.
Nga ana tjetër, anëtari boshnjak i këtij Komisioni, Bajram Latifi, tha se ai nuk ka qenë në këtë komision për t’u përkujdesur për komunitetin që i takon, por për të dhënë kontributin e tij profesional, në mënyrë që të nxirët ky dokument sa më i përsosur. “Mos prisni që unë do të kem punuar vetëm për pakicat. Unë si jurist kam punuar që kjo kushtetutë të jetë e mirë për të gjithë qytetarët e Kosovës”.
Në fund, pjesëtarë nga grupe të ndryshme të interesit, si ata nga OVL e UÇK-së dhe Bashkësia Islame, u interesuan për më shumë sqarime rreth çështjeve që kanë të bëjnë me ta, por që panelistët sqaruan se të gjitha çështjet do të rregullohen me ligje të veçanta, ndërkohë që në kushtetutë janë të përfshirë në kuadër të të drejtave të njeriut. /b. beqaj

Kryqi i Kuq ndanë dru për pleqtë e vetmuar

2008-01-23T04:34:00.000-08:00

Sharr, 23 janar 2008 - Kryqi i Kuq Komunal në Sharr u ka dalë në ndihmë të moshuarve, të cilët janë të vetmuar dhe pa përkujdesje nga familjarët. Me nga dy metër dru për djegie, Kryqi i Kuq Komunal u ka dalë në ndihmë të moshuarve, të cilët jetojnë të vetmuar dhe që nuk kanë pasur mundësi ta sigurojnë këtë lëndë djegëse. Jeton Ramadani, sekretar i Kryqit të Kuq në Sharr, tha se ideja për një ndihmë të këtij lloji ka ardhur, pasi në këtë institucion ka pasur shumë kërkesa për një ndihmë të tillë "Kur dihet se tek ne mbretërojnë dimrat e gjatë, kemi vendosur që së paku kësaj shtrese të popullatës t'i dalim në ndihmë në këtë formë. Janë gjithsejtë katër pleqë mbi moshën 80-vjeçare dhe pa përkujdesjen e askujt, të cilëve u kemi ndihmuar që t'ua zbusim telashet gjatë dimrit", tha Ramadani.
Sipas Ramadanit, tre përfitues janë nga treva e Opojës dhe një nga treva e Gorës, të cilëve ua kanë dërguar drutë deri në shtëpi.
Më herët, Kryqi i Kuq Komunal i ka ndihmuar kësaj shtrese të popullatës me gjëra ushqimore, ndërkohë që për varfnjakët, kjo organizatë ka ndarë edhe veshmbathje të përdoruara, por që, sipas Ramadanit, janë mjaftë kualitative që janë dhuruar nga Kryqi i Kuq i Suedisë. /b. beqaj

Nis konstituimi i pushtetit të ri

2008-01-10T14:13:00.000-08:00

Sharr, 10 janar 2008 - Asambleja komunale e Sharrit, të enjten zgjodhi dy zëvendës kryesuesit e KK-së dhe publikoi emrat e tre drejtorëve të drejtorive komunale dhe drejtuesin e Zyrës së Komuniteteve. Me vota të fshehta u votua për tre kandidatët e propozuar për zëvendës kryesues të KK-së, njëri prej të cilëve duhej të ishte nga radhët e komunitetit boshnjak. Mitat Fejza i PDK-së ishte i vetmi kandidat që fitoi në raundin e parë të votimit, ndërkohë që boshnjaku, Sabidin Çufta, nga koalicionit “Vakat” u desh të zgjidhet me një votim shtesë, ku figuronte vetëm emri i tij, pasi që në raundin e parë nuk fitoi 11 votat e duhura. Qamil Kolloni i LDD-së nuk arriti të zgjidhet në këtë post, pasi ai mori vetëm gjashtë vota.
Në vazhdim të seancës u formuan vetëm tri komitetet e përhershme, ai për Politikë e Financa, me 7 anëtarë, për Komunitete me 6 anëtarë, si dhe ai për Ndërmjetësim, me 5 anëtarë, duke pasur parasysh me këtë rast përfaqësimin e subjekteve politike, atë gjinore, si dhe përbërjen etnike të kësaj komune.
Këshilltarët në vazhdim miratuan vendimin për shpalljen e konkursit për drejtues të Drejtorisë për Administratë dhe Personel, formuan panelin për zgjedhjen e tij, si dhe miratuan vendimin për hartimin e statutit të ri të komunës.
Në përfundim, kryetari i komunës, Salim Jenuzi, i publikoi emrat e vetëm tre drejtorëve të rinj, si dhe drejtuesin e ri të zyrës së komuniteteve, ndërkaq për drejtorët tjerë do të shpallet konkurs.
Në krye të Drejtorisë për Arsim e Kulturë do të jetë Hajri Ramadani, në atë të Shëndetësisë, dr. Ramadan Jashari, Ekonomisë e Financave, Ahmet Bahtijari, Zyrën e Komuniteteve do ta drejtojë sërish Mehmet Hamza, ndërsa drejtorin e Urbanizmit dhe Kadastrit do ta udhëheq një kandidat i propozuar nga koalicioni “Vakat”, të cilët në këtë seancë nuk e paraqitën propozimin e tyre. /b. beqaj

Fillimi i vitit... 2008

2008-01-06T15:40:00.000-08:00

Nga: Beqir BEQAJ

U vodh trafa... S’u vodh trafa e “Sharrprodhimit”... Ngjarja u bë transparente edhe në media, por që mbeti vetëm me kaq. As gazetarët nuk u morën në pyetje nga prokuroria për shpifje dhe as të etiketuarit nuk u morën në pyetje për vjedhje! E gjithë ngjarja mbeti vetëm si një përrallë interesante dhe asgjë më shumë. Ishte kjo edhe një dëshmi se në vendin tonë shkrimet në media nuk qojnë peshë tek organet e drejtësisë, apo edhe në legjislacionin e vendit. Krejt çka mbeti të shpresohet, ishte ndëshkimi përmes votës.
Gjatë fushatës parazgjedhore, e cila u përcoll edhe me debate televizive, kryetari aktual i Sharrit i tha troç njeriut që dukej të ishte kandidati më serioz për t’ia cenuar postin, se ai është analfabet! Ndoshta edhe kishte të drejtë, bazuar në aktivitetin e këtij të fundit, si bartës i opozitës më të fuqishme në Sharr. Por, një shprehje e tillë në publik ishte gabim i madh për të parin e komunës, edhe pse karshi kryeopozotarit dhe subjektit politik që drejtonte, ai bënte çfarë dëshironte, pa u ndrojtur se do të ballafaqohet me një opozitë të fuqishme. Mblidhej seanca e KK-së dhe miratohej e vendosej çka i tekej pozitës, pa ndonjë vështirësi. Sharra në gozhdë i zuri pozitës, vetëm në seancën e fundit kur duhej të miratohej një ndryshim i “vogël” në lidhje me pronësinë e një parcele në Sharr, e cila mëpastaj do të shfrytëzohej nga njerëz të caktuar për ndryshime të mëdha për interesa klanore. Vetëm kësaj radhe u pa se sa e fuqishme ishte opozita dhe çka mundej të bente ajo, sikur të ishte aktive gjatë gjithë kohës kur udhëhiqte legjislacioni i deritashëm komunal.
Ndonëse ka pasur investime të mira gjatë punës së ish-legjislacionit, kualiteti i tyre i dobët dhe mospërfshirja në kryerjen e këtyre punëve nga ndërmarrjet e kësaj komune, disi e zbente besueshmërinë se çdo gjë po punohet me sinqeritet dhe duar të pastërta. Ky ishte edhe një shkaktar që krijonte kundërshtarë për këtë legjislacion. Këtë ka mundur ta vërej ish-pushteti nëpër çdo ndejë por edhe në disa media që mundoheshin të përkushtoheshin në informim të drejtë të publikut.
Ndonëse nuk ishte lehtë të plasoje ngjarje që realisht i interesonin popullatës, por jo edhe pushtetarëve, dikush duhej ta bënte këtë për hir të ruajtjes sadopak të profesionit të gazetarisë. Mjaftoi ta publikoja storien në lidhje me aferën e një transformatori që u hoq nga “Sharrprodhimi” për t’u vendosur në një lagje të Sharrit, për t’u shpallur unë person i padëshirueshëm në zyrën e, tashmë ish-kryetarit komunal. Natyrisht që edhe ky ishte veprim i keq për kryetarin, pikërisht në kohën kur transparenca kërkohej gjithnjë e më tepër, si kusht për ta bindur publikun se ky pushtet po punon me sinqeritet dhe duar të pastra.
Erdhi koha e zgjedhjeve, e cila konsiderohet si dita kur populli gjykon! Krejt çka u tha gjatë fushatës parazgjedhore, ishte e kotë. Populli tashmë kishte vendosur se si do të vepronte me listën votuese. Në bazë të rezultatit të zgjedhjeve, u pa se populli nuk ishte i kënaqur me veprimet dhe punën e ish-pushtetarëve aktual. Pas një kohe të gjatë, populli mori guximin të votoj për ndryshime. Prandaj, ata që morën rolin dhe besimin e popullit për të bërë ndryshime, duhet që mos ta harrojnë kurrë se populli i pruri në pushtet për të bërë ndryshime pozitive, në dobi të tij dhe jo për të ndryshuar njerëzit e pushtetit.

I josh politika, mbesin pa paga!

2007-12-23T05:23:00.000-08:00

Sharr, 23 dhjetor 2007 - Pasi shumica dështuan në politikë, ku emri i tyre figuronte në listat zgjedhore, si pretendentë për ndonjë pozitë në pushtet, 42 mësimdhënës dhe tre drejtorë shkollash, tani vrapojnë pas institucioneve, për t’i kërkuar pagat e nëntorit. Ata janë hequr nga lista e pagave për këtë muaj, sepse rregullorja e parashikonte një gjë të tillë. Disa mësimdhënës vazhdojnë të trokasin në dyert e Drejtorisë komunale të Arsimit (DKA), për të kërkuar sqarime për arsyen e heqjes nga lista e pagave. Arsimtari i Biologjisë në shkollën fillore “Sezai Surroi” në Bellobrad, Ajni Aliu, thotë se atë nuk e ka njoftuar askush nga zyrtarët e Arsimit, përkitazi me rregulloren për zgjedhjet e nëntorit, prandaj ai kishte punuar si çdo muaj tjetër. “Askush nuk na ka njoftuar për rregulloren, e cila kishte paraparë që të mos punonim gjatë fushatës, sepse ishim në listat zgjedhore”, tha Aliu, duke shtuar se emri i tij në listën e një partie politike nuk ishte bërë me dëshirën e tij. “Mua më ka futur në listë njëra nga partitë politike, pa dëshirën time. Sapo kam marrë vesh për këtë, kam parashtruar ankesë në KQZ, por që ata nuk më kanë hequr, me pretekst se ishte shumë vonë për ta bërë këtë. Unë nuk kam bërë fushatë por kam punuar, prandaj kërkoj pagën time”, ankohet Aliu.
Përpjekjet e tij për ta marrë rrogën e nëntorit, deri më tani kanë qenë të kota, ngase asnjë zyrtar i kësaj drejtorie, nuk ishin në gjendje t’i jepnin sqarime, prandaj ai synon t’i drejtohen MASHT-it për të kërkuar ndihmë.Zyrtarët e DKA-së, shprehen se nuk kanë qenë të informuar për pasojat që mund t’i kenë, ata që hyjnë në listat kandiduese. Aq më tepër gjendja është koklavitur, sepse gjatë kësaj periudhe mësimdhënësit kanë qenë të përfshirë në procesin mësimor, duke mos e humbur asnjë orë mësimi. “Drejtoria fare nuk ka qenë e informuar për pasojat që mund t’i kenë punëtorët e arsimit, e as që kemi marrë ndonjë urdhëresë administrative apo shkresë tjetër se ata nuk mund të mbajnë mësim gjatë fushatës zgjedhore”, ka deklaruar për media Nexhati Shaipi, përgjegjës financash në DKA të Sharrit.
Mësohet se në këtë komunë kjo dukuri ka ndodhur vetëm me punëtorët e arsimit, ngase të tjerët që kanë qenë të futur në listat zgjedhore, paraprakisht kanë qenë të njoftuar nga përgjegjësit e tyre. Kjo ka bërë që mësimdhënësit të dyshojnë në eprorët e tyre, të cilët i akuzojnë se ata e kanë ditur një rregullore të tillë, por që kanë heshtur, sepse u ka konvenuar. “Edhe Drejtoria e Arsimit edhe drejtori i shkollës sonë e kanë ditur këtë rregullore, por që kanë heshtur, sepse u ka konvenuar që ne të punojmë”, ka shprehur dyshimin arsimtari, Ajni Aliu. /b. beqaj

Në prag të Bajramit, katër vendbanime pa rrymë

2007-12-23T05:09:00.000-08:00

Sharr, 23 dhjetor 2007 - Pasi ka arritur shuma mbi 800 mijë euro që kanë grumbulluar borxhe ndaj KEK-ut, kjo e fundit ua ka ndërprerë në transformatorë rrymën katër vendbanimeve të kësaj komune, në prag të festës së Bajramit. Banorët e revoltuar nga ky veprim i KEK-ut, sidomos në prag të festës më të madhe fetare, shprehen se kjo ngjarje mund të këtë lidhshmëri edhe me politikën. Disa prej tyre akuzojnë menaxherin e rrjetit rajonal të KEK-ut në Prizren, Vehbi Sofiun, se ai u është hakmarrë, për shkak se nuk ka fituar asnjë votë nga këto fshatra, derisa kandidohej për deputet në Kuvendin e Kosovës nga radhët e AAK-së. Vetë Sofiu, i cili është nga Opoja, qëndroi në Sharr, ku u njoftua me gjendjen aktuale, duke shprehur zhgënjimin e tij që kjo komunë e ka neglizhuar pagesën e rrymës, përderisa gjatë verës ishte e para në rajon për nga pagesat që i bënte KEK-ut. Ai u ka bërë apel banorëve përmes radios lokale, që ta paguajnë energjinë elektrike, duke u dhënë të gjitha mundësitë dhe format e pagesës. “Nuk po kërkoj që ta paguani krejt borxhin, por sadopak ta zbusni atë. Paguani, kurdo që të keni para dhe çfarëdo shume që keni mundësi. Paguani nga pak dhe më shpesh, në mënyrë që ta zbusni borxhin”, apeloi Sofiu.
Fshati më i madh i kësaj komune, Restelica e Gorës, si dhe tri fshatra të Opojës, Bellobradi, Kuki dhe Brruti, kanë grumbulluar borxhin mbi 800 mijë euro. Afërsisht gjysmën e kësaj shume e ka krijuar vetëm fshati Restelicë, vendbanim ky i nënkryetarit aktual të KK-së, Sabedin Çufta, i cili nuk deshi të flasë në lidhje me arsyet e ndërprerjes se energjisë në fshatin e tij. “Nuk i di arsyet e vërteta pse na është ndërprerë rryma... Thonë se kemi shumë borxh”, tha shkurt Çufta.
Mirëpo, kryeplaku i këtij fshati, Isa Mutash, tha se ky veprim nuk ka asnjë lidhje me politikën, apo ndonjë hakmarrjeje politike, “Assesi nuk mund të ndërlidhet politika në këtë problem. Është borxhi i lartë shkaktar, që KEK-u ka vepruar kësisoj. Unë e kam mobilizuar krejt fshatin që ta zbusim këtë borxh, pas të cilit veprim ne do të kemi rrymë”, tha Mutash, i cili kishte marrë garanci edhe nga KEK-u se do të kenë energji, pasi ta paguajnë një pjesë të borxhit.
Shefi i njësisë së KEK-ut në Sharr, Ymri Skeraj, njoftoi se Bellobradi e ka paguar një pjesë të borxhit dhe se është kyçur në rrjet. Sipas tij, shuma e borxhit që po i afrohet njëmilionëshit, nuk mund të tolerohet dhe se shkyçjet për këtë arsye nuk duhet të politizohen. “Është borxh i madh... Askush nuk mund ta toleroj këtë neglizhencë që po e bën popullata, e cila, po të ishte e interesuar, do ta shlyente atë”, tha Skeraj. /b. beqaj

Komuna s’ka pare për t’ia paguar telefonin KKZ-së

2007-12-23T04:59:00.000-08:00

Sharr, 23 dhjetor 2007 - Pasi janë grumbulluar 260 euro shpenzime telefoni, për dy muaj punë që ka bërë Komisioni Komunal i Zgjedhjeve (KKZ) në Sharr, ata kanë ra në hall se si t’i paguajnë këto shpenzime, në mënyrë që mos të mbeten pa telefon. Zyrtarët nga KKZ-ja thonë se kryeshefi i ekzekutivit komunal ua ka pranuar këtë shumë dhe se përgjegjësit financiar nga komuna pritej që t’i derdhin mjetet, por këta të fundit nuk po e bëjnë këtë. “Përgjegjësit për financa në KK na thonë se komuna s’ka pare mi paguar këto fatura, të cilat, fundi i fundit, nuk janë edhe aq të larta, krahasuar me punën që kemi bërë. Për dy muaj ne kemi kontaktuar me 1200 anëtarë të Komisioneve Zgjedhore, dhjetë partitë politike nga komuna jonë dhe me qendrën tonë në Prishtinë. Të gjitha punët që kanë qenë në përgjegjësinë tonë i kemi kryer me sukses, prandaj na habit fakti që maltretohemi për këtë shumë simbolike”, tha për “Lajm” Haxhi Berisha, zyrtar ekzekutiv i KKZ-së në Sharr, duke fajësuar për këtë neglizhencë përgjegjësin komunal për financa, Ahmet Bahtiarin.
I kontaktuar nga gazeta, ky i fundit thotë se asnjë problem nuk ekziston në këtë çështje, por se mungesa e mjeteve dhe disa urdhëresa, në lidhje me çështjet financiare, kanë bërë që kjo çështje të bëhet temë për diskutim. “Ne nuk kemi kontestuar shumën apo edhe raportet në relacionin Komunë-KKZ, por u kemi thënë se mungojnë mjetet për këtë destinacion. Është edhe pengesa tjetër, e cila na i ndalon veprimet që kanë të bëjnë me financa, në këtë periudhë kur priten ndryshime në pushtet”, tha Ahmet Bahtiari, për të shtuar se kjo pagesë do të bëhet, me gjasë, vitin e ardhshëm fiskal. “Me siguri se faturat e tyre duhet të presin vitin 2008, sepse këtë vit çdo gjë ka marrë fund, sa i përket destinimit të mjeteve financiare”, thotë Bahtiari.
Sido që të jetë, zgjedhjet që sapo përfunduan, e që në këtë komunë sollën befasi dhe rezultate të papritura, si duket do të pasohen edhe me probleme të tjera financiare, ku shumica e vëzhguesve që janë emëruar nga partitë politike, ankohen se nuk u janë paguar honorarët e premtuara. /b. beqaj

Rexhep Sejdillar, gorani më i votuar në Kosovë

2007-12-23T04:46:00.000-08:00

Sharr, 23 dhjetor 2007 - Sikur të ekzistonte demokracia e vërtetë në sistemin zgjedhor kosovar, nënkryetari i degës së Aleancës Kosova e Re (AKR) në Sharr, gorani Rexhep Sejdillar, do të bëhej prijës i këtij minoriteti. Ai në zgjedhjet e nëntorit ka fituar 2400 vota, e që moralisht konsiderohet fitues i këtyre zgjedhjeve. Megjithatë, për shkak se është angazhuar në një parti të madhe shqiptare, ai do të mbetet jashtë çdo përfshirje në institucione. Vetë Sejdillar thotë se ndihet i shkelur nga sistemi zgjedhor që u aplikua në vendin tonë, i cili, sipas tij, nuk mund të quhet demokratik por vetëm si eksperiment i radhës nga shumë eksperimente që po bëhen me Kosovën. “Si kandidat për deputet në Kuvendin e Kosovës, unë i kam mundur të gjithë bashkëkombësit e mi, që nga ministri i deritashëm i Shëndetësisë, Sadik Idrizi, e deri tek kandidatët më të vegjël, si Xhezair Murati, Numan Baliq... Sa për kryetarin e GIG-ut, Mursel Halilin, as që dua të diskutoj, sepse ai ka fituar vetëm 10% nga numri i votave të mia. Megjithatë, falë sistemit zgjedhor në Kosovë, Halili do të jetë deputet me 175 vota, ndërsa unë me 2400, do të shpresoj për zgjedhjet e ardhshme, nëse ndërrohet ky sistem eksperimental zgjedhor”, thotë Sejdillar.
I vetëdijshëm se “faji” ekziston në faktin që është përfshirë në një parti të madhe shqiptare dhe jo në ndonjërën nga partitë e minoritetit që i takon, Sejdillar nuk pajtohet me rregulloret, të cilat, siç thotë, i shkelin të gjitha normat demokratike. “Pavarësisht kësaj, vet fakti i 20 vendeve të rezervuara dhe përqindja e garantuar për femrat, bie ndesh me sistemin e listave të hapura. Listat e hapura nuk njohin gjini apo përkatësi nacionale, por vetëm numrin e votave. Kjo që po aplikohet te ne është sistem i jashtëzakonshëm, të cilin asnjëra nga këto shtetet që po na e imponojnë neve, nuk e aplikon në vendin e vet”, thotë Sejdillar, duke kritikuar Iniciativën Qytetare të Gorës (GIG), të cilën e konsideron si subjekt që po u shkakton dëm, jo vetëm shqiptarëve, jo vetëm statusit, por edhe vetë minoritetit që i përket. “Edhe unë jam goran, sikurse Mursel Halili i GIG-ut, por si qëllim e kam integrimin e popullatës sime në shoqërinë e re kosovare. Fatkeqësisht, këta njerëz po privilegjohen edhe nga ndërkombëtarët edhe nga institucionet vendore. Shpresoj se në të ardhmen do të sqarohen gjërat në vendin tonë”, përfundon nënkryetari i degës së AKR-së në Sharr, Rexhep Sejdillar. /b. beqaj

Serbia institucionalizohet edhe në Gorë

2007-12-15T06:35:00.000-08:00

Sharr, 15 dhjetor 2007 - Një zyrë për vetëqeverisje lokale, siç e quajnë institucionet serbe, është hapur këto ditë në trevën e Gorës së Sharrit. Sipas asaj që u ka deklaruar mediave serbe koordinatori i kësaj zyre, Abdi Alia, qëllimi i hapjes së kësaj dege të qeverisë së Serbisë në Gorë, është që ky shtet t’i mbrojë të drejtat e qytetarëve goranë. “Kjo zyrë ka rëndësi të madhe për popullatën gorane, sepse qytetarët kanë një adresë se ku t’i zgjidhin problemet e tyre përmes institucioneve të republikës së Serbisë. Këtu do të funksionoj Zyra e Punësimit, ajo për çështjet Sociale, Ofiqaria dhe Kryqi i Kuq. Këto shërbime do të kryhen tash për tash, por që shpresojmë se në të ardhmen do të zgjerohen aktivitetet e kësaj zyre”, u ka thënë Alia mediave serbe.
Shefi i kësaj zyre të qeverisë së Serbisë, e cila është hapur në fshatin Vraniç të Gorës, Abdi Alia, e ka falënderuar Ministrinë e Serbisë për Kosovë e Metohi, e cila u ka ndihmuar në hapjen e saj. Kjo ministri, sipas njeriut që Serbia e ka emëruar si koordinator për “komunën e Gorës”, do t’i përgjigjet çdo kërkese të goranëve që kanë të bëjnë më mirëqenien e tyre.
Nga ana tjetër, nënkryetari i partisë boshnjake nga Gora, Vatan, Sabedin Çufta, i cili në mandatin e KK-së që po skadon ushtronte postin e nënkryetarit komunal të Sharrit, thotë se partia e tyre është kundër hapjes së kësaj zyre, por që nuk dëshiron të merret me të, përderisa nuk do të zgjidhet çështja e statusit të vendit. “Sikurse që po shfrytëzohet kjo kohë e status quos, për hapjen e kësaj zyre dhe veprimeve tjera të ngjashme, ashtu edhe do të mbyllen ato, në një kohë tjetër që pritet së shpejti të vijë. Partia jonë dhe ne si pushtet lokal, gjithnjë kemi qenë kundër hapjes së institucioneve të Serbisë në trevën tonë, por asnjëherë nuk kemi dashur që t’i mbyllim ato me forcë. Fundja, kjo edhe pritet nga ne, sepse qëllimi i tyre është provokimi i institucioneve legale dhe popullatës shqiptare këtu”, tha Çufta.
Tentimet tona që të kontaktojmë me zyrtarin e kësaj zyre ishin të kota, sepse askush nuk gjendej në “vendin e punës” edhe pse në mediat serbe kanë deklaruar se, pothuajse e tërë administrata qeveritare e Serbisë, do të ushtrohet në këtë zyrë. /b. beqaj

Jenuzi, kryetar i të gjithëve

2007-12-14T03:47:00.000-08:00

Sharr, 14 dhjetor 2007 - Salim Jenuzi, kryetar i degës së PDK-së në Sharr, i cili edhe në balotazh ka arritur që ta sfidoj kryetarin e deritashëm të Sharrit, Halim Shemsidinin, në takimin e parë me media, i ka falënderuar qytetarët e kësaj komune, të cilët, sipas tij, dëshmuan kulturë të lartë demokratike dhe tolerancë gjatë gjithë procesit zgjedhor. “Falënderoj të gjithë votuesit, pavarësisht se kujt ia kanë dhënë votën, sepse unë do të jem kryetar i të gjithëve. Vetëm me përkrahjen e plotë të popullatës, do të mund t’i realizoj objektivat, të cilat ia kam parashtruar vetes”, tha Jenuzi, duke shtuar se e kishte pritur fitoren e PDK-së në të tria nivelet zgjedhore. “Jo pse jam parashikues i mirë, por se është vërejtur në popullatë se ata ishin molisur nga premtimet boshe për një të ardhme më të mirë, ndërkohë që zhyteshin përditë e më tepër në varfëri të skajshme”, tha Jenizi. Ai ka premtuar se tani e tutje qytetarët e kësaj komune nuk do të jenë të dalluar sipas përkatësisë partiake. “Gjithnjë do të jem në shërbim të tyre, duke u angazhuar vazhdimisht për të krijuar një jetë më të mirë për ta. Gjatë fushatës nuk kam dhënë premtime boshe, të cilat është e pamundur që të realizohen, por kam premtuar se do të angazhohem me tërë qenien time, për t’i realizuar të gjitha projektet që realisht mund të realizohen gjatë këtij mandati. Premtimet e mia i kam mbështetur edhe në përkrahjen që do ta kemi nga një kryeministër i aftë dhe energjik, i cili pritet që të formojë një qeveri funksionale, e cila mund të bëjë shumë për të përmirësuar pozitën tejet të rëndë për qytetarët e vendit”, ka premtuar Jenuzi. Sipas tij, gjatë shtatë vjetëve të shkuara, Qeveria e Kosovës i ka ndarë buxhet Sharrit, vetëm për 33 mijë banorë, ndërkaq vetëm në listat e votuesve për zgjedhjet që sapo përfunduan, kanë figuruar mbi 33 mijë banorë. Duke komentuar marrëdhëniet me rivalët politikë në të ardhmen, Jenuzi nuk ka dashur as të flasë për një gjë të tillë. “Qytetarët më njohin si njeri që nuk merrem me thashetheme, njollosje apo edhe fërkime politike me partitë tjera. Tani do të kem punë shumë më të rëndësishme se sa të merrem me gjëra të tilla periferike. Unë presë që opozita të jetë e mirëfilltë, sikurse në të gjitha vendet demokratike. Ajo me rolin e saj konstruktiv, mund t’i evitoj lëshimet apo edhe gabimet tona. Kjo do të na ndihmojë shumë për të ecur përpara”, ka thënë në fund kryetari i ri i Sharrit, Salim Jenuzi, i cili i ka falënderuar edhe mediat dhe gazetarët nga kjo komunë, për, siç u shpreh, korrektësi në pasqyrimin e gjendjes reale gjatë fushatës zgjedhore. “Ndaj gazetarëve do të kem respekt të veçantë, ngase me shkrimet e tyre objektive, ata mund t’i ndihmojnë proceseve pozitive, si dhe luftimit të dukurive negative, gjë që është edhe qëllimi ynë i përbashkët”, ka thënë në fund kryetari i ri i Sharrit, Salim Jenuzi. /b. beqaj

Salim Jenuzi zgjidhet kryetar i Sharrit

2007-12-09T08:47:00.000-08:00

Sharr, 09 dhjetor 2007 - Qyteza e Sharrit ka bubulluar nga “lodrat” dhe curlet opojane, të shtunën mbrëma deri në mesnatë, duke festuar fitoren për kryetar komune të kandidatit të PDK-së, Salim Jenuzi. Gjatë votimit të së shtunës në balotazh për kryetar komune, midis kryetarit aktual, Halim Shemsidini, nga LDK-ja dhe liderit të degës së PDK-së, Salim Jenuzit, nuk është shënuar asnjë incident. Të gjitha vendvotimet e kësaj komune, gjithsejtë 23, janë hapur me kohë, sikurse që edhe janë mbyllur me kohë.
Sipas të dhënave që dalin nga shtabi zgjedhor i PDK-së, kandidati i kësaj partie, Salim Jenuzi, ka arritur fitore kundrejt Shemsidinit, me një diferencë solide votash. Avni Nebiu, kryetar i këtij shtabi, tha se kandidati i tyre ka fituar me mbi një mijë vota diferencë kundrejt Shemsidinit. “Nga, diç më tepër se dhjetë mijë votues, kandidati jonë ka marrë 5558 vota. Gjithsejtë 1060 vota më shumë se kryetari i deritashëm, Halim Shemsidini”, tha Nebiu, i cili e ka përgëzuar elektoratin e tij, i cili, sipas tij, ka ditur se si ta festoj këtë fitore, sikurse që ka ditur edhe të votoj me dinjitet, pa ndonjë incident. Edhe rezultatet preliminare që ka dhënë KKZ-ja, tregojnë se kandidati i PDK-së ka shënuar fitore në raundin e dytë të garës për kryetar komune. Sipas këtyre të dhënave, kandidati i PDK-së ka marrë 54.8% të votave, ndërsa kandidati i LDK-së 45.2%, nga gjithsejtë 10.203 vota të vlefshme. Raporti i KKZ-së, njëherësh, bën me dije se në këtë komunë kanë marrë pjesë 31.3% të votuesve me të drejtë vote.
Nga ana tjetër, asnjë e dhënë nuk është publikuar nga shtabi zgjedhor i LDK-së, e që në publik komentohet si pranim i humbjes, por në heshtje.
Ndryshe, shumëkush ka pritur që Shemsidini i LDK-së të kaloj që në raundin e parë, por ai, jo vetëm që nuk kaloi, por në raundin e parë me 32.4% të votave është radhitur i dyti, pas Jenuzit, i cili ka fituar 40% të votave të elektoratit të Sharrit. /b. beqaj

Partitë serbe ende marrin vota nga goranët!

2007-11-25T01:12:00.000-08:00

Sharr, 25 nëntor 2007 - Ndonëse goranët janë popullatë e vogël numerikisht dhe të ndarë në disa kombësi, ku secila ka edhe subjektin partiak, disa prej tyre nuk kanë hezituar që tu japin vota edhe partive serbe, në zgjedhjet që u zhvilluan këtë muaj. Gjithsejtë tri parti gorane kanë konkurruar në këto zgjedhje, e që secila, së paku nga një delegat do ta fusë në KK të Sharrit. Partia e Sadik Idrizit, ministër aktual i Shëndetësisë... “Vatan”, Iniciativa Qytetare e Gorës (GIG) dhe Partia e Aksionit Demokratik (SDA), kanë konkurruar në këto zgjedhje, duke shprehur rivalitet se cila do ta përfaqësoj më denjësisht këtë popullatë që është ndarë në dy etnitete (goranë dhe boshnjakë). Megjithatë, edhe kësaj radhe këtyre partive u kanë ikur ca vota në partitë serbe, e që për ta janë shumë.
Kryetari i Partisë Popullore Serbe (SNS), Mihailo Shçepanoviq, ka deklaruar për publik se, në bazë të vëzhguesve të vet, subjekt i tij politik ka fituar një numër votash edhe në trevën e Gorës së Sharrit. Sipas të dhënave që thotë se i posedon, Shçepanoviq ka deklaruar se partia e tij ka fituar në Gorë 27 vota, ndërkaq në Prizren vetëm një votë.
Pohimet e Shçepanoviqit vërtetohen edhe në raportin e KKZ-së në Sharr, sipas të cilit kjo parti ka fituar 27 vota në këtë komunë.
Përpos kësaj partie, sipas raportit të KKZ-së, në këtë komunë kanë marrë vota edhe partitë tjera serbe. Partia e Pavarur Liberale (SLS) ka marrë gjithsejtë 86 vota. Partia Demokratike Serbe për Kosovë e Metohi (SDSKiM) ka marrë 25 vota, ndërkaq Partia Serbe e Kosovës dhe Metohisë (SKMS) ka marrë 16 vota. Lidhja e Socialdemokratëve të Pavarur të Kosovës dhe Metohisë (SNSDKiM) ka marrë 6 vota. Nga pesë vota kanë marrë edhe tri parti tjera serbe, ajo e drejtuar nga Bogolub Kariq, subjekti “Mbijetesa e Pomoravles së Kosovës” (OKP) dhe Demokracia e Re (ND). Gjithsejtë 175 vota kanë marrë partitë serbe në këtë trevë, e që politikanët e këtushëm i konsiderojnë shumë, bazuar në numrin e kësaj popullate të vogël. Ministri i Shëndetësisë dhe drejtuesi i partisë “Vatan” nga Gora, Sadik Idrizi, thotë se ky numër votash që u është dhënë partive serbe, ndonëse është i madh për popullatën e vogël të Gorës, megjithatë nuk është aq sa ka qenë në zgjedhjet e kaluara. “Bazuar në angazhimin që po bën Serbia në Gorë, si në aspektin propagandistik, ashtu edhe në derdhjen e parave, sidomos për mësimdhënësit, ky numër nuk është edhe aq i madh. Megjithatë, e mira është se në këto zgjedhje mori pjesë subjekti nga treva jonë që konsiderohet të jetë mbështetës i Serbisë, GIG-u. Fundja, ne si subjekt kemi dalë më të mirët në këto zgjedhje, e që kjo fletë se i kemi sfiduar të gjitha tentimet për ta ruajtur ndikimin e Serbisë në Gorë”, tha Idrizi.
Sa për ilustrim, Balli Kombëtar (BK), në zgjedhjet për Kuvendin e Kosovës ka marrë 36 vota nga kjo komunë, ndërsa Lëvizja Kombëtare për Çlirimin e Kosovës (LKÇK) ka marrë vetëm 18 vota. /b. beqaj

Në Sharr PDK-ja del e para

2007-11-23T16:25:00.000-08:00

Sharr, 19 nëntor 2007 - Rezultatet preliminare nxjerrin Partinë Demokratike të Kosovës (PDK) të jetë e para në komunën e Sharrit, por jo edhe fituese. Sipas këtyre rezultateve, nga gjithsejtë 11705 vota të vlefshme për Kuvendin Komunal, PDK-ja ka fituar 4026, e pasuar nga LDK-ja me 3101 dhe koalicioni boshnjak “Vakat” me 1411 vota. Partitë tjera kanë fituar dukshëm më pak se këto tri partitë më të forta në këtë komunë.
Pasqyrë e njëjtë duket edhe në votat për kryetar komune, ku PDK-ja, e cila ka vënë për kandidat kreun e degës, Salim Jenuzin, ka fituar 4319 vota, pasuar nga LDK-ja e cila për kandidat ka kryetarin aktual të KK-së, Halim Shemsidini, për të cilin kanë votuar 3497 votues. Partitë tjera kanë fituar dukshëm më pak, e që janë përjashtuar nga gara e mëtutjeshme. Sipas këtyre rezultateve, Halim Shemsidini duhet të garojë në raundin e dytë me kreun e degës së PDK-së, Salim Jenuzin, por si kandidatë i dytë.
Vlenë të theksohet se edhe në mesin e goranëve ka pasur një konkurrencë të madhe, krahasuar me numrin e banorëve që ka kjo trevë e Sharrit. Nga territori i Gorës në këto zgjedhje kanë konkurruar tri subjekte, ku më e forta, me një mijë e 411 vota, ka rezultuar të jetë koalicioni “Vakat”, pjesë e së cilës është ministri aktual i Shëndetësisë, Sadik Idrizi. Iniciativa qytetare e Gorës (GIG) ka dalë e dyta me 938 vota, ndërsa Partia për Aksion Demokratik (SDA) e Numan Baliqit ka fituar 500 vota. Nga subjektet gorane, e vetmja që ka konkurruar për kryetar komune ka qenë “Vakati”, e që kandidati i saj, Usmen Ballxhi, ka fituar 1751 vota.
Ndryshe, sipas të dhënave nga KKZ-ja, këto rezultate mund të ndryshojnë kur të arrijnë rezultatet përfundimtare, por jo edhe aq sa ta ndryshojnë këtë përqindje. /b. beqaj

Sharri votoi qetë dhe me dinjitet

2007-11-21T05:19:00.000-08:00

Sharr, 18 nëntor 2007 - Në zgjedhjet e 17 nëntorit, në komunën e Sharrit të drejtë vote kanë pasur 33.465 qytetarë. Mirëpo, sipas të dhënave zyrtare nga KKZ-ja në Sharr, të drejtën e votimit e kanë shfrytëzuar vetëm 12.055 votues, ose 40.5 %.
Krahasuar me shifrën e votuesve nga zgjedhjet e fundit, numri i votuesve në zgjedhjet e këtij viti ka shënuar rritje për afro 3.000 votues. Për këtë arsye, sipas Rregullores së KQZ-së, për zgjedhjet e këtij viti është rritur edhe numri i qendrave të votimit dhe i vendvotimeve. Nga 19 qendra të votimit, aq sa ishin në zgjedhjet e kaluara, për zgjedhjet e së shtunës janë shtuar edhe katër qendra të reja votimi, ndërkohë që janë shtuar edhe gjashtë vendvotimeve të reja, nga 47 sa kishte në zgjedhjet e fundit.
Me shtimin e këtyre qendrave dhe vendvotimeve të reja, pak a shumë u është lehtësuar votuesve nga disa vendbanime të thella që të arrijnë më lehtë deri tek kutia e votimit, megjithatë, edhe me këtë shtim një numër i konsiderueshëm i banorëve të kësaj komune, kanë mbetur të pakënaqur, sepse ata kanë pritur hapjen e më shumë qendrave të votimit, kur dihet se kjo komunë përbëhet nga rreth 40 vendbanime, kryesisht rurale.
Sido që të jetë, votimi në këtë komunë ka ecur mirë, pa asnjë vështirësi dhe me një atmosferë festive. Por, mënyra e komplikuar e votimit, sidomos për shtresat më pak të arsimuara dhe për personat e moshuar, ka marrë shumë kohë, madje edhe deri në 25 minuta për një votues. Mirëpo, kompensimin e kohës e kanë bërë votuesit, të cilët kanë pasur mjaftë njohuri për procesin dhe janë përgatitur me kohë që sa më shpejtë ta përfundojnë votimin. Këta persona për vetëm tre minuta e kanë kryer krejt procesin.
Mangësitë që janë vënë re në komunën e Sharrit kanë qenë jashtë përgjegjësive të KQZ-së. E para ishte avashllëku i përgjegjësve për pastrimin e rrugëve nga bora, të cilët gjatë tërë ditës nuk janë dukur nëpër rrugët e kësaj komune, edhe pse sipas kontratës ata është dashur që të intervenonin nëpër rrugët përplot me ngrica.
Avashllëku i dytë është vërejtur në KEK, i cili i ka befasuar të gjithë, kur një orë para skadimit të votimit është ndërprerë energjia elektrike, edhe pse premtimi ka qenë se gjatë ditës së votimit nuk do të ketë ndërprerje të rrymës. Shumë vendbanime, ku edhe kanë qenë vendvotimet, dritat u janë rikthyer në kohën kur edhe ka përfunduar koha e votimit... në orën 19:00.
Edhe pse zyrtarët nga KKZ-ja thanë se ndërprerja e energjisë elektrike nuk u ka shkaktuar probleme, në popullatë dëgjoheshin shaka të tipit më ekstrem, ku dominonte dyshimi se rryma është ndërprerë me qëllim, për të manipuluar me kutitë e votimit. /b. beqaj

Banorët e Sharrit i kthehen bletarisë

2007-11-03T15:17:00.000-07:00

Sharr, 03 nëntor 2007 - Gazmend Tairovci, edhe pse mban emër shqiptar, ai thotë se është boshnjak, por që në radhë të parë e ndien veten kosovar. Ai ka filluar të merret me bletari para katër vjetësh, kur edhe përfundimisht ka vendosur të mbetet në Kosovë. “Kam vendosur të jetoj këtu, në fshatin tim piktoresk, sepse askund nuk do të gjej më mirë. Prandaj edhe e kam filluar këtë veprimtari, për të cilën shpresoj se do të ketë perspektivë më të madhe në të ardhmen”, tha Tairovci nga fshati goran, Zlipotok, apo Përroi i Keq, siç e quajnë në shqip.
Në një kooperim midis Drejtorisë komunale të Bujqësisë e Zhvillimit rural dhe ProCredit Bankës, të premten në Sharr u organizua ekspozita e mjaltës së prodhuar nga bletarët e kësaj komune. Në këtë ekspozitë, në ambiente të hapura, prodhimet e tyre i ekspozuan bletarë nga fshatrat e thella malore, ku dominuan ata nga treva e Gorës. Zyrtari i lartë komunal për Bujqësi, Flamur Sylejmani, tha se ideja e kësaj ekspozite është që bletarët të ndjejnë përkrahjen institucionale, në mënyrë që të kenë më shumë vullnet për të punuar. “Ata duhet ta ndjejnë se kanë një mbështetje institucionale, prandaj e kemi organizuar këtë ekspozitë. Në të ardhmen planifikojmë që t’i stimulojmë bletarët në punën e tyre, ndërkohë që këtë ekspozitë synojmë ta zgjerojmë dhe ta kthejmë në një panair tradicional me karakter më të gjerë”, tha Sylejmani. Mendim të njëjtë shprehu edhe drejtori komunal për Bujqësi dhe Zhvillim rural, Irfan Ibrahimi, në fjalën përshëndetëse të kësaj ekspozite. Ai i ka uruar bletarët për interesimin e tyre për këtë veprimtari, duke u premtuar mbështetje institucionale. “Kjo veprimtari ka perspektivë tek ne, prandaj duhet t’i përkushtohemi edhe më shumë”, tha Ibrahimi.
Ndërkaq, koordinatori i ProCredit Bankës në Sharr, Artan Laçi, para bletarëve u shpreh se kjo bankë gjithnjë do t’i mbështesë njerëzit që duan të punojnë. “Do t’i mbështesim me çdo kusht ata që janë të vetëdijshëm se fitimi arrihen vetëm me punë. Banka jonë është e interesuar ta përkrahë çdo bujk, çdo fermer, bletarë dhe të ngjashëm, me programin tonë për stimulimin e këtyre veprimtarive”, tha Laçi.
Përkundër motit të ligë që mbretëroi të premten në Sharr, prodhimet e tyre i kanë ekspozuar dhjetëra bletarë të rinj si dhe ata që këtë veprimtari e kanë trashëguar nga të parët. /b. beqaj

LDD-ja hapi fushatën parazgjedhore në Sharr

2007-11-03T14:55:00.000-07:00

Sharr, 03 nëntor 2007 - Pesëdhjetë deri në gjashtëdhjetë euro do të jetë stimulimi për fermerët, blegtorët dhe bujqit e Sharrit, nëse Lidhja Demokratike e Dardanisë del fituese në zgjedhjet e 17 nëntorit. Këto ishin premtimet konkrete që i dha të premten në Sharr kandidati për kryetar komune nga LDD-ja, Vahidin Halili, në hapjen e fushatës parazgjedhore të kësaj partie. Ai ka qenë i prerë edhe në një premtim, i cili ka nxitur duartrokitje frenetike në sallën e Shtëpisë së kulturës në Sharr. “Nëse një qytetar nuk do të arrij ta marr një dokument që kërkon nga administrata komunale, brenda 15 minutave, unë do të jap dorëheqje nga posti i kryetarit”, tha Halili, duke shtuar se nuk wshtw kundër buxhetit, por është kundër shtimit të buxhetit përmes plaçkës nga qytetarët. Halili premtoi se do ta heq edhe taksën komunale për regjistrimin e automjeteve, me të cilën pushteti aktual e ka ngarkuar qytetarin e kësaj komune para ca muajsh si dhe shfuqizimin e një “tradite” që ka aplikuar deri më tani KK-ja, me rastin e nxjerrjes së dokumenteve personale, kur ai është kushtëzuar paraprakisht me pagimin e taksës mbi pronën. “Programi jonë parasheh forma të tjera, në mënyrë që qytetari ta paguaj taksën mbi pronën, por nuk do të jetë kushtëzim”, tha Halili.
Të pranishëm në këtë promovim të kandidatëve për këshilltarë komunalë nga radhët e LDD-së, nga Prizreni kishin ardhur drejtues të kësaj partie, e që të gjithë u prezantuan para publikut se “i kanë rrënjët nga Opoja.
Oferta e kësaj partie për stimulimin e fushave kryesore ekonomike – 60 euro për atë që ruan 10 dele, 60 euro për atë që ruan një lopë, 50 litra naftë për hektarë, si dhe heqja e disa taksave dhe kushtëzimeve, ishte oferta më konkrete që kanë dëgjuar qytetarët e Sharrit deri më sot. Ky konstatim doli nga vetë kreu i kësaj partie në Sharr, Vahidin Halili, i cili u betua se do t’i realizojë të gjitha, ndërkohë që paraprakisht i ka ftuar “përfituesit” e këtyre stimulimeve që t’i drejtohen komunës, në qershor të vitit të ardhshëm. Por, kusht i vetëm, sipas Halilit, është që LDD-ja të vijë në pushtet. /b. beqaj

PDK-ja hapi fushatën parazgjedhore në Sharr

2007-11-03T14:46:00.000-07:00

Sharr, 03 nëntor 2007 - Partia Demokratike e Kosovës, të premten e hapi fushatën parazgjedhore në Sharr, duke premtuar investime në turizëm, bujqësi dhe blegtori. Kjo parti premtoi se këtë komunë do ta lidh me vendet fqinje (Shqipërinë dhe Maqedoninë) përmes rrugëve cilësore, e të cilat do t’ia heqin epitetin kësaj treve si “zorrë qorre”. I pari i kësaj partie në Sharr, Salim Jenuzi, i cili kandidon për kryetar komune, ka vënë në spikamë shkeljet dhe malverzimet që po bëhen nga pushtetarët aktualë të kësaj komune, ku sipas tij, veturat zyrtare po përdoren edhe nëpër dasma dhe ahengje të ndryshme familjare. “Unë si kryetar komune, do ta ndaloj rreptësisht përdorimin e veturave zyrtare të shtunave dhe të dielave edhe nëpër dasma. Me PDK-në në pushtet do të keni më shumë vende pune, më shumë bujqësi dhe më shumë blegtori, sepse do të bashkëpunojmë ngushtë me sektorin privat”, tha Jenuzi.
Bartësi i listës për këshilltarë komunalë, Mitat Fejza, zgjedhjet e 17 nëntorit i ka cilësuar si “treni i fundit” për të ndryshuar jetën e qytetarëve të Sharrit për të mirë. Ai i ka përmendur disa nga shkeljet më flagrante që pushteti aktual u ka bërë ligjeve, ndërkohë që ka premtuar më shumë disiplinë, nëse pushteti komunal i Sharrit do të udhëhiqet nga PDK-ja. “Në listën tonë i keni njerëzit më të devotshëm që ka treva jonë, prandaj votoni për ta që të ndërpritet avazi i gjertanishëm i të qenit superior kur je në pushtet. Ne nuk do të qeverisim me ju, por ju jeni ata që do të qeverisni me ne”, ka thënë Fejza.
Për t’i nderuar simpatizantët e kësaj partie në Sharr, të pranishëm në sallën përplot me njerëz, qenë edhe Xhavit Haliti, Zafir Berisha dhe udhëheqës të tjerë të PDK-së. Që të gjithë i janë drejtuar elektoratit të Sharrit, duke i ftuar që të votojnë masovisht për partinë e tyre, ngase, sipas tyre, është koha e fundit që t’i sjellin ndryshim pozitiv Kosovës. /b. beqaj

Probleme me rrymën në QMF të Llopushnikut

2007-11-02T15:42:00.000-07:00

Sharr, 02 nëntor 2007 - Gati dy javë nuk kanë mundur të punojnë mjekët në Qendrën e Mjekësisë Familjare në Llopushnik të Opojës, për shkak se KEK-u ua ka ndërprerë rrymën. Pushim të paplanifikuar kanë pas edhe punonjësit e Zyrës së Vendit, të cilët janë të vendosur në këtë objekt shëndetësor. Drejtori komunal për Administratë të Përgjithshme dhe Pushtet Lokal, Hilmi Dauti, tha se ka intervenuar të mërkurën personalisht në zyrat e KEK-ut në Prizren, në mënyrë që t’ua lidhin rrymën “U kërkova që ta lidhin rrymën, sepse borxhi nuk na takon ne, por Drejtorisë së Shëndetësisë. Pse të pësoj administrata jonë, për sherr të njerëzve që e administrojnë shëndetësinë”, tha Dauti.
Ndërkaq, drejtori komunal i Shëndetësisë, Mynafir Beshiri, tha se nuk është as faji i tyre, por deri te kjo gjendje ka ardhur si pasojë e keqmenaxhimit që po bën KEK-u me faturat e tyre. “Unë kam tri fatura dhe që të tria janë në emër të këtij institucioni shëndetësorë. Deri më tash kam paguar secilën faturë, por nuk e kam ditur se ato janë me numra të ndryshëm regjistrimi, por që figuronte emri i QMF-së në Llopushnik. Së voni kemi pranuar një faturë, ku figuron se i kemi borxh KEK-ut mbi 1200 €. Kjo edhe ishte arsyeja që na ndërprenë rrymën. Tash kërkojmë që të rishikohen të gjitha faturat, për të parë se kujt i kemi paguar rrymë rregullisht”, tha Beshiri.
I kontaktuar nga gazeta, shefi i Njësisë së KEK-ut në Sharr, Ymri Skeraj, tha se nuk është kompetencë e tij që të merret me këtë çështje, por këtë e menaxhon Prizreni. “Ne nuk merremi me këtë çështje, por është Prizreni ai që jep urdhra për shkyçjen nga rrjeti të borxhlinjve”, tha Skeraj, i cili mohon të ketë ngatërruar ndonjë gjë në lidhje me faturat e QMF-së në Llopushnik. Sipas tij, ky institucion shëndetësor posedon tre njehsorë elektrik, prandaj edhe i kanë tri fatura. “Ata janë posedues të këtyre njehsorëve, sepse kur është ndërtuar objekti i ri, nuk është ç’lajmëruar njehsori i objektit të vjetër. Zaten, ky borxh është pikërisht i objektit të ri, njehsorin e të cilit që nga ndërtimi nuk e kanë regjistruar dhe borxhi është grumbulluar. Megjithatë, për hir të funksionalitetit të këtij institucioni, KEK-u i Prizrenit i ka kyçur sërish në rrjet, edhe pse borxhi ende nuk është paguar”, tha Skeraj.
Edhe drejtori i Administratës komunale, Hilmi Dauti, e pranon se faji qëndron tek Drejtoria e Shëndetësisë, e cila nuk i ka qartësuar gjërat, që kur e kanë ndërtuar objektin e ri të QMF-së në Llopushnik. Sipas tij, edhe pse ndërtesa e vjetër e këtij objekti nuk shfrytëzohet, njehsori elektrik ka mbetur i regjistruar. “Sido që të jetë, u desh të intervenoj personalisht në KEK që ta kyçin rrymën, e pastaj të gjendet një zgjidhje, sepse dy javë nuk është punuar në këtë objekt, ku edhe janë punëtorët e Zyrës së Vendit”, tha Dauti. /b. beqaj

PD-ja e hapi fushatën parazgjedhore në Sharr

2007-11-01T09:00:00.000-07:00

Sharr, 01 nëntor 2007 - Duke iu lutur zotit për paqe dhe drejtësi, Partia e Drejtësisë (PD) ka hapur të mërkurën fushatën parazgjedhore në Sharr, duke mos premtuar asgjë nga investimet kapitale, por vetëm kapital njerëzor. Sipas kreut të kësaj partie, Sylejman Çerkezi, PD-ja nuk do të japë premtime boshe për investime megalomane, por vetëm premton njerëz të pastër dhe të aftë në vendet kyçe të pushtetit. “U bënë tetë vjet që gënjehemi, por si duket ne po sillemi sipas proverbit ‘e di se po më gënjen, por po ma kënda se po më gënjen bukur’. Jeni dëshmitarë se pavarësia e Kosovës po na vjen për çdo ditë nga goja e krerëve në pushtet, por ajo në fakt nuk është ashtu. Edhe ata e dinë se për statusin nuk po i pyet askush”, tha Çerkezi, duke e prezantuar humoristin e mirënjohur kosovar, Ibrahim Krajkova – Leci, si ekspert i cili do të dijë se si ta zhvilloj bujqësinë dhe blegtorinë e Sharrit. Vetë Krajkova u tregoi sharrjanëve ardhjen e tij në Sharr, më 1979, si agronom, ku është mahnitur me potencialet që ka kjo komunë për zhvillimin e agrikulturës. “Që nga ajo kohë nuk qenka bërë asgjë e madhe, sa ofron kjo treva juaj. Jam i bindur se me zhvillimin e bujqësisë dhe blegtorisë, komuna juaj do të jetë ndër më të pasurat. Por, për të arritur deri këtu, keni nevojë për njerëz të sinqertë dhe të pa korruptuar”, tha Krajkova.
Për ta promovuar programin e kësaj partie, në Sharr qenë të pranishëm edhe Ferid Agani, Halil Fejziu dhe Naser Bresa nga Partia Balli Kombëtar Demokratik, parti kjo që është futur në bashkësi më PD-në.
Që të gjithë premtuan se programi i PD-së ofron sinqeritet, drejtësi dhe pastërti, por jo edhe premtime boshe, sa për ta joshur elektoratin që t’ua qesë votën. /b. beqaj

LPK-ja në Sharr i bojkoton zgjedhjet

2007-10-31T08:15:00.000-07:00

Sharr, 31 tetor 2007 - Ndonëse Lëvizja Popullore e Kosovës (LPK) do të garoj në zgjedhjet e 17 nëntorit, në kuadër të listës së PDK-së, Këshilli i Rrethit i kësaj partie në Sharr ka dalë me qëndrimin se këto zgjedhje duhet bojkotuar. Kreu i LPK-së në Sharr, Demir Reshiti, tha se këto zgjedhje nuk po zhvillohen në kohën e duhur, prandaj duhet bojkotuar. “Nuk jemi kundër zgjedhjeve, por kundër kohës kurë po mbahen ato. Qëndrimi jonë është që zgjedhjet duhej të mbaheshin pas përcaktimit të statusit të Kosovës dhe se pikërisht për ta zvarritur statusin ato po organizohen tani”, tha Reshiti, sipas të cilit, çdokush që del në këto zgjedhje pajtohet me vazhdimin e status quos. “Të votosh në këto zgjedhje është pranim i rezolutës 1244 dhe i Pakos së Ahtisaarit. Është pranim indirekt edhe i ndonjë marrëveshje të fshehtë që ka mundur ta pranojë Ekipi jonë negociator, të cilin nuk po e pengojnë fare dokumentet dhe legjislacionet që, de jure dhe de facto, e lidhin Kosovën pas qerres së Serbisë”, konstaton Reshiti. Sipas tij, ata që po e kërkojnë votën e popullit, fare nuk e kanë hallin se Kosovën e kanë lënë dhe po vazhdojnë ta lënë nën juridiksionin e 1244-shit dhe të Pakos së Ahtisarit, por e kanë hallin se si ta mashtrojnë edhe njëherë elektoratin, ndërkohë që veprojnë për t’i eliminuar nga skena publike të gjithë ata që e thonë të vërtetën për absurdin e këtyre zgjedhjeve. “Është e domosdoshme bojkotimi i këtyre zgjedhjeve, të cilat na shpijnë drejtë rrjetës së merimangës që i është thurur Kosovës, duke i votuar ata që i kanë pranuar këto rrjeta dhe që, si shpërblim, kërkojnë sërish votën e popullit. Dalja në këto zgjedhje është vetëvrasje politike dhe kombëtare për popullin e Kosovës”, konstaton kreu i LPK-së në Sharr, Demir Reshiti, i cili ka pranuar se pesë kandidatët e LPK-së në krye me Emrush Xhemajlin, kanë gabuar që janë futur në listën zgjedhore të PDK-së.
“Xhemajli dhe të tjerët kanë gabuar rëndë që janë futur në listën e PDK-së”, ka thënë Reshiti, duke paralajmëruar edhe tubime antizgjedhore në Sharr. /b. beqaj

Djathi i Sharrit ende mbetet më i miri

2007-10-30T06:21:00.001-07:00

Sharr, 30 tetor 2007 - Djathi i Sharrit është vlerësuar edhe njëherë si prodhim më ekologjik dhe i pazëvendësueshëm në panairin e Prizrenit, në të cilin prodhimet e tyre nga qumështi i kanë plasuar kooperativat dhe fermerët individual nga rajoni i Prizrenit, në sheshin kryesor të këtij qyteti “Shatërvan”.
Organizuar nga shoqata gjermane “GTZ” dhe i përkrahur nga Ministria e Bujqësisë, Pylltarisë dhe Zhvillimit rural (MBPZHR), panairi i Prizrenit ka nxjerrë si rezultat se djathi i Sharrit edhe më tej mbetët në krye të listës për nga cilësia e këtij produkti ushqimor. Nijazi Tërshnjaku, drejtor i ndërmarrjes “Sharrprodhimi”, të cilën AKM-ja po tenton disa herë që ta shesë, tha se ndihet krenar që kjo ndërmarrje po e mban primatin edhe më tej për djathë më cilësorë. “Çmimi i parë që na u dha në këtë panair, na shton vullnetin që të punojmë edhe më shumë, përkundër vështirësive që kemi në ndërmarrje. Kjo dëshmon se produkti jonë primar ende ka vlerën e dikurshme”, tha Tërshnjaku.
Përpos çmimit të parë që iu nda “Sharrprodhimit”, edhe fermerët tjerë të kësaj ane u vlerësuan për punën e tyre. Kooperativa “Sharri” nga Bellobradi i Opojës, me pronar Hafiz Rifaj, e ndau çmimin e parë me “ABI”-n nga Prizreni për djathin më të mirë nga qumështi i lopëve, ndërsa fermeri individual Senifer Bale nga Restelica e Gorës mori çmimin e tretë për djathë delesh.
I mbështetur financiarisht nga ProCredit Banka, panairi i zhvilluar në ambiente të hapura, ka nxitur fermerët që të mburren me punën e tyre dhe të punojnë më shumë, në mënyrë që vitin e ardhshëm të jenë më të fortë në konkurrim. /b. beqaj

LDK-ja hapi fushatën parazgjedhore në Sharr

2007-10-29T15:38:00.000-07:00

Sharr, 29 tetor 2007 - Përkundër motit me shi, Lidhja Demokratike e Kosovës (LDK), ka arritur të tubojë të dielën dhjetëra simpatizantë të saj në sallën e Shtëpisë së Kulturës në Sharr, ku ka hapur fushatën parazgjedhore dhe ka promovuar kandidatët e saj për të gjitha nivelet e zgjedhjeve të 17 nëntorit. Për ta mbështetur degën e LDK-së në Sharr, nga qendra kanë ardhur ministrja e Shërbimeve Publike, Melihate Tërmkolli, kryebashkiaku i Prishtinës, Ismet Beqiri, zëdhënësi i Ekipit të Unitetit, Skender Hyseni, si dhe Behxhet Brajshori e Ramë Manaj.
“Kujtoni vitin 89’ dhe votoje numrin 89”, ishte fjala e parë që u dëgjua nga moderatorja, në hapje të fushatës, ku sipas saj, Kosova deri në këtë vit ishte në robëri, por themelimi i LDK-së nisi ta nxjerr atë nga robëria “Me daljen në skenë të LDK-së, Ibrahim Rugova arrita ta njoftoj krejt botën se çka po ndodhë me Kosovën”, tha moderatorja, pas së cilës fjalën e mori kryetari i degës së kësaj partie në Sharr, Halim Shemsidini, i cili aktualisht mban postin e kryetarit komunal. Ai që në fjalën e parë e ka kërkuar votën e qytetarëve, duke shprehur bindjen se edhe kësaj radhe LDK-ja do të fitojë. “Presë votën e qytetarëve, të cilët kurrë nuk na kanë gënjyer... Jepni vota njerëzve që ju kanë nderuar me praninë e tyre këtu. Jepni votën njeriut që edhe tani e kemi deputet në Kuvendin e Kosovës, por jepni edhe të tjerëve nga pak, sepse të gjithë e përbëjnë LDK-në e Ibrahim Rugovës”, u tha Shemsidini të pranishmëve në sallë, të cilëve paraprakisht iu uroi fitoren e partisë së tij.
Nga projektet konkrete, Shemsidini ka përmendur investime në energjetikë, blegtori dhe turizëm, për të cilat tha se ka donatorë që janë të interesuar për të investuar.
Më pas fjalën e ka marrë Skender Hyseni, i cili gjithashtu ka shprehur bindjen se kjo parti do t’i fitoj zgjedhjet. “Jemi të sigurt se do t’i fitojmë zgjedhjet... Nuk ka rrugë tjetër, LDK doemos duhet t’i fitoj zgjedhjet”, tha Hyseni.
Në zgjedhjet e 17 nëntorit, LDK do të garojë për postin e kryetarit komunal, ku sërish është nominuar Halim Shemsidini, kryetar aktual i KK-së. Për deputet në Kuvendin e Kosovës, kjo parti ka nominuar Shaban Halimin, deputetin aktual, ndërsa për këshilltarë komunalë, LDK-ja ka përpiluar listën e plotë, ku disa prej të nominuarve aktualisht e gëzojnë këtë pozitë. /b. beqaj

AKR-ja hapi fushatën elektorale në Sharr

2007-10-29T15:24:00.000-07:00

Sharr, 29 tetor 2007 - Për të dytën herë në jetën e tij, kreu i Aleancës Kosova e Re (AKR), Behgjet Pacolli, të shtunën qëndroi në Sharr, ku ka identifikuar një sërë problemesh, me të cilat ballafaqohet popullata e kësaj komune të varfër. Ai ka pranuar se nuk do t’i duronte këto mangësi, sikur të ishte qytetar i Sharrit. “Unë vij për pak çaste në mesin tuaj dhe ballafaqohem me një sërë problemesh. Nuk mund ta marr me mend se si ia dilni ju me këto probleme që ju rrethojnë në çdo pore të jetës”, u tha Pacolli sharrjanëve, duke u premtuar se me ardhjen e tij në pushtet, çdo gjë do të ndryshojë për të mirë. “Investimi i parë do të jetë në rrugën kryesore që ju lidh me botën, Sharr - Zhur. Më pas pason investimi në rrugët kryesore të Opojës dhe Gorës, ku edhe do të hapeshin dyert për çdo investim tjetër”, tha Pacolli, duke premtuar ndërtimin e dy shkollave, një në Llopushnik dhe një në Buzez, pastaj një palestër sportive në Blaç, meremetimin e Shtëpisë së Kulturës në Bresanë dhe investime të tjera kapitale.
Pacolli ka përmendur edhe një projekt, i cili me dekada ka mbetur vetëm si ëndërr për banorët e kësaj ane, ndërtimi i magjistrales drejtë Tetovës, e cila do t’ia hiqte kësaj komune epitetin e të qenit “zorrë qorre”.
Në hapjen e fushatës parazgjedhore të AKR-së në Sharr, Pacolli ka premtuar kthimin e namit të dikurshëm që kishte kjo trevë për nga prodhimet ushqimore dhe ekologjike, jo vetëm tek ne por edhe në rajon. “Ne do ta kthejmë traditën që kishte dikur kjo trevë, duke investuar në blegtori dhe bujqësi, sepse Kosova ka nevojë për prodhimet tuaja”, tha Pacolli.
I ndërprerë shpeshherë nga duartrokitjet në sallë, Pacolli tha se është i vetëdijshëm për premtimet që po i jep dhe koston e tyre, por se që të gjithave do t’u qëndroj karshi, duke i realizuar edhe në vepër. “Besoni se Kosova është vonuar shumë, prandaj duhet të ecim me hapa të shpejtë për ta zënë ekonominë e rajonit. Krejt çka po ju premtoj, jam i gatshëm edhe t’i realizoj, sepse kam projekte të gatshme për secilin premtim që po e jap para jush”, tha Pacolli.
Para elektoratit të Sharrit, Pacolli ka promovuar kandidatët për këshilltarë komunalë dhe kandidatin për kryetar komune. Ky i fundit u zotua se do të punojë me përkushtim për popullatën dhe se asnjëri nga premtimet e dhëna nuk është përrallë por realitet. “Nuk jam inkuadruar kot së koti në këtë parti, por më ka joshur programi i saj. Secilin premtim që po ua jap, nuk është përrallë por realitet, sepse e kam shpinën e fortë dhe mund t’i realizoj”, tha profesori Ismet Lecaj, pretendent për kryetar komune. /b. beqaj

Sërish dështoi seanca e KK të Sharrit

2007-10-27T13:34:00.000-07:00

Sharr, 27 tetor 2007 - Ka dështuar edhe të enjten mbajtja e seancës së 50-të e Kuvendit Komunal të Sharrit, në të cilën ishte paraparë rishqyrtimi i statusit të një parcele shoqërore me numër kadastre 905, e cila ndodhet në qendër të Sharrit. Në këtë seancë parashihej edhe miratimi i një vendimi në lidhje me këtë parcelë dhe shqyrtimi dhe miratimi i buxhetit komunal për vitin 2008, bazuar në ndryshimet e buxhetit për arsim. Opozita në Kuvend debatin në këto pika e ka cilësuar jashtëligjor, pasi kohë më parë zv.kryeministri Lutfi Haziri u kishte sugjeruar pushteteve lokale që të mos merren vendime të kësaj natyre. Deputetët e opozitës kishin refuzuar shqyrtimin e këtyre çështjeve në seancën e së martës, duke mos u paraqitur fare në Kuvend, sikur vepruan edhe të enjten.
Salim Jonuzi, kryetar i Degës së PDKsë, njëherësh edhe kandidat për kryetar komune në zgjedhjet e nëntorit, tha se nuk e kanë ndërmend të marrin pjesë në veprimet që pushtetarët i bëjnë sa për fushatë dhe jo për ndonjë të mirë për qytetarët. "Delegatët tanë nuk do të bëhen pjesëmarrës të vendimeve, që bien ndesh me sugjerimet e institucioneve qendrore të vendit", tha Jonuzi. Ai ka shprehur dyshimin se ky nxitim për të marrë vendime të tilla mund të ketë lidhje me interesa të ngushta të pushtetarëve.
Përpos këshilltarëve të opozitës, në seancën e së enjtes u vërejt edhe mungesa e këshilltarëve të partisë "Vatan", të cilët janë në koalicion me LDK-në. Burime të gazetës mësojnë se partia "Vatan" ka qenë kundër ndonjë vendimi që do t'ia ndryshonte statusin kësaj parcele, në të cilën disa zejtarë nga Gora kanë lokale afariste. "Nuk jemi budallenj që të votojmë kundër interesave të afaristëve tanë", tha ky burim, në kushte anonimiteti.
Njëkohësisht, gazeta ka kuptuar se disa këshilltarë të LDK-së në pushtet, në çastin e fundit i janë bashkëngjitur Lidhjes Demokratike të Dardanisë (LDD), e cila gjithashtu e ka përshëndetur veprimin e këshilltarëve që mos të marrin pjesë në seancë.
Kreu i degës së kësaj partie në Sharr, Vahidin Halili, i cili kandidon për kryetar komune në zgjedhjet e 17 nëntorit, tha se kjo parti e respekton vullnetin dhe qëndrimet e këshilltarëve që e refuzuan seancën. Ai nuk ka dhënë përgjigje të prerë, nëse tre nga këshilltarët e LDK-së kanë kaluar në LDD. "Ne e respektojmë vullnetin e secilit këshilltar, ndërkohë që dyert e partisë janë të hapura për secilin", tha Halili. /b. beqaj

PDK-ja ndihet më e fuqishme se kurrë më parë

2007-10-27T02:43:00.000-07:00

Sharr, 27 tetor 2007 - Dega e PDK-së në Sharr, në mbledhjen që ka zhvilluar me Shtabin zgjedhor dhe kandidatët për këshilltarë komunalë që do të garojnë më 17 nëntor, ka dalë me konstatimin se ky subjekt politik mbetët më i fuqishëm se kurrë më parë në këtë komunë. Avni Nebiu, sekretar i Degës dhe kryetar i Shtabit zgjedhor të PDK-së, tha se, pas kësaj mbledhje, PDK-ja është bindur se në Sharr mbetët subjekti më i përgatitur dhe më i fuqishmi në komunë “Si partia më e fuqishme, gjatë fushatës ne nuk do të bëjmë demagogji, por do të shpalosim projekte konkrete, me afate konkrete për realizimin e tyre. Demagogjia nuk ka më vend në popullatë, e cila është ngopur me to për shumë vjet. Çdo projekt do ta realizojmë në bashkëpunim me qytetarët, duke u nisur nga lagjet, fshatrat e deri tek qendra komunale, e cila deri më tash ka qenë e harruar nga pushtetarët”, tha Nebiu, duke potencuar se partia e tij do ta vazhdojë bashkëpunimin edhe me biznesin privat, por që si pushtet edhe do ta thellojë atë bashkëpunim “Edhe si opozitë kemi mbajtur lidhje të mira me ndërmarrjet private, por si pushtet ato do t’i thellojmë, duke iu ofruar infrastrukturë ligjore dhe rrugore, ndërkohë që ata do të hapin më shumë vende pune”, tha Nebiu.
Edhe kreu i kësaj partie në Sharr, Salim Jonuzi, i cili do të garoj për kryetar komune dhe bartësi i listës për këshilltarë komunalë, Mitat Fejza, premtuan se do të bëjnë ç’mosë që Sharrit njëherë e përgjithmonë t’ia kthejnë pozitën e merituar, si vend më piktoresk dhe vend ku secili do ta ketë një vend pune këtu dhe jo të mbetet kurbeti si bazë ekonomike. “Sharrin do ta bëjmë vend të pëlqyeshëm, jo vetëm nga banorët autokton, por edhe nga qytetarët tjerë, të cilët do të dëshironin që t’i kalojnë së paku pushimet në këtë vend ekologjik”, tha Jonuzi. /b. beqaj

KDI publikon rezultatin e punës së KK të Sharrit

2007-10-25T10:03:00.000-07:00

Sharr, 25 tetor 2007 - Asnjëra nga pesë këshilltaret e Kuvendit të Sharrit nuk ka shënuar ndonjë aktivitet, apo edhe diskutuar për ndonjë çështje jetike në Kuvend, në gjashtë muajt e parë të këtij viti. I tërë aktiviteti i femrave këshilltare ka qenë ngritja e dorës në seanca, sa herë që këtë e ka bërë lideri i tyre. Këtë e ka dëshmuar monitorimi i punës së Kuvendit Komunal në periudhën janar-qershor 2007 nga Instituti Demokratik i Kosovës (KDI). Bazuar në këto rezultate, përfaqësimi i femrës së Sharrit në Kuvend mbetet të konsiderohet vetëm si dekor, ose vetëm për ta kënaqur kriterin që kërkohet me ligj, që femra të jetë pjesëmarrëse me 30% në institucione. Rezultatet e hulumtimit, KDI-ja i ka bërë publike në një konferencë për media, të mërkurën, duke prezantuar fletënotimin e punës së 21 këshilltarëve të Kuvendit Komunal të Sharrit. Sipas koordinatorit të KDI-së në Sharr, Driton Çengaj, vlerësimi është bërë gjatë përcjelljes së punës së këshilltarëve në pesë seanca plenare. "Përmes këtij publikimi ne synojmë t'i informojmë qytetarët në mënyrë objektive mbi punën dhe angazhimet e të zgjedhurve të tyre, si dhe përfaqësimin e interesave të tyre në agjendat institucionale. Ky fletënotim dhe publikimi i tij në kohën e zgjedhjeve, u shërben qytetarëve që të reflektojnë në lidhje me preferencat e tyre votuese, si pasqyrim i punës së zyrtarëve të zgjedhur", tha Çengaj, sipas të cilit komponentët që janë subjekt i "notimit" të këshilltarëve komunalë dhe subjekteve politike, janë pjesëmarrja e tyre në seanca, pjesëmarrja në diskutime, inicimi i çështjeve me interes për qytetarët, propozimi i amendamenteve dhe thirrja në interpelancë.
Në bazë të raportit të KDI-së, në Kuvendin Komunal të Sharrit mesatarja më e lartë në përfshirjen e këshilltarëve në diskutime ka qenë 24 për qind. Nga 21 këshilltarë 14 prej tyre, ose 66.7 për qind, kanë ngritur për diskutim ndonjë çështje me interes të përgjithshëm, kurse vetëm një këshilltar ka bërë një propozim amendamenti.
Sipas KDI-së, gjatë periudhës janar-qershor të këtij viti, nga pesë seancat e monitoruara, nuk është regjistruar asnjë rast interpelance të Ekzekutivit para këshilltarëve, ndërkohë që vetëm dhjetë këshilltarë kanë parashtruar, së paku një pyetje direkte ose me shkrim. Koordinatori Driton Çengaj tha se vlerësimet në fletënotim janë të bazuara në informata publike dhe faktike, të marra nga vëzhgimi i drejtpërdrejtë i seancave të KK-së dhe nga takimet me zyrtarët komunalë. "Vlerësimet janë tejet të sakta dhe kjo do t'u shërbejë votuesve për zgjedhjet e nëntorit. Qytetarët e Sharrit tani kanë një pasqyrë ekzakte për të përzgjedhurit e tyre", tha Çengaj.
Vlen të theksohet se rezultate më të kënaqshme në punën e KK-së, sipas KDI-së, kanë shënuar vetëm shefat e grupeve parlamentare, ose liderët partiakë. /b. beqaj

Mungon opozita, dështon seanca!

2007-10-24T13:55:00.000-07:00

Sharr, 24 tetor 2007 - Ka dështuar të martën mbajtja e seancës së jashtëzakonshme e Kuvendit Komunal të Sharrit, ku duhej të miratohej vendimi për një parcelë në qendër të Sharrit, e cila që nga mbarimi i luftës ka mbetur me ndërtesa të rrënuara. Kjo pikë e rendit të ditës kishte mbetur nga seanca e fundit, kur opozita kishte refuzuar të debatojë rreth kësaj çështjeje, kurse të martën opozitarët nuk u paraqitën fare në mbledhje.
Mitat Fejza, shef i grupit parlamentar të PDK-së, tha se nuk kanë ndërmend të marrin pjesë në një veprim, i cili paraprakisht është ndaluar edhe nga qeveria qendrore. "Kjo pikë është refuzuar edhe në seancën e kaluar, por për arsye të cilat vetëm pushtetarët aktualë i dinë, është futur sërish në rend dite të seancës së jashtëzakonshme. Nuk dëshirojmë të bëhemi pjesëmarrës të një vendimi, i cili bie ndesh me sugjerimet e institucioneve qendrore të vendit", tha Fejza.
Sipas Fejzës, nxitimi për ta marrë një vendim të tillë, me gjasë ka të bëjë me interesa të ngushta të pushtetarëve, për ta shfrytëzuar edhe këtë pak kohë që janë në pushtet. "Është një shkresë që i ka arritur KK-së nga zv.kryeministri Lutfi Haziri, e cila rekomandon që mos të merret asnjë vendim rreth buxhetit, investimeve kapitale dhe rreth patundshmërisë. Nëse e nxjerrim një vendim të tillë, ne bëjmë shkelje drastike. Me këtë vendim, pushtetarëve aktualë u jepet mundësi që ta tjetërsojnë atë pasuri, dhe pastaj do të mund të manipulonin me të. Përkundër shkresës së ministrisë së tyre, ata dëshirojnë të marrin leje që të bëjnë ndonjë biznes, me gjasë për ndërtimin e ndonjë pallati afaristo- banesor", tha Fejza.
Pas këtij dështimi, kryetari i KK-së, Halim Shemsidini, sërish ka paraparë të thërrasë seancën të enjten, deri kur pritet se do të bëhen konsultime dhe sqarime shtesë. /b. beqaj

Krerët e LDD-së në Sharr, të bindur se janë më të mirët

2007-10-19T16:11:00.000-07:00

Sharr, 20 tetor 2007 - Krerët e degës së LDD-së në Sharr, thonë se ndihen më të fortë dhe më të përgatitur se cilido subjekt tjetër politik në komunën e Sharrit. Sipas tyre, me aktivizimin e LDD-së, skena politike në Sharr është bërë më dinamike se kurrë më parë. Duke iu referuar aktivitetit partiak në terren, kryetari i degës, Vahidin Halili, tha se ata e kanë përfunduar fazën e parë të takimeve me elektoratin nëpër nëndegët e partisë dhe se janë bindur që ky subjekt ka një simpati të pëlqyeshme në popullatë. “Kemi vizituar pothuajse të gjitha nëndegët dhe, në bazë të një sondazhi që kemi bërë, vlerësohet se ne mund të presim fitore të sigurt”, tha Halili, duke e bazuar këtë bindje në objektivat dhe platformën partiake që kanë përpiluar më herët, ndërkohë që të mërkurën e kanë harmonizuar platformën partiake në nivel vendi me specifikat që kërkon platforma zgjedhore në komunën e Sharrit. “Në listë kemi kandidatë që gëzojnë respektin nga shumica e popullatës. Ata janë njerëz me autoritet të pakontestueshëm. Ndërkaq, kandidati për postin e kreut të komunës, Vahidin Halili, është personaliteti më i qëlluar që ka mundësi ta votojë elektorati”, ka thënë nënkryetari i LDD-së, Qamil Kolloni, duke shtuar se subjekti i tyre është tejet transparent, ku mund të bisedohet haptazi për të gjitha hallet dhe problemet që ka secili qytetar “Për dallim nga subjektet tjera politike, ne që nga dita e parë i kemi publikuar listat kandiduese. Kjo, sepse nuk jemi frikësuar nga konkurrentët tjerë. Një gjë të tillë kanë hezituar ta bëjnë subjektet tjera politike, sepse kanë pasur mjaft probleme rreth përpilimit të listave, për shkak të interesave të tyre të brendshme, si dhe pamundësisë për të zgjedhur kandidatë me vlera të dëshmuara”, tha Kolloni.
Duke folur për aktivitetin e ardhshëm politik dhe strategjinë që do të përdorët në takim me elektoratin, kryetari i degës, Vahidin Halili, është shprehur se partia e tij do të zbatojë me përpikëri qëndrimet e marra nga organet më të larta vendimmarrëse të partisë, duke u përqendruar në ato ndryshime që mund t’u sjellin qytetarëve jetë më të begatshme dhe dinjitet. “Për një qeverisje më të mirë, qytetarët duhet te kenë besim të plotë në partinë tonë, sepse ne kemi program më të begatshëm për zhvillimin ekonomik të vendit dhe program specifik për zhvillimin e komunës sonë”, tha Halili.
Në kohën kur ka përfunduar faza e parë e aktiviteteve parazgjedhore, në Sharr kanë filluar me të madhe vlerësimet për krerët e subjekteve politike. Sipas atyre që do të garojnë në zgjedhjet e 17 nëntorit, kjo datë do të sjellë ndryshime rrënjësore në këtë komunë të skajshme të Kosovës, e cila ende mbetet ndër më të varfrat dhe e izoluar ndaj shteteve fqinje, edhe pse kufizohet me to. /b. beqaj

AAK-ja në Sharr synon pjesëmarrje në pushtet

2007-10-19T03:48:00.001-07:00

Sharr, 19 tetor 2007 - Dega e AAK-së në Sharr, me modesti do të konkurroj në zgjedhjet e nëntorit, duke mos i ekzagjeruar listat përtej mundësive reale që ka kjo parti. Mahmut Mahmuti, kryetar i këtij subjekti politik në Sharr tha se lista e kandidatëve të mundshëm për Kuvendin Komunal nuk është zgjeruar, sepse janë të vetëdijshëm se nuk mund ta fitojnë pushtetin, por do të mundohen të bëhen pjesë e tij “Lista jonë përmban 14 emra, të cilët i kemi përzgjedhur me kujdes, ndërkaq në garën për Kuvendin e Kosovës do të garoj Blerim Piraj, profesori që në këtë trevë gëzon autoritet. Jemi subjekti i parë politik në Sharr që i kemi dorëzuar para afatit të paraparë listat e anëtarëve të komisioneve votuese, ndonëse nuk kemi qenë të kënaqur me përfshirjen e partive të vogla në këto komisione. Megjithatë, pas ankesës sonë, kjo përfshirje paksa është zgjeruar në të mirë”, tha Mahmuti. Ndërkaq, duke folur për pritjet nga zgjedhjet e nëntorit, Mahmuti ka thënë se synimi i partisë së tij është që të bëhet pjesë e pushtetit lokal, ku aktualisht kanë vetëm një këshilltar. “Jemi mjaft ambicioz, ngase pas kontakteve që kemi pasur me nëndegët, kemi vërejtur një rritje solide të anëtarësisë, andaj shpresojmë se do të jemi pjesë e pushtetit lokal dhe se në Kuvend do të kemi më shumë se një ulëse”, ka prognozuar Mahmuti, duke apostrofuar më pas imazhin e liderit të AAK- së, Ramush Haradinaj, për të cilin thotë se është i pakontestueshëm. “Apelojmë tek qytetarët që të votohet Ramushi, ngase vetëm në këtë mënyrë do të tregojmë solidaritetin tonë ndaj veprës dhe sakrificave të tij dhe familjes Haradinaj”.
Në fund, Mahmuti ka pohuar se emrat që figurojnë në listat kandiduese, si dhe programet konkrete afatgjate të këtij subjekti politik, janë garanci e fortë për ndryshimin e pamjes së kësaj komune të varfër. “Është mëkat i madh që të gjitha këto resurse që i ka treva jonë, të mbeten edhe më tej të pashfrytëzuara”.
AAK në Sharr nuk do të konkurroj për postin e kryetarit të Komunës, por shpreson që pas zgjedhjeve do të jenë më të fortë se deri më tani. /b. beqaj

Kontroll i shtuar - S'ka më ankesa!

2007-10-13T15:15:00.001-07:00

Sharr, tetor 2007 - Një polic kufitar i Shqipërisë vëzhgon me dylbi trevën e Sharrit, gjatë kontrollit të përbashkët që bëhet nga Policia Kufitare e Shqipërisë, SHPK-ja, Policia e UNMIK-ut dhe KFOR-i.
Të gjitha këto forca bashkërisht kontrollojnë këtë kufi, në kuadër të aksionit “Patrulla e sinkronizuar kufitare”. Ky aksion ka rezultuar me ndërprerjen e disa dukurive negative, të cilën e kryenin banorët goranë nga veriu i Shqipërisë tek bashkëkombësit e tyre që jetojnë në komunën e Sharrit. /(foto & teksti: b. beqaj)

Për asfaltimin e dy rrugëve rajonale, Sharri e derdh qesen komunale

2007-10-11T04:11:00.000-07:00

Sharr, 11 tetor 2007 - Ndonëse të gjitha të dhënat kanë treguar se komuna e Sharrit është ndër më të varfrat në vend, ku banorët e saj mbijetojnë falë kurbetçinjve, nga buxheti i KK-së është “ndihmuar” Ministria e Transportit... që të asfaltohen dy rrugë rajonale që përshkojnë rajonin e Gorës, Sharr – Brod dhe Sharr - Restelicë. Kjo ministri ka ndarë një milion euro për këto dy rrugë, por që nuk kanë mjaftuar që të bëhet asfaltimi i plotë i tyre.
Usmen Ballxhi, drejtor komunal për Ekonomi, thotë se komuna vërtetë i ka ndarë njëqind mijë euro për këto rrugë, por që ato janë para të komunitetit nga Gora “Ato para janë nga pjesa e buxhetit komunal që i dedikohet komunitetit tonë, prandaj asgjë të keqe nuk ka që po investojmë në rajonin tonë”, tha Ballxhi, i cili e përkrah asfaltimin e rrugës për në fshatin e tij, Brod.
Rruga tjetër, me gjatësi rreth 25 kilometra, e cila përshkon fshatin e ministrit të Shëndetësisë, Sadik Idrizi, për të përfunduar në fshatin e nënkryetarit komunal, Sabedin Çufta, Restelicë, tashmë është meremetuar dhe një pjesë e saj edhe asfaltuar. Por, për ta përfunduar asfaltimin deri në Sharr, ministri Idrizi ka arritur të siguroj shumën prej rreth 80 mijë eurosh, sipas Ballxhit, ndërsa KK-ja do t’i shtoj edhe njëqind mijë të tjera. Ndarjen e mjeteve nga buxheti komunal e ka kundërshtuar opozita, ku sipas tyre, tatimpaguesit e kësaj komune janë shkelur, sidomos ata nga Opoja. Vahidin Halili, kryetar i degës së LDD-së, i cili është edhe kandidat për kryetar komune nga kjo parti, thotë se popullata ballafaqohet me dy të këqija “Komuna e Sharrit është më e varfra në Kosovë dhe, kur kësaj i shtohet edhe paaftësia e pushtetit lokal për të planifikuar dhe menaxhuar paratë e qytetarëve, atëherë ndodh që i ligu po e ndihmon të fortin. Paratë që nuk ishte në gjendje t’i shfrytëzoj qeveria komunale, janë para të grumbulluara nga tatimi në pronë dhe participimi, para të cilat janë ditur një vit përpara. Kur qeveritarët nuk kanë ditur t’i shfrytëzojnë këto para, atëherë ajo duhet të kërkoj falje nga popullata dhe të largohet nga pushteti”, konstaton Halili.
Edhe Ismet Lecaj, kryetar i degës së AKR-së, i cili gjithashtu kandidon për kryetar të komunës në zgjedhjet e nëntorit, thotë se investimi i parave të popullit në rrugët që janë përgjegjësi e Ministrisë së Transportit, është absurd. “Kjo dëshmon se kemi të bëjmë me njerëz që nuk e dinë se çka është përgjegjësia e tyre dhe obligimi që kanë ndaj qytetarit. Ndihma që i jepet Ministrisë së Transportit nga buxheti komunal, në vend se të ndodhë e kundërta, nënkupton se kemi të bëjmë me një qeveri plotësisht të paaftë për të menaxhuar me paratë e tatimpaguesve”, tha Lecaj, i cili shprehet i bindur se kësaj radhe elektorati do të dijë ta vlerësoj punën e secilit, para se të vendosë për votën që do ta japë. /b. beqaj

Dardanët prezantuan prioritetet për zhvillimin ekonomik të Sharrit

2007-10-09T08:55:00.000-07:00

Sharr, 09 tetor 2007 - Kryesia e Lidhjes Demokratike të Dardanisë në Sharr, e ka përmbyllur planin strategjik për zgjedhjet e nëntorit. Në takimin e mbajtur të dielën, ku ishin të pranishëm edhe anëtarë të Kryesisë Qendrore, u shpalos strategjia me të cilën kjo parti do të konkurroj për ta fituar besimin e qytetarëve për ta drejtuar komunën. Nënkryetari i Degës së LDD-së në Sharr, Qamil Kolloni, tha se partia e tyre ka hartuar një strategji, e cila është e mirë dhe e realizueshme. "Nuk kemi ndërmend që elektoratin ta gënjejmë me premtime që nuk kanë gjasa të realizohen te ne, vetëm për ta joshur elektoratin që të na japë votën. Premtimet tona do të bazohen në strategjinë konkrete, ku përfshihet plani zhvillimor komunal dhe shfrytëzimi i resurseve që ka treva jonë", tha Kolloni.
Me qëllim të hartimit të programit për zhvillimin ekonomik të komunës, në takimin me krerët e LDD-së së Sharrit kanë marrë pjesë edhe ekspertë nga komisioni ekonomik i kësaj partie. Mustafë Pllana, Naser Rugova, Haki Gajraku dhe Sefer Rexhaj kanë diskutuar për prioritetet e kësaj komune. "Oferta programore që kemi hartuar ne është më e mira nga të gjitha ofertat e partive të tjera. Ne jemi përqendruar në sektorin shoqëror dhe privat, me të cilët kemi planifikuar të kemi partneritet. Vetëm partneriteti i shëndoshë me biznesin mund ta çojë përpara zhvillimin e komunës sonë, e cila ende mbetet më e varfra në vend", tha nënkryetari Kolloni.
Përcaktimi i zonave industriale, bujqësore dhe blegtorale, si dhe mbrojtja e tokës pjellore dhe kullotave, janë prioritetet e LDD-së për zhvillimin ekonomik të Sharrit. /b. beqaj

Reagim i Aleancës Kosova e Re ndaj shkrimit “AKR-ja ndihmon familjet e dëshmorëve të Sharrit”

2007-10-08T02:40:00.000-07:00

Prishtinë, 08 tetor 2007 - Kryesia e Aleancës Kosova e Re reagon ndaj shkrimit “AKR-ja ndihmon familjet e dëshmorëve të Sharrit”, në të cilin thuhet se anëtarja e kryesisë së Degës së AKR-së në Sharr, Sadie Xhimshiti, u ka ndarë familjeve të dëshmorëve nga 100 euro në emër të Aleancës Kosova e Re.
Kryesia e AKR-së e demanton këtë artikull, sepse të hollat që u janë ndarë familjeve të dëshmorëve në Sharr janë dhënë si ndihmë nga fondacioni "Behgjet Pacolli".
Fakti se është përmendur kryetari i AKR-së, Behgjet Pacolli, ka bërë që ky donacion të keqkuptohet, duke e ndërlidhur ndihmën për familjet e dëshmorëve me Aleancën Kosova e Re, e cila edhe njëherë sqaron për opinion se të hollat janë dhënë nga fondacioni "Behgjet Pacolli", siç janë dhënë edhe shumë ndihma të tjera. Fondacioni "Behgjet Pacolli" i ka ndihmuar, i ndihmon dhe do të vazhdojë t'i ndihmojë qytetarët e Kosovës në çfarëdo forme që të jetë e mundur, në veçanti familjarët e dëshmorëve dhe invalidët e luftës. /Kryesia e Aleancës Kosova e Re

AKR-ja ndihmonë familjet e dëshmorëve të Sharrit

2007-10-05T05:36:00.000-07:00

Sharr, 05 tetor 2007 - Për gjashtë familjet e dëshmorëve nga Sharri, të enjten kryesia e degës së AKR-së në Sharr ka ndarë nga njëqind euro, si ndihmë për ta kremtuar më mirë festën e Bajramit. Sekretari i degës së kësaj partie, Mujdin Jusufi, tha se kjo ndihmë simbolike vjen direkt nga kreu i AKR-së, Behgjet Pacolli, i cili gjatë vizitës që i bëri kësaj treve të martën, bisedoi edhe me familjarët e dëshmorëve, të cilëve u premtoi përkrahje “Pasi u takua me familjarët e dëshmorëve, kryetari Pacolli ka mësuar se këto familje nuk gëzojnë përkrahjen e merituar nga institucionet, prandaj është zotuar se do t’i mbështesë ata”, tha Jusufi.
Sylejman Sylejmani, babai i dëshmorit Fetah Sylejmani, i tha “Lajmit” se vizitën e Pacollit tek varri i djalit të tij, e konsideron si gjestin më të shtrenjtë që ka bërë ky njeri “Më shumë e kam ndier për nderë, që Pacolli u përkul para varrit të Fatahut dhe shokëve të tij, se sa kjo ndihmë financiare. Por, ky ishte premtimi që na dha të martën, për të na lehtësuar kremtimin e festës së Bajramit”, tha Sylejmani, i cili është njëkohësisht edhe prijësi i Shoqatës së Familjeve të Dëshmorëve në Sharr.
Mendim të njëjtë kishte edhe vëllai i dëshmorit Ylmi Bahtiari, Fadili, i cili u zotua se do të punoj edhe në të ardhmen, që treva e Sharrit të fitoj dinjitetin e humbur për dëshmorët “Ata janë harruar që moti... Askush nuk e vranë mendjen për ta. Pacolli meriton çdo lëvdatë që u kujtua për ne, edhe pse nuk është ndonjë pushtetar”, tha Bahtiari.
Kuvertat me nga njëqind euro, familjarëve ua ndau anëtarja e kryesisë së degës së AKR-së në Sharr, Sadie Xhimshiti, e cila u premtoi atyre se mbështetja e këtij subjekti politik nuk do të ngelet me kaq “Nuk është ky veprim, ku prapa tij fshihet ndonjë interes, por është porosi që na la kryetari Pacolli, që ndaj këtyre familjarëve të kemi përkujdesje më të madhe”, tha Xhimshiti.
Të kënaqur që festa e Bajramit nuk do t’i zër ngushtë, familjarët e dëshmorëve shprehën mirënjohje për Behgjet Pacollin, ndërkohë që ankoheshin për harresën nga institucionet. /b. beqaj

Kreu i AKR-së, Behgjet Pacolli, e vizitoi Sharrin

2007-10-03T14:51:00.000-07:00

Sharr, 04 tetor 2007 - Lideri i Aleancës Kosova e Re, Behgjet Pacolli, gjatë vizitës së tij në Sharr, pasi është njoftuar me hallet e banorëve, e ka kritikuar të martën Ekipin e Unitetit për kryeneçësi. Ai tha se një sjellje e këtillë e këtij ekipi e ka zvarritur edhe procesin e pavarësimit të Kosovës. "Ata nuk e pranojnë asnjë këshillë nga dikush që nuk është pjesë e tyre. Disa herë kam intervenuar dhe kam kërkuar që t'i përfillin sugjerimet e mia, por kjo nuk është bërë", tha Pacolli, duke i treguar dy shembuj: "Rasti i parë ishte kur kryeministri Çeku udhëtoi në Rusi. Unë e luta që të presë nja dy ditë, përderisa ta përgatisja terrenin që atje të pritej me nderimet më të larta shtetërore, por ai nuk pranoi. Prandaj, në Rusi u prit nga disa pijanecë, e jo si kryeministër. Rasti tjetër ishte në New York, kur unë shtrova një koktej të thjeshtë dhe mblodha rreth vetes mbi dhjetë kryetarë e ministra të shteteve me ndikim, para se delegacionet të takoheshin sy më sy, ndërsa Ekipi i Unitetit u takua vetëm me një kryeministër, Sali Berishën, edhe atë pasi përfundoi çdo gjë në takimin e shumëpritur Kosovë-Serbi", sqaroi Pacolli.
Pacolli në Sharr u njoftua me hallet e banorëve, infrastrukturën aktuale dhe atë që ishte para luftës, si dhe me potencialet që ka kjo komunë për zhvillimin ekonomik. Lideri i AKR-së, në mënyrë që, siç është shprehur ai, të pengohet braktisja e vendlindjes nga të rinjtë, tha se nuk është ajo se komuna ka buxhet të vogël dhe nuk mund t'i plotësojë nevojat e qytetarëve për infrastrukturë të mirëfilltë, por, sipas tij, është evidente se kudo punohet pa strategji të shëndoshë dhe pa vullnet të sinqertë. Ai u ka premtuar banorëve të Sharrit se do të merret me zhvillimin ekonomik hap pas hapi, por që këta hapa, sipas tij, do të jenë të qëndrueshëm."Hapi i parë është të studiohen mundësitë dhe potencialet që ofron ky rajon, pastaj vijnë hapat tjerë, siç janë burimet financiare dhe punët me kriter".
Lideri i AKR-së tha se edhe afaristët privatë nuk po veprojnë me strategji, por vetëm po kopjohen mes veti. "Kopjimi i biznesit nuk sjell sukses, sepse ndërtohet në bazë të asaj çka sheh syri dhe ta merr mendja. Analiza e thuktë për fillimin e një biznesi e ka suksesin e garantuar, sepse gjatë analizës krijohet baza e fortë dhe e qëndrueshme".
Kreu i AKR-së, pasi ka vendosur kurora me lule pranë varrezave të dëshmorëve në Sharr, e ka vizituar edhe fshatin Bresanë të Opojës, ku është takuar me qytetarë, për t'i dëgjuar hallet e tyre dhe për ta shpalosur vizionin e tij, si pretendent për ta marrë qeverisjen e vendit. Ai u ka premtuar qytetarëve se, në qeveri apo si individ, do të punojë për Kosovën. "Jo se kam qëllime përfitimi, sepse i kam të gjitha, por kthimi im në Kosovë ka për qëllim shkrirjen e potencialit, të cilin me dekada e kam akumuluar jashtë vendit".
Pacolli tha se investimi i tij kryesor në anën e Sharrit do të realizohet në bujqësi, blegtori dhe turizëm. Pastaj, investimi në grumbullimin dhe përpunimin e bimëve mjekuese, që ka shumë në këto anë. “Të gjitha këto hapin vende pune, me çka rritet edhe ekonomia familjare".
Pyetjes nëse Rusia po vjen duke u forcuar, prandaj edhe po e pengon pavarësinë e Kosovës, lideri i AKR-së iu përgjigj me konstatimin e kundërt. "Rusia gjithnjë e me tepër po vjen duke u dobësuar, nëse shikohet në shtylla të trasha. Zgjedhjet e fundit në Ukrainë, ku populli i këtij vendi votoi për properëndimorët, Rusisë ia thyen një krah. Pikërisht në Ukrainë ishte baza e raketave me rreze të gjata veprimi, me kokën e kthyer kah Evropa. Tani ato koka pritet të kthehen kah Rusia, prandaj ajo mundohet të tregojë fuqi, kur është në pyetje Kosova, jo pse ka interes në Kosovë apo Serbi", tha Pacolli, duke e komentuar edhe arsyen pse punon në këtë vend.
"Atje punoj, ua marr paratë, të cilat vijnë direkt në Kosovë. Nuk ka arsye tjetër pse punoj atje, sepse atje e kam gjetur mundësinë për të punuar. Por, atje nuk bëj investime kapitale". /b. beqaj

LDD-ja në Sharr shtroi darkë pune (iftar)

2007-10-01T07:00:00.000-07:00

Sharr, 01 tetor 2007 - Dega e Lidhjes Demokratike të Dardanisë (LDD) mblodhi në një darkë pune aktivistët e vet për t’i prezantuar zyrtarisht 23 kandidatët e saj për këshilltarë komunal, në garën zgjedhore të nëntorit. Kryetari dhe Kryesia e degës së LDD-ës në Sharr iu premtoi kandidatëve se do ta kenë një përkrahje te fuqishme.
I pari i këtij subjekti në Sharr, Vahidin Halili, i cili do të garoj për postin e kreut komunal, të pranishmëve u shpalosi vizionin partiak dhe planin për garën, të cilën e quajti të fortë “Gara do të jetë e fortë, por ne do të bëhemi pjesë e pushtetit të ardhshëm. Kjo nënkupton se do të sjellim ndryshime dhe jo të vazhdojmë ecurinë e pushtetit aktual, i cili edhe kur bën investime, i bën sa për të kryer punë. Çdo investim tek ne është bërë alla Halimqe”, tha Halili, duke shtuar se është i vetëdijshëm që asnjëra parti nuk do të arrij ta formoj e vetme pushtetin komunal.
I pyetur se me cilën parti do të bënin koalicion, për ta marrë pushtetin, Halili tha se ato janë plane partiake, të cilat do të merren vesh pas zgjedhjeve “Koalicioni bëhet me partitë që kanë afërsi programore me ne. Prandaj, ne do te jemi shumë të kujdesshëm në përzgjedhjen e partnerëve për koalicion, sepse partia jonë ka program shumë ambicioz dhe me data konkrete të realizimit të çdo premtimi. Ne nuk e kemi qëllim parësor pushtetin, por jemi për ndryshime. Me këtë pushtet aktual, nuk shkohet përpara”, tha Halili, duke shtuar se ai personalisht është kandidati më serioz për kryetar komune, ku prapa tij ekziston një kapital solid, e që komuna e Sharrit aktualisht nuk e ka. “Në krye të komunës nuk pretendoj të vij për t'u pasuruar, sikurse paraardhësi im, por për ta implementuar suksesin qe kam treguar si menaxhues në ndërmarrjen tonë dhe në organizatat tjera, ku unë i kam udhëhequr, si në Sindikatën e Pavarur në ‘Ballkanin’ e Therandës, i cili kishte një mijë e 700 punëtorë, LDK-në, kur i kishte 7 mijë anëtar dhe në vende të tjera udhëheqëse.
Bartësi i listës, Qamil Kolloni, u premtoi simpatizantëve se LDD-ja do të korr sukses, sepse në popullatë kanë mjaftë përkrahës “Ekziston disponimi për të ndryshuar strukturën aktuale në pushtet, prandaj edhe do të kemi sukses. Programi jonë është shumë konkret dhe plotësisht i realizueshëm. Atë që e premtojmë edhe do ta realizojmë”, tha Kolloni. /b. beqaj

Vazhdonë tradita !

2007-09-25T15:25:00.000-07:00

Sharr, 26 shtator 2007 - Pasi është dërrmuar gjatë dimrit me kripë dhe verës nga lëvizjet e shumta të automjeteve, një firmë tiranase ka bërë arnimin e magjistrales Zhur – Sharr, por që nuk i ka shmangur telashet e ngasësve të automjeteve.
Këta të fundit thonë se arnimi është kryer sa për të bërë punë dhe për të përfituar nga ky tender, sepse kjo rrugë, sidomos aksi Trokan-Sharr, ka nevojë për meremetim detaj, ngase e tëra është dëmtuar tej mase.
Ndonëse pronarët e automjeteve paguajnë taksën prej 40 eurosh, të përcaktuar nga qeveria, si dhe kohët e fundit edhe taksën komunale prej 10 eurosh, ende nuk e kanë “shijuar” rezultatin e këtij haraçi.
Që nga lufta e fundit, askush nuk e ka pa të arsyeshme aftësimin e dhjetë kilometrave të kësaj magjistraleje, e cila tashme i ngjan një rruge lokale, me plotë gropa dhe shembje, e që edhe arnimet e fundit nuk i kanë mënjanuar ato.
Vitet e fundit, kjo magjistrale gjatë vjeshtës arnohet, dimrit trazohet asfalti nga kripa, ndërsa ngasësit mezi u shmangen gropave gjatë tërë pranverës dhe verës. /foto & teksti: b. beqaj

“Mabetex” punëson edhe sharrjanët

2007-09-24T07:35:00.000-07:00

Sharr, 24 shtator 2007 - Kompania “Mabetex” e ka dërguar grupin e parë prej gjashtë punëtorësh nga Sharri, për punë në Kazakistan. Sipas Mujdin Jusufit, sekretar i degës së Aleancës Kosova e Re (AKR) në Sharr, deri në dhjetor të këtij viti, parashihet që të udhëtojnë edhe punëkërkues të tjerë, nga 40 sa janë paraqitur në konkurs për këtë projekt megaloman. “Grupi i dytë do të nisët shumë shpejtë për në Libi, ku edhe atje kjo kompani ka një punishte të madhe. Punëtorët që kanë mbërritur tashmë në Kazakistan, na kanë telefonuar dhe janë lavdëruar për kushtet e punës dhe të banimit”, tha Jusufi, i cili e arsyeton angazhimin e partisë në punët e kompanisë së Bexhet Pacollit, liderit të AKR-së. “Ne si parti nuk do të angazhoheshim në punët e kompanisë, por mungesa e një përfaqësie të saj në komunën tonë, ka bërë që të interesuarit për konkursin e shpallur kohë më parë, të paraqiten në zyrat tona”, pohon Jusufi.
Ndryshe, sipas Jusufit, dega e AKR-së në Sharr i ka përfunduar me sukses të gjitha përgatitjet për zgjedhjet e nëntorit, ku do të konkurroj në të gjitha nivelet zgjedhore. “Presim sukses në këto zgjedhje, sepse jemi angazhuar që mos t’i lejojmë asnjë hapësirë mangësive dhe manipulimeve. Kemi besim të plotë në personat që i kemi përzgjedhur për të gjitha postet”. /b. beqaj

Qyteza e Sharrit duhet të presë më vonë për investime kapitale

2007-09-08T15:27:00.001-07:00

Sharr, 09 shtator 2007 - Deri në vitin 2010, pos rrethojës së varrezave, edhe pse ende nuk është definuar saktësisht lokacioni, asnjë investim tjetër nuk është paraparë në listën e investimeve kapitale të komunës për qytezën e Sharrit. Banorët e kësaj qyteze të skajshme dhe të izoluar, ballafaqohen me probleme të natyrave të ndryshme.
Sharri ka vetëm një rrugë të vetme që e përshkon për së gjati dhe për së gjeri, e cila gjatë natës më shumë është pa drita se me to, edhe pse është bërë një investim i vogël në elektrifikimin e saj. Qytetarët shfrytëzojnë ujin e pijes mjaftë të ndotur, edhe pse ndërmarrja përkatëse, mundohet ta filtroj me pajisje që ka trashëguar nga ish-sistemet. Për rrugët anësore, askush nuk përkujdeset, sepse qyteza ende nuk ka një plan urbanistik, ku edhe e ngufasin ndërtimet pa leje. Sharri ka zgjidhur vetëm pjesërisht problemin e ujërave të zeza, ndërkohë që ballafaqohet ende me rrënoja dhe moçale anembanë rrugëve anësore, të cilave u mungon infrastruktura, sikurse që mungon edhe infrastruktura sportive dhe ajo rekreative.
Mehmet Spahiu, i cili konsiderohet si kryeplak i qytezës, tha se Sharri është harruar fare nga komuna dhe se investimet po orientohen vetëm nëpër fshatra. “Ndonëse këto fakte janë të njohura dhe të prekshme për çdonjërin që jeton dhe punon në këtë qendër komunale, për çudi, edhe në takimin e fundit publik me qytetarët, zyrtarët komunal, duke shpalosur listën e dhjetëra investimeve që priten të realizohen deri në vitin 2010, si dhe agjendën zhvillimore, ku pritet të investohet për periudhën e ardhshme dy vjeçare, qytezën e Sharrit e kanë përmendur vetëm me një rast, edhe këtë me një shumë simbolike për rregullimin e rrethojës së varrezave, edhe pse shumë pak qytetarë të Sharrit kanë dëgjuar se ku gjendet ky lokacion”, tha Spahiu.
Ndërkaq, qytetarët shprehen se janë të pakënaqur me interesimin që kanë strukturat udhëheqëse komunale për të ndarë mjete nga buxheti vetjak, apo për të thithur investime nga donatorë të ndryshëm apo edhe nga Qeveria qendrore për këtë qytezë. “Nuk është se nuk ka pasur mjete, sepse jam shumë mirë i informuar nga mediat dhe nga vetë udhëheqësit, se investimet që janë bërë deri më tani në këtë komunë e tejkalojnë shifrën mbi 20 milionë. Por, e keqja qëndron në atë se është anashkaluar qendra komunale, ngase investimet kanë shkuar më tepër andej nga është fuqia e votuesve”, thotë qytetari Refki Kolloni.
Megjithatë, fakti që në qytezë janë bërë disa investime, si në shkollën e mesme, Qendrën Kryesore të Mjekësisë Familjare, Qendrën Sociale etj., për të cilat buxhet kanë derdhur shoqatat e huaja humanitare, për disa qytetarë shihen si progres i madh i pushtetarëve. Qytetari, Urim Krasniqi, thotë se pushteti ka punuar shumë, në krahasim me meritat që ka popullata e këtushme. “Bazuar në faktin se qytetarët shumë pak i përgjigjen obligimeve tatimore, pushteti ka investuar më shumë se kaq”, tha Krasniqi, i cili nuk diti të përmend ndonjë investim konkret në qytezë.
Një banor tjetër, pa dashur t’i përmendej emri në gazetë, u shpreh se në qytezë investimet nga buxheti komunal dhe ai qendror, kanë qenë shumë të pakta. “Unë jam i bindur se shumica e zyrtarëve lokalë që hartojnë prioritetet e investimeve kapitale, po të kishin pasur vullnet dhe dëshirë, do të kishin bërë shumë më tepër. Por, si duket, ata janë të preokupuar me lokalitetet e veta. Urdhëroni e vizitoni disa fshatra të Opojës dhe Gorës, nga vijnë zyrtarët komunalë me ndikim në pushtet, lëre që i kanë shtruar me pllaka betoni rrugët kryesore dhe ato anësore, kanë rregulluar ujësjellësit dhe kanalizimet, por ata kërkojnë që komuna t’u paguajë edhe harxhimet e ndriçimit publik”, u shpreh i revoltuar ky qytetar.Kryetari i qytezës së Sharrit, Mehmet Spahiu, thotë se ata që jetojnë në qytezë këto tetë vitet e pasluftës, lirisht mund të konstatojnë se asgjë për t’u theksuar nuk është bërë në këtë vendbanim të vetëm në komunë, ku bashkërisht jetojnë shqiptarët dhe gorano-boshnjakët. “Premtimi për hartimin e planit urbanistik të qytezës, nuk figuron as edhe në letër. Këtu lejohet të punohet, kujt si t’i teket. Për shumicën e qytetarëve nga të dy komunitetet, refreni shumë herë i përsëritur i zyrtarëve lokalë se ‘kemi një buxhet shumë të vogël të komunës, ndërsa kërkesat janë të mëdha, dhe se përkundër dëshirës dhe angazhimit, nuk kemi mundur të bëjmë më tepër’, jo vetëm që është bërë bajat, porse ky refren ka kaluar edhe në neveri”, përfundon Spahiu. /b. beqaj

Dëshmi se të rinjt kanë vullnet për jetë në Kosovë!

2007-09-05T12:00:00.000-07:00

Prizren, 05 shtator 2007 - Njëra nga anëtaret e Qendrës Rinore “Fisnikët” nga Prizreni, shkruan parulla për paqe mbi çarçafin e bardhë, të shtrirë në sheshin “Shatërvan” të Prizrenit, në Ditën e Rinisë.
Kjo organizatë rinore, e përkrahur nga CIMIC-u zviceran, ka organizuar një sërë aktivitetesh për ta shënuar Ditën Ndërkombëtare të Rinisë.
Isuf Halimi, drejtor i kësaj organizate, tha se këtë ditë e shënojnë më të organizuar se kurrë më parë. “Është ky vendi më i përshtatshëm për të bërë apel për paqe dhe për më shumë të drejta për rininë prizrenase”, tha Halimi. /foto & teksti: b. beqaj

“Kuk Commerce” i paraprinë Kosovës në tregun ndërkombëtarë

2007-09-04T12:27:00.000-07:00

Sharr, 04 shtator 2007 - Ndërmarrja private nga Sharri "Kuk Commerce" muajin që lamë pas u bë përfaqësuese e ndërmarrjes gjermane “Bocker” në shtetet e rajonit, përkatësisht në shtetet që janë të përfshira në marrëveshjen e CEFTA-s. Njëkohësisht, kjo ndërmarrje është certifikuar edhe me certifikatën ISO 9001-2000, e cila i mundëson shitjen e prodhimeve metalike edhe në vendet më të zhvilluara të botës.
Naser Arifi, drejtor i kësaj ndërmarrje, ndër më progresivet në vend, thotë se me këtë memorandum atyre u hapen “dyert e hekurta” për depërtimin e veprimtarisë edhe jashtë vendit “Do të fillojmë me prodhimin e disa pjesëve për makineri të rëndë, ndërkohë që do t’i gjejmë mundësitë që pas dy vjetësh të fillojmë edhe me prodhimin e makinave të ndryshme për ndërtimtari", tha Arifi.
Bashkëpunimi me një ndërmarrje gjermane, e cila për gjysmë dekade ka arritur të punësoj rreth 4 mijë punëtorë dhe që është shtrirë edhe në shtetet tjera të zhvilluara, jep shpresë se Kosova do t’i shpërthej barrikadat e ndryshme për shkak të statusit të pazgjidhur. Besim Beqaj, kryetar i Odës Ekonomike të Kosovës (OEK) këtë depërtim të ndërmarrjes nga Sharri e ka quajtur si fillim të thyerjes së akullit që po e ngulfat ekonominë kosovare “Është kjo hera e parë që një ndërmarrje nga Kosova merr të drejtën e përfaqësimit, shitjes dhe servisimit të produkteve të një firme gjermane", tha Beqaj.
Njëri nga tre vëllezërit aksionarë të ndërmarrjes “Kuk-Commerce”, Rexhep Arifi, tha se ndihet krenar që kanë arritur ta sjellin në Kosovë firmën e Robert Bockerit, i cili ka shënuar revolucion ekonomik në vendin e tij “Para gjysmë dekade, familja Bocker kishte filluar me ndërtimin e shkallëve metalike, të cilat shumë shpejtë u bënë më të kërkuarat në Gjermani, sepse Bockerët kishin ditur t’i konstruktojnë për mrekulli. Sot, ata janë prodhuesit më të njohur të vinçave, të cilët ngiten deri në katin e tetëdhjetë”, shpjegon Arifi, familja e të cilit gjithashtu kishte nisur biznesin me prodhimin e rrethojave dhe dyerve metalike.
Vetë Robert Bocker, i cili ka vizituar motelin e kësaj ndërmarrje në Brod të Gorës së Sharrit, ka deklaruar se i është dashur shumë kohë të gjej partner në Kosovë, sepse i ka interesuar tregu këtu “Deri te ky bashkëpunim ka ardhur, pasi tek kjo firmë kemi vërejtur përkushtim të madh dhe seriozitet në punë. Fillimisht kemi bërë studime, nëse kjo ndërmarrje mund të merret me prodhimet që ne i ofrojmë. Pasi jemi siguruar se nuk do të kemi asnjë problem, ne lidhëm kontratën", tha Bocker.
Edhe Rexhep Arifi pohon se deri në këtë sukses është dashur punë natë e ditë “Para tre muajve kemi kontaktuar me këtë firmë, ku kemi arritur pajtimin për bashkëpunim, sepse ata ishin të interesuar që të gjejnë partneritet me ndonjë fabrikë për përpunimin e metaleve në Kosovë. Kjo, sepse ‘Bocker’ është prodhuesi më i madh i pajimeve për ndërtim, pjesën më të madhe të të cilave i eksporton”, thotë Arifi, duke u shprehur mirënjohës ndaj OEK-ut dhe GTZ-së gjermane, të cilat u kanë ndihmuar moralisht që të arrihet ky memorandum bashkëpunimi. Por, Arifi nuk shprehet mirënjohës edhe për institucionet e pushtetit, për të cilat thotë se janë shumë pasive. Ai madje kritikon pushtetin lokal të Sharrit, i cili, sipas tij, jo që nuk u ndihmon atyre, por mundohet edhe t’i pengoj kudo që kanë mundësi “Ministria e Tregtisë dhe Industrisë fare nuk ka qenë në rrjedhë për këtë tentim që bënim ne, por se në ditën e nënshkrimit të memorandumit premtoi se do të na përkrah, ndërsa pushtetarët lokal në Sharr, nuk investojnë andej kah po lulëzon biznesi, por investimet i orientojnë nëpër fshatrat e tyre”, tha Arifi.
Vetë ministri, Bujar Dugolli, në ceremoninë e nënshkrimit të memorandumit, tha se do ta përkrah përherë bashkëpunimin ndërmjet bizneseve vendore me ato ndërkombëtare "Kjo marrëveshje nënkupton se Kosova po përgatitet për tregun ndërkombëtar", ka pohuar Dugolli, pa dhënë ndonjë sinjal të qartë se çfarë do të bëj ministria e tij për t’ua lehtësuar veprimtarinë bizneseve vendore, të cilat ballafaqohen me një sërë vështirësish, sidomos ndërmarrjet prodhuese. /b. beqaj

Edhe kësaj i thonë jetë!

2007-08-30T21:02:00.000-07:00

Shishtavec - 31 gusht 2007 - Kjo grua nga Shishtaveci i rrethit të Kukësit në Shqipëri, në këtë mënyrë e siguron ushqimin për kafshë.
Ajo vetë e ka kositur sanën, vetë e ka ngarkuar kalin dhe vetë e transporton deri në ahur, ku edhe grumbullon rezerva ushqimore për kafshët, të cilat duhet t’i mbijetojnë dimrit të gjatë.
Gratë nga Shqipëria e Veriut njihen si të vyeshme, të cilat i bëjnë edhe punët e shtëpisë, por edhe të fushës. /b. beqaj

Ministri Veliu, ua tërheq vërejtjen mësimdhënësve goranë, të cilët ende punojnë me planprograme të Serbisë

2007-08-24T14:57:00.000-07:00

Sharr, 25 gusht 2007 - Kreu i arsimit kosovar, Agim Veliu, ka paralajmëruar të enjten gjatë një vizite në Komunën e Sharrit se i ka ardhur fundi tolerancës së institucioneve kosovare për mësimdhënësit goranë, të cilët ende punojnë me plan-programet arsimore të Serbisë. Veliu i ka mbledhur të gjithë drejtorët e shkollave të kësaj komune, në sallën e KK-së, për t'ua transmetuar vendosmërinë e Ministrisë së Arsimit, Shkencës dhe Teknologjisë se në vitin e ri shkollor nuk do të tolerohet paralelizmi nëpër shkollat e kësaj komune.
Kreu i Komunës, Halim Shemsidini, ka pranuar se institucionet kanë bërë shumë lëshime, për hir të procesit të statusit të vendit dhe paqes në këtë komunë. "Kemi toleruar së tepërmi, vetëm që mos t'i ngremë tensionet në fazën e procesit të statusit. Kemi toleruar mësimdhënës që të veprojnë edhe pa kontrata të punës, se lëre më të kërkojmë proces mësimor sipas plan-programeve tona. Mirëpo, ata e kanë shfrytëzuar tolerancën tonë dhe janë shndërruar në pykën e Serbisë për të na çarë ne këtu që kemi marrëdhënie të shkëlqyeshme ndërnacionale", tha Shemsidini.
Ministri i Shëndetësisë, Sadik Idrizi, i cili ka arritur që ta normalizojë gjendjen në shkollën e fshatit të tij, Krushevë, tha se u ka ardhur fundi manovrave politike të Serbisë përmes arsimit të nxënësve nga Gora. "Kjo çështje ka arritur deri në bisedimet e Vjenës, ku unë kam arritur ta paraqes gjendjen reale, duke iu kundërvënë delegacionit serb. E kuptojmë se pagat e Serbisë janë tri herë më të larta se pagat tona, por nuk është mirë që këto interesa të disa mësimdhënësve të shkaktojnë konflikt me legjislacionin. Kemi toleruar mjaft, duke shpresuar se Pakoja e Ahtisaarit do të kalojë. Kjo nuk ndodhi, andaj duhet t'i kthehemi ligjit", tha Idrizi, duke kërkuar nga OSBE-ja që të jetë më konstruktive në zgjidhjen e këtij problemi.
Kryetari i Iniciativës Qytetare të Gorës (GIG), Mursel Halili, i revoltuar nga fjalimi i ministrit Idrizi, ka kërkuar që të hapen fakultete në gjuhët e "sllavëve të jugut", para se të kërkohet që goranët të mësojnë me plan-programin kosovar. "Ne jemi ata që e përfaqësojmë minoritetin goran, prandaj merrni parasysh kërkesat tona. Na kuptoni se fëmijët tanë pasi mbarojnë arsimin parauniversitar duhet t'i ruajnë lopët, sepse nuk mund të shkollohen më tej në Kosovë, ndërkohë që dëftesat kosovare nuk na i pranojnë askund në rajon", tha Halili, duke kërkuar që të lejohet vijimi i mësimit për goranët me plan-programet e Serbisë.
I revoltuar nga kjo kërkesë e Halilit, drejtori i shkollës fillore "5 Tetori" nga fshati i ministrit Idrizi, Krushevë, Nasuf Brenolli, tha se problemi është thelluar që kur Serbia kërkoi nga mësimdhënësit goranë që të heqin dorë nga listat e pagave të Kosovës. "Ne u detyruam të shpallim konkurs, por që askush nga këta mësimdhënës nuk u lajmërua. Prandaj nuk kam lejuar që ata të futen në shkollën time. E largova edhe vëllanë tim, i cili nuk kishte konkurruar. Nuk bën që të keqpërdoren nxënësit për interesa të një grupi arsimtarësh, të cilët po paguhen shumëfish më tepër nga Serbia, vetëm që ta mbajnë këtë gjendje", tha Brenolli.
Nënkryetari komunal nga Gora, Sabedin Çufta, u tërhoqi vërejtjen mësimdhënësve të rebeluar, të cilët po përkrahen nga GIG-u, se nuk do të lejohet loja me fëmijët, për interesa personale të tyre. "Shkollat nuk ekzistojnë për mësimdhënësit, por për fëmijët. Pse u konvenon një grupi mësimdhënësish, unë nuk do të lejoj asnjë veprim jashtë konturave ligjore kosovare", tha Çufta, sipas të cilit kjo po e nxit edhe më shumë shpërnguljen e popullatës nga Gora.
Ministri Veliu, pasi i ka dëgjuar të gjitha diskutimet, ka thënë prerazi se këtë vit shkollor ligji do të zbatohet me përpikëri. "Këtë vit, urdhëroj që të shpallet konkursi për pranimin e kuadrove profesionale, të pranohen mësimdhënësit që janë adekuatë për lëmenjtë e caktuar dhe të fillojë mësimi me ligjet në fuqi. Nuk ka më asnjë tolerancë në këtë aspekt, sepse çdo tolerancë po na kthehet bumerang", tha Veliu. Ai e ka porositur drejtorin e Arsimit në Sharr që të përgatitet për fillimin e vitit të ri shkollor, sipas ligjeve kosovare në fuqi. /b. beqaj

Në Opojë zhduket një shtetas i Shqipërisë

2007-08-24T02:22:00.000-07:00

Kuklibeg, 24 gusht 2007 - Një banor nga fshati Kuklibeg i Opojës së Sharrit ka njoftuar policinë se i ka humbur gjyshi i tij, i cili ndodhej mysafir tek ai. Në një komunikatë për media, policia e ka konfirmuar ngjarjen, duke dhënë edhe informacione që do të ndihmonin në gjetjen e tij “Personi i humbur për herë të fundit është parë në fshatin Kuklibeg, më 21 gusht rreth orës 10:00. Ai i kishte deklaruar nipit të tij se po nisej për në shtëpi. Deri në ketë çast ai nuk ka mbërritur në vendbanimin e tij”, thuhet në komunikatë.
Personi i paraqitur si i humbur është shtetas i Shqipërisë. Ai quhet Sefudin Tërqilla, është nga fshati Novosejë, komuna e Shishtavecit, rrethi i Kukësit. Ai është i moshuar dhe me të meta psikike, i gjatë rreth 160 centimetra, i dobët me shëndet dhe ka flokë të zinj e të shkurtër. Burime nga Shishtaveci i Shqipërisë bëjnë me dije se plaku ende nuk është gjetur dhe se kërkimet po i bëjnë edhe familjarët e tij. /b. beqaj

Synetomania e KFOR-it turk

2007-08-23T13:59:00.000-07:00

Sharr, 23 gusht 2007 - Pjesëtarët e ushtrisë turke të KFOR-it, tash e disa vjet po i ndihmojnë familjet e komunës së Sharrit në synetllëkun e vogëlushëve të tyre.
Të shtunën ata i stacionuan mjekët ambulantë nga baza e tyre në Prizren, në Qendrën Kryesore të Mjekësisë Familjare në Sharr, për t’i bërë synet rreth dyzet vogëlushë opojanë dhe goranë.
Oficeri, Akgou, tha se në regjistër ka evidentuar 35 vogëlushë për synetllëkun e këtij viti, por që lista gjithnjë e më tepër po shtohet “Me kërkesën e prindërve, ne kemi regjistruar deri më tani 35 vogëlushë, por që interesimi po vjen gjithnjë duke u shtuar. Nuk do ta refuzojmë askënd, përderisa koha do të na mjaftojë”, tha Akgou.
Mujadin Gashi, babai i njërit nga fëmijët që ishte i shtruar në tavolinën e operacionit, tha se kjo formë e synetllëkut është shumë më e sigurt se ajo që bëhej dikur me berberë “Është ky një aksion i mirë humanitar që po bëjnë ushtarët turq, sepse në duart e tyre ky rit është më i sigurt. Ata kanë traditë të lashtë në këtë punë dhe janë mjekët specialistë që po intervenojnë. Ne na mbetët vetëm t’i falënderojmë për këtë lehtësim që po na mundësojnë, sepse në këto anë për synetllëk shpenzohen shumë para, sikur në dasmë”, tha Gashi, i cili në familjen e tij kishte përgatitur një ceremoni modeste.
Forcat turke të KFOR-it kanë ndihmuar popullatën e këtushme edhe në përmirësimin e infrastrukturës së shkatërruar rrugore, si dhe kanë dhënë ndihma të konsiderueshme në forma të ndryshme. Kjo ka bërë që baza e ushtrisë turke në Sharr të mos i ngjasoj një baze ushtarake, por të ketë pamje të një institucioni të rendomë, falë qetësisë që po mbretëron në këtë komunë të banuar nga dy komunitetet, shqiptare dhe boshnjake, dhe miqësisë së krijuar midis popullatës dhe ushtarakëve. /b. beqaj

Gjendje e qetë në kufirin Kosovë-Shqipëri

2007-08-21T03:04:00.000-07:00

Sharr, 21 gusht 2007 - Me një shtrëngim miqësor duarsh, në vijën e gjelbër të brezit kufitar Kosovë-Shqipëri, pas tre muajsh, që kur filloi aksioni i quajtur “Patrulla e sinkronizuar kufitare”, takohen sërish krerët e dy policive, andej e këndej kufirit. Bashkë me policinë kosovare gjendeshin edhe policia e UNMIK-ut dhe pjesëtarët e KFOR-it, të cilat e përbëjnë bashkërisht forcën kosovare të sigurisë.
Majori i ushtrisë turke, Vedat Yumsak, i cili ka pozitën e shefit për informim në Brigadën Shumëkombëshe të KFOR-t për sektorin e jugut, me të arritur në vijën kufitare, shpalos agjendën e aksionit të së enjtes që kishin organizuar forcat e rendit nga Kosova dhe Shqipëria.
Bashkërisht fillon patrulla e brezit kufitar për disa kilometra, derisa arrihet në trekëndëshin kufitar Kosovë-Shqipëri-Maqedoni. Nga një lartësi mbidetare mbi dy mijë metra, nga njëra anë shihej Restelica e Gorës së Sharrit, ndërkohë që nga ana e Shqipërisë duken disa fshatra të vegjël, ku qartë shihej varfëria që ngërthenin në vete banorët e kësaj ane. “Jemi krenarë që takohemi bashkë me kolegët tanë nga Shqipëria, me të cilët kemi bashkëpunim të mirë në kryerjen e detyrave që parasheh ky aksion”, tha majori turk, Yumsak, derisa i shtrëngonte dorën shefit të komisariatit të policisë kufitare nga Kukësi, Muharrem Furrikut. Ky i fundit u raportoi kolegëve nga ana kosovare se gjatë këtyre muajve, sa po vazhdon ky aksion, asnjë incident nuk ka ndodhur në këtë kufi. “Mund të mburremi me rezultatet e këtij aksioni, të cilat janë të shkëlqyeshme. Ndonëse ka kalime ilegale, megjithatë, që të gjitha janë për arsye sociale dhe jo për ndonjë kontrabandim apo kriminalitet. Ju e shihni se të gjithë e punojnë tokën me kafshë, prandaj që të gjithë e zgjedhin relacionin më të shkurtë drejtë tokave të tyre”, u tha kolegëve Furriku, i cili shpalosi një pjesë të historisë së vonë, ku sipas tij, rrallë popull do t’i rezistonte “Vetëm gjatë periudhës tetëvjeçare (1990-1998), ushtria kufitare serbe ka vrarë mbi dyzet shtetas tanë, vetëm pse iu afronin kufirit. E sot, ne flasim për kalim ilegal të ndonjë kali apo lope”, tha Furriku, i cili këtë ndryshim e quan sukses për popujt nga dy anët e kufirit.
Pothuajse çdo bujk i Shqipërisë afrohej pranë forcave të rendit dhe iu raportonte për gjendjen në këtë zonë kufitare. Njëri prej tyre kishte ngritur një objekt hotelier të improvizuar, ku shërbente mish qengji të pjekur në saç dhe pije të ftohta freskuese, të cilat i ftohte me frigoriferin që e furnizonte me energji përmes një gjeneratori. Pronari i këtij biznesi, Asllan Beqaj, u thoshte policëve se është nga fshati Shishtavec, por që këtu e kalon pjesën më të madhe të kohës. “Më shumë rri këtu se sa në fshat... Kam mjaftë adhurues të natyrës dhe ushqimit të përgatitur me kushte natyrale”, tha Beqaj, duke i ftuar pjesëtarët e forcave të sigurisë që të shërbehen me specialitete e tij.
Pjesëtarët e policisë së UNMIK-ut dhe KFOR-it, vetëm se vëzhgonin me kënaqësi takimin midis dy “policive shqiptare”, me kalimtarët e rastit, ku mësonin për gjendjen në terren.
Pas disa orësh, në një vend renditen krerët nga secila forcë e sigurisë dhe raportojnë për aksionin që kishte përfunduar. Të gjithë njëzëri sjellin raporte të mira se brezi kufitar midis Kosovës (territori i Sharrit) dhe Shqipërisë, është më së i qetë dhe pa ndonjë shkelje që do të qonte peshë. Ata kthehen nëpër bazat e tyre, duke u përshëndetur miqësisht dhe duke kërkuar që secili ta kryej detyrën e tij me kujdes, sepse e keqja një herë ndodhë. /b. beqaj

Ftini, enë që nuk e njohin gjeneratat e reja !

2007-08-18T16:51:00.000-07:00

Sharr, 19 gusht 2007 - Kjo enë druri, e gjatë dhe e ngushtë, me fund pak më të gjerë se gryka, nga popullata e Sharrit quhet Fti. Në të, me një shkop të gjatë prej druri, që ka edhe një rrotëz në fund, rrihet kosi për të nxjerrë gjalpin.
Ena është ekspozuar nga pronarët e ndërmarrjes "Kuk -Comerc", në kopshtin e restorantit të tyre, në bjeshkët e larta të fshatit Brod, në Gorë të Sharrit. Restoranti është objekti i parë hotelier që është ndërtuar në këtë fshat turistik. Ftini, që dikur gjendej në çdo amvisëri opojane, ka kohë që është harruar dhe tashmë trajtohet si relikt autokton i kësaj treve. /b. beqaj

Edhe lypësit në hall !

2007-08-15T05:55:00.000-07:00

Sharr, 15 gusht 2007 - Këtij çuni nuk do t’i mjaftojnë 10 centë për të blerë një bukë, aq sa kërkon përmes kësaj pankarte që mban në dorë. Atij i duhet trefishi i shumës së kërkuar, pasi buka u shtrenjtua gati në tërë vendin. Të mërkurën edhe qytetarët e Sharrit kanë paguar 35 centë për një bukë.
Në një mbledhje jozyrtare që kanë mbajtur furrtarët e kësaj komune pasditen e së martës, mëngjesi i së mërkurës ka rezultuar me shtrenjtimin e bukës në tërë territorin e komunës. Pa dashur të prezantohet, një furrtar nga kjo komunë tha se faji nuk qëndron tek ata, por tek njerëzit e pushtetit “Ne nuk mund te gatuajmë për hajrat. Mielli ka fluturuar, ndërkohë që qeveria jonë as që interesohet. E si ta mbajmë këtë çmim, ndonëse e shtymë deri më sot disi me të vjetrën, duke menduar se do të përmirësohet kjo gjendje”, tha ky furrtar. /b. beqaj

Goranët ia thyejnë dhëmbin policit

2007-08-15T02:41:00.000-07:00

Kukajan, 15 gusht 2007 - Policia shkon për t'i dhënë fund një rrahjeje masive ndërmjet dasmorëve dhe mysafirëve të paftuar, por sulmohet dhe njërit prej tyre i thyhet dhëmbi. Ngjarja ka ndodhur rreth mesnatës, midis të shtunës dhe të dielës, në fshatin Kukajan të Gorës së Sharrit. Në rrahjen masive ishin përfshirë disa të rinj nga ky fshat dhe të rinj mysafirë nga fshati Plavë e Opojës.
Pas thellimit të zënkës, në vendin e ngjarjes ka mbërritur policia, me ç'rast njëri nga ta është sulmuar fizikisht, ku edhe e humb një dhëmb. Policia Rajonale në Prizren e ka konfirmuar ngjarjen, duke njoftuar se disa të rinj janë arrestuar. "Pasi është njoftuar policia se në një dasmë në fshatin Kukajan kishte filluar zënka midis të rinjve nga ky fshat dhe disa të tjerëve që kishin ardhur nga fshati Plavë, kemi arritur në vendngjarje. Gjatë përpjekjeve për qetësimin e situatës, një polic është grushtuar nga njëri prej të pranishmëve, ku ka marrë lëndime serioze në fytyrë dhe ka humbur një dhëmb. Pasi i dyshimti ishte njëri nga dasmorët, policia me mjaft vështirësi ka arritur ta arrestojë atë, ngase turma e njerëzve të revoltuar kishte bllokuar rrugën", njoftoi policia përmes një kumtese. Ndërkaq, policia ka arrestuar edhe një tjetër person, i cili ishte i përfshirë në rrahje. Këta të arrestuar ende po mbahen në paraburgim.
Mësohet se të rinjtë nga fshati Plavë nuk kanë qenë të ftuar në këtë ceremoni familjare, por muzika i kishte joshur që të marrin pjesë aty. Sipas burimeve tona, të rinjtë nga Opoja rregullisht përcjellin pjesën e dasmave gorane, e cila njihet si "Mashalla" dhe zhvillohet në mesnatë. Gjatë këtij rituali, shumë të rinj dhe të reja vallëzojnë deri në orët e hershme të mëngjesit. /b. beqaj

Varroset kufoma e gjetur dy vjet më parë!

2007-08-11T12:55:00.000-07:00

Zgatar, 11 gusht 2007 - Mbetjet mortore të Xhelal Beshirit (1944), janë varrosur të premten në fshatin e tij, Zgatar, në Opojë të Sharrit, pas dy vjetësh që kur ai u gjet në një shpellë të këtij fshati, e cila ende paraqet rrezik për kalimtarët e rastit.
Policia kishte deklaruar atëkohë se kufomën, në fazën e shkatërrimit, e kanë gjetur një grup bjeshkatarësh dhe se ajo nuk mund të ishte më e vjetër se dy vjet. Ndërkaq, Zyra për Informim e KFOR-it në Prizren, kishte konfirmuar se kufoma ishte e gjinisë mashkullore.
Të gjitha të dhënat qonin në dyshimin se po ky person i zhdukur, duhet të ishte gjetur në thellësinë e shpellës, por mjekëve u janë dashur dy vjet që ta vërtetojnë këtë.
Hetimet në lidhje me këtë rast i ka filluar SHPK-ja, por më pas i kanë vazhduar hetuesit e krimeve të luftës në Prishtinë.Në mes të fshatit Brrut dhe Zgatar, në trevën e Opojës së Sharrit, me shekuj ekziston një shpellë vertikale, për të cilën ekzistojnë edhe mite të ndryshme.
Por, deri më sot, ajo edhe pse ka gëlltitur jeta njerëzish, askush nuk e ka parë të arsyeshme ta bëj rrethimin e saj dhe të vendosë tabela paralajmëruese, se aty shumë lehtë mund të takosh vdekjen.
Drejtori i Drejtorisë komunale të Sharrit për Siguri Civile dhe Gatishmëri Emergjente, Zeni Krasniqi, pat deklaruar dy vjet më parë se do ta bëjnë rrethimin e kësaj shpelle. “Po bëjmë përpjekje që ta rrethojmë këtë shpellë, në mënyrë që të evitohet rreziku për qytetarët. Gjetja e një kufome në këtë shpellë, na obligon që të punojmë edhe më tepër në këtë drejtim”, pat deklaruar Krasniqi. Por, edhe pas dy vjetësh, asgjë nuk është bërë në këtë drejtim. /b. beqaj

Në Sharr nuk dinë se çfarë programi ofron rrjeti tokësor i RTK-së

2007-08-09T04:13:00.001-07:00

Sharr, 09 gusht 2007 - Parapagimi i RTK-së, ndërkohë që ky televizion nuk e mbulon me sinjal komunën e Sharrit, nga banorët e kësaj ane cilësohet si plaçkitje e lejuar edhe nga shteti. Ata i janë gëzuar ndërprerjes së kontratës që ka paralajmëruar ta bëj KEK-u me këtë televizion, për vjeljen e taksës përmes faturave të rrymës.
Nga ana tjetër, ka disa muaj që një firmë private e ka instaluar rrjetin kabllor televiziv në Sharr, me një pagesë prej pesë eurosh në muaj e të cilin e kanë instaluar nëpër familje një numër i madh i tyre.
Profesori i gjuhës në shkollën e mesme “Ruzhdi Berisha” në Sharr, Selim Kryeziu, i tha gazetës se, edhe po ta mbulonte RTK-ja me sinjal këtë trevë, nuk e meriton të paguhet si televizion nacional. “Ka shumë arsye që RTK-ja nuk e meriton të jetë televizion nacional. Ky televizion, i cili rrjep popullatën me nga 3.5 euro në muaj për çdo njehsor, nuk ofron asgjë kualitative. Në të mungojnë programet edukativo-arsimore... Mungon profesionalizmi për të qenë TV nacionale. Së fundi, me këtë shumë të parapagimit, RTK-ja duhet të ketë, së paku tri kanale televizive”, tha Kryeziu, i cili RTK-në e përcjell përmes sistemit kabllor.
Afaristi goran, Ramadan Tonga, thotë se familja e tij ka tre njehsorë elektrik, për të cilët paguan 10.5 euro në muaj. ”Kjo nuk është e drejtë, sepse unë paguaj rrjetin kabllor pesë euro në muaj dhe aty kam dyzet kanale televizive, përfshirë edhe RTK-në. Fundja, sikur të kishte sinjal, disi do ta arsyetoja këtë pagesë”, thotë Tonga.
Afaristi tjetër, Dalip Çengaj, habitet që paguan dy herë nga 3.5 euro, ndërkohë që RTK-në e përcjell vetëm në programin satelitor. “Absurd është të paguaj dy herë këtë haraç, vetëm pse kam dy njehsorë elektrik. Në familje kam rrjetin kabllor, ku aty kam shumë televizione dhe fare nuk e di se çfarë ofron RTK-ja në rrjetin tokësor. Ndërkohë, RTK-në e paguaj edhe për shkak se kam njehsor elektrik në zdrukthëtari ”, tha Çengaj.
Në një debat të mëhershëm, opozita e ka fajësuar edhe pushtetin lokal, i cili, sipas tyre, nuk po bën trysni mbi këtë televizion. Qamil Kolloni, nënkryetar i LDD-së në Sharr pat deklaruar më herët se barrën kryesore e mban pushteti lokal, i cili, sipas tij, me pasivitet e lejon RTK-në që ta plaçkit popullin e kësaj ane. “E kuptojmë se reliefi i kësaj komune është i vështirë për t’u mbuluar me sinjal, por pushteti lokal duhet te bëj më shumë trysni tek organet përkatëse”, ka thënë Kolloni.
Edhe sekretari i PDK-së në Sharr, Avni Nebiu, ka deklaruar se KK-ja me qëllime të caktuara e hesht këtë padrejtësi ndaj qytetarëve. “Pushtetarët e heshtin këtë çështje, sepse i kanë qëllimet e veta. Atyre u konvenon që popullata të jetë e painformuar”, ka thënë Nebiu.
Nga burimet jozyrtare të Njësisë së KEK-ut në Sharr, mësohet se shuma e paguar nga qytetarët e kësaj komune të varfër për RTK-në, deri më tani ka arritur mbi një milion euro. /b. beqaj

Goranët nënshkruajnë peticion kundër pavarësisë së Kosovës?

2007-08-08T05:15:00.001-07:00

Sharr, 08 gusht 2007 - Pakkush e kishte marrë seriozisht iniciativën që plasoi në përvjetorin e Betejës së Kosovës, në qershor të këtij viti, anëtari i Ekipit Negociator serb për bisedimet rreth statusit të Kosovës, Marko Jakshiq, se nga kjo ditë do të nisë mbledhja e peticioneve për ta parandaluar pavarësimin e Kosovës. Jakshiqi, i cili është edhe deputet në Kuvendin e Serbisë nga partia e kryeministrit serb, Vojislav Koshtunica, kishte paralajmëruar se peticionin do ta nënshkruanin edhe disa mijëra banorë të Gorës së Sharrit, dhe se kjo shifër do të kalojë mbi dhjetë mijë.
Megjithëse shifrat janë shumë të fryra për qëllime marketingu, ka informacione se iniciativës së tij vërtet i është përgjigjur një numër i konsiderueshëm i goranëve në komunën e Sharrit, kryesisht punonjës në sektorin e shëndetësisë dhe të arsimit, të cilët marrin paga edhe nga Beogradi. Nënkryetari i Kuvendit Komunal në Sharr, nga radhët e goranëve, Sabedin Çufta, tha se ka dëgjuar për këtë aksion, të cilin e quan keqdashës. "Kushdo që e ka organizuar në trevën tonë, duhet ta dijë se është veprim vetëvrasës, sepse ne jemi komunitet i vogël dhe pa ndikim në këtë çështje madhore. Ne angazhohemi që popullatën tonë ta orientojmë në binarët e bashkëjetesës me popullin shumicë, sepse fati i tij do të na përcjellë edhe ne të vegjlit. Çfarëdo që të bëhet për shqiptarët, do të bëhet edhe për ne", thotë Çufta, duke shprehur frikën se një aksion i tillë do të sjellë përkeqësimin e marrëdhënieve ndërmjet dy komuniteteve në komunë e që për pasojë do të ketë shpërnguljen e kësaj popullate të vogël gorane. "Nëse statusi i Kosovës do të ishte i kënaqshëm vetëm për goranët dhe jo për shumicën, atëherë ne nuk do të kemi vend këtu", thotë nënkryetari i KK-së, Çufta, i cili po këtë pozitë e ka edhe në partinë "Vatan" të ministrit të Shëndetësisë, Sadik Idrizi.
Drejtori i Zyrës së komuniteteve në Sharr, Mehmed Hamza, tërë fajin ia hedh partisë rivale të "Vatanit", e cila, sipas tij, i mbron interesat serbe. "Krejt këtë marifet e bën GIG-u, i cili gjithnjë e orienton komunitetin tonë kah Serbia. Ne nga kjo zyrë i ndihmojmë popullatës sonë që të ketë jetë më të mirë, por gjithnjë duke e respektuar legjislacionin e vendit ku jetojmë. Për institucionin tonë, këto veprime janë paralele", tha Hamza. Por, në zyrën e Iniciativës Qytetare të Gorës (GIG) e mohojnë se kjo parti ka lidhje me peticionin. Nënkryetari Deir Jilmazi tha se komuniteti nga Gora është "peshk i vogël" që të merret me gjëra të mëdha. "Ne jemi të vetëdijshëm se krejt ky pluhur është ngritur nga shqiptarët dhe serbët dhe se bashkësia ndërkombëtare po merret vetëm me këta dy popuj. Si dëshmi kemi edhe pakon e Ahtisaarit, ku asnjë pasus nuk u është kushtuar komuniteteve të vogla, pos komunitetit serb. Prandaj, ne si parti angazhohemi për mirëqenien e komunitetit tonë dhe jo për çështje të statusit", tha Jilmazi. Ai pranon se një numër goranësh e ka nënshkruar peticionin kundër pavarësisë së Kosovës, por i quan tepër të fryra shifrat prej 10 mijë nënshkrimesh që i kanë dhënë disa media serbe, duke u mbështetur në të dhënat e ofruara nga e ashtuquajtura Qendër Koordinuese Serbe për Kosovën.
Kreu i PDK-së në Sharr, Salim Jonuzi, nuk beson se kjo iniciativë e gorano-boshnjakëve mund të ndikojë ndopak në statusin e Kosovës, për të cilin është i bindur se do të rezultojë me pavarësi. "Ne jemi të bindur se do ta kemi më në fund pavarësinë, por veprimi i gorano-boshnjakëve tregon se deri në ç'masë angazhohen krerët e këtij komuniteti për t'i mbrojtur interesat e Serbisë edhe aty ku nuk ka serbë fare", tha ai. Jonuzi e fajësoi edhe pushtetin lokal që nuk po angazhohet sa duhet për ta informuar këtë popullatë për ngjarjet reale. "Pushtetarët komunalë më shumë duhet të merren me këtë popullatë. Duhet t'i informojnë ata se pavarësia e Kosovës nuk është kiamet për ta, por se do t'i kenë të drejtat e tyre në nivelin më të lartë të demokracisë. Këto janë rezultatet e tolerancës së tepërt që u kanë bërë goranëve, sidomos në fushën e arsimit, ku edhe më tej mësohet me plan-programe të Serbisë", shprehet Jonuzi.
Mediat serbe trumbetojnë se mbi dhjetë mijë goranë, tashmë kanë nënshkruar peticionin kundër pavarësisë së Kosovës. Sipas këtyre mediave, deri në vitin 1999 në Gorë kanë jetuar mbi 24 mijë banorë, ndërkohë që pas luftës kanë mbetur afro shtatë mijë.
Nga ana tjetër, këto ditë vere Gora është stërmbushur me njerëz, të cilët nga kurbeti kanë ardhur në vendlindje për pushime, e që e shfrytëzojnë edhe për ceremoni familjare.
Pothuajse çdo mbrëmje Sharri gumëzhin deri në orët e hershme të mëngjesit nga muzika serbe LIVE, por deri më tash nuk është shënuar asnjë ekses. /b. beqaj

Fëmijët bonjakë nga Sharri e Malisheva përfunduan kampingun humanitar

2007-08-07T06:36:00.000-07:00

Sharr, 07 gusht 2007 - Kryqi i Kuq nga Sharri, i përkrahur edhe nga TMK-ja dhe ushtarët gjerman të CIMIC-ut, përfunduan të dielën kampingun në bjeshkët e Brodit të Gorës së Sharrit, që kanë organizuar për fëmijët bonjakë.Sekretari i Kryqit të Kuq në Sharr, Jeton Ramadani, tha se këtë aksion humanitar e kanë shndërruar në traditë dhe se kanë pretendime ta zgjerojnë në nivel rajoni “Për dallim nga vitet e kaluara, kur kemi dërguar vetëm fëmijë nga komuna jonë, këtë vit kishim edhe bonjakët nga Malisheva. Shpresojmë që vitet e ardhshme t’i përfshijmë të gjitha komunat e rajonit të Prizrenit”, tha Ramadani. Ndërkaq, oficeri për mardhënje me media nga Zona e Dytë Mbrojtëse e TMK-së në Prizren, kapiteni Besim Krasniqi, tha se ushtarët e tyre gjithnjë e kanë përkrahur këtë aksion dhe se do ta bëjnë këtë edhe në të ardhmën ”Ne mbështetëm këtë aksion, në ngritjen e Kampit për fëmijët e dëshmorëve, bonjakët dhe fëmijë të tjerë nga familjet e varfra, sepse është një veprim i qëlluar që ka ndërmarrë Kryqi i Kuq nga Sharri. Gjatë gjithë kohës, ushtarakët tanë nga Brigada 324 ‘Sali Saramati’, kanë qëndruar me fëmijët, duke i stërvitur ata për gjeturinë në natyrë. Krejt këto stërvitje i kemi bërë përmes lojërave dhe argëtimit”, tha Krasniqi.Fëmijët në kamp i kanë vizituar edhe krerët e Brigadës Shumëkombëshe të KFOR-it nga Prizreni dhe ata nga Zona e Dytë Mbrojtëse e TMK-së. Komandanti i kësaj zone, kolonel Enver Cikaqi, pasi është njohur me ndjenjat e fëmijëve në këtë kamping, është shprehur se këtë aksion ia vlen ta përkrahë çdo institucion “Përfaqësuesit e Kryqit të Kuq në Sharr meritojnë lëvdata për organizimin e këtij kampi, të cilin duhet ta përkrahin të gjithë. Ju siguroj se Zona e Dytë Mbrojtëse do të mbështesë projekte të tilla edhe në të ardhmen, me qëllim që të jetë sa më afër qytetareve nga të gjitha shtresat”, tha Cikaqi.Sekretari i Kryqit të Kuq Komunal, Jeton Ramadani, është ankuar se pushtetarët komunalë nuk e kanë mbështetur këtë aksion. Ai tha se komuna nuk ia ka lejuar autobusin e tyre që të bëjnë transportin e fëmijëve “Pushtetarët komunalë nuk na kanë lejuar autobusin e tyre që t’i bartim këta fëmijë, gjë që për ne ishte veprim i papritur. Në çastin e fundit kemi kërkuar ndihmën e ushtarëve turq të KFOR-it që të na bëjnë transportin, gjë që pa asnjë kundërshtim ata na kryen këtë shërbim”, tha Ramadani.Drejtori komunal për Administratë të Përgjithshme dhe Pushtet Lokal, Hilmi Dauti, tha se në zyrën e tij nuk ka pranuar asnjë kërkesë për autobusin e KK-së “Ai nuk ka kërkuar nga ne autobusin, por me një shkresë i është drejtuar Qeverisë lokale, ku ka kërkuar mjete financiare në vlerë prej 350 eurosh, për t’i mbuluar shpenzimet e udhëtimit. Pasi e ka shqyrtuar qeveria kërkesën e tij, në mungesë mjetesh, i është përgjigjur negativisht”, tha Dauti.Megjithatë, Ramadani ia ka dhënë “Pasqyrës së Sharrit” në shikim shkresën, ku qartë shihet se, përpos shumës së cekur nga drejtori Dauti, ai ka kërkuar edhe transportin e fëmijëve. /b. beqaj

Në Sharr u hap Qendra për Regjistrimin e Automjeteve

2007-08-01T09:52:00.000-07:00

Sharr - Përfaqësuesit e Ministrisë së Punëve të Brendshme dhe udhëheqësit komunal të Sharrit, në një ceremoni rasti, të martën përuruan Qendrën për Regjistrimin e Automjeteve, e cila është një shërbimi i rikthyer, që kur u ndërpre gjatë luftës së fundit në vendin tonë. Halil Bllaca, sekretar permanent pranë Ministrisë së Punëve të Brendshme tha se, me hapjen e kësaj qendre, qytetarëve të kësaj komune do t’u krijohet një lehtësi e madhe “Atyre u janë krijuar lehtësira në procedurën e regjistrimit të automjeteve, për të cilën gjë deri më tani kanë qenë të detyruar të udhëtojnë në Prizren, duke krijuar harxhime shtesë”, tha Bllaca, duke shtuar se buxheti komunal nuk do të përfitoj asnjë metelik nga taksa e rrugëve “Kuvendi komunal ka të drejtën që të aplikoj taksë shtesë për nevojat e veta. Taksa prej dyzet euro mbetet në buxhetin qendror”, tha Bllaca.
Kryetari i KK-së, Halim Shemsidini, pasi ka falënderuar përfaqësuesit e ministrisë, deklaroi se hapja e kësaj qendre, ka dobi të madhe në çdo aspekt “Jo vetëm që qytetarëve u është ofruar ky shërbim më afër, por ka krijuar edhe vende pune. Qytetarët e Opojës dhe Gorës, deri më tani kanë qenë të detyruar të udhëtojnë mbi njëqind kilometra, për t’i kryer këto shërbime”, tha Shemsidini.Sekretari i PDK-së në Sharr, Avni Nebiu, i tha "Pasqyrës së Sharrit" se me hapjen e kësaj qendre, Shemsidini nuk ka bërë ndonjë punë të madhe, pos se vetëm e ka forcuar biznesin e tij privat "Me hapjen e kësaj qendre, Shemsidini ka arritur ta kompletoj biznesin e tij privat, që e ka filluar gjatë mandatit të vet si kryetar. Kur kihet parasysh se ai ka hapur Qendrën për Kontrollin Teknik të Automjeteve në pronësi private dhe, menjëherë pas saj, edhe aplikimin e taksës komunale prej dhjetë eurosh, atëherë është e qartë se cili ka qenë qëllimi dhe kush përfiton më shumë nga kjo”, tha Nebiu.
Zyrtarët e kësaj qendre, pohuan se nga e mërkura qytetarët e komunës së Sharrit, mund t’i drejtohen këtyre zyrave, por se janë të obliguar që të paguajnë taksat e parapara me ligj. /b. beqaj

Nga të shtënat në aheng plagosen dy fëmijë

2007-07-31T06:24:00.000-07:00

Kapre - Dy fëmijë janë plagosur rëndë në fshatin Kapre të Opojës së Sharrit, të hënën rreth mesditës. Incidenti ka ndodhur gjatë një ahengu familjarë në këtë fshat, kur një qytetar ka shkrepur disa plumba në ajër nga pistoleta, e cila më pas i bllokohet. Në tentim për ta zhbllokuar pistoletën, ai e tërheq këmbëzën dhe plumbi godet dy fëmijë.
Policia Rajonale në Prizren e ka konfirmuar lajmin, ndërkohë që përmes një komunikate ka njoftuar se autori i kësaj plagosjeje është arrestuar “Gjatë shkrepjes, pistoleta është bllokuar dhe një plumb ka mbetur në tytë. Në tentim për ta zhbllokuar, i dyshuari aksidentalisht ka tërhequr këmbëzën e pistoletës, me ç’rast një plumb ka plagosur dy fëmijë, njëri 7 dhe tjetri 9 vjeç. Të plagosurit janë sjellë në Spitalin Rajonal të Prizrenit për trajtim mjekësor dhe gjendja shëndetësore e tyre mësohet të jetë e rëndë. Arma me të cilën dyshohet se është kryer vepra është sekuestruar nga policia, ndërkohë që i dyshuari është arrestuar dhe po mbahet në paraburgim”, thuhet në komunikatën e policisë.
Burimet e gazetës nga spitali mësojnë se dy vogëlushët i kanë përballuar operacionit, por gjendja e tyre edhe më tej mbetet e rëndë. Sipas mjekëve, pas operacionit, këta vogëlushë nga fshati Kapre, pritet që të marrin veten. /b. beqaj

Cili është opsioni më i keq se tjetri për statusin e Kosovës ?

2007-07-28T00:05:00.000-07:00

Shkruan: Milazim KRASNIQI

Shtyrja e radhës e statusit të Kosovës, e paketuar si bartje në Grupin e Kontaktit nga Këshilli i Sigurimit, është më e rënda deri tash dhe pa asnjë dyshim edhe më e rrezikshmja për të ardhmen e saj. Pas kësaj shtyrjeje, plani i Marti Ahtisarit, është klinikisht i vdekur, që do të thotë se çdo zgjidhje e cila do të mund të merr edhe miratimin e Rusisë, do të jetë nën planin e Ahtisarit. Ndërsa nën atë plan, zor se mund të paketohet ndonjë zgjidhje që do të mund të emërtohet si pavarësi.
Prandaj, për Kosovën nuk ka zgjidhje ideale e as të mirë, por ne duhet të mësohemi e të aftësohemi që të jetojmë në këtë realitet dhe të punojmë për ndryshimin e tij, e jo të bëjmë sehir dhe të presim poshtërimin e radhës.

Fitoret taktike të nacionalizmit rusomadh e serbomadh

Tash për tash të qarta janë vetëm pasojat konkrete që ka prodhuar kjo shtyrje e radhës. E para , kjo shtyrje paraqet një fitore taktike të nacionalizmit rus në prag të zgjedhjeve presidenciale në Rusi. Nëse kjo do të ndihmon që nga zgjedhjet e ardhshme presidenciale që do të mbahen pas disa muajve, në Kremlin të sillet një njeri i besueshëm i Putinit, kjo do të ketë pasoja largvajtëse për mbarë Evropën dhe për rendin botëror. Përdorimi me sukses i Kosovës si kartë në duart e nacionalizmit rusomadh, ka zbuluar dobësinë tragjike të Perëndimit dhe të vetë shqiptarëve, që nuk kanë arritur të kundërtën, pra, dekurajimin e nacionalizmit rusomadh me anën e një vendimi të qartë për pavarësinë e Kosovës, i cili do ta shpërfaqte Putinin në sytë e rusëve si të dobët dhe të paaftë që të ballafaqohet me Perëndimin. Por, ka ndodhur bash e kundërta, Perëndimi dhe shqiptarët me të, kanë treguar dobësi në raport me nacionalizmin rusomadh, gjë që në të ardhmen mund të rrezikojë edhe përfundimisht të ardhmen e Kosovës.
E dyta, shtyrja ka sjellë një fitore të re taktike të nacionalizmit serbomadh dhe konsolidim të mëtejshëm të pozitës së Serbisë në raport me Kosovën. Miratimi i një rezolute të re për Kosovën në Kuvendin e Serbisë, shënon edhe një fazë të re të përpjekjeve të Serbisë për ta minuar pavarësinë e Kosovës. Kërcënimi që u shqiptua ndaj shteteve që mund ta njohin pavarësinë e Kosovës, në këtë kontekst, është shenjë e guximit të fituar e jo e dobësisë.
E treta, dobësimi i mëtejshëm i autoritetit të lidershipit të Kosovës të cilin nuk do ta ndihmojë as infuzioni i dhënë nga fotografia ose më saktë nga karikatura me sekretaren amerikane të shtetit, do të mund të prodhojë fragmentim të mëtejshëm politik dhe paaftësi për të mbajtur situatën nën kontroll. Vetë fakti që në atë fotografi pozonin tetë persona, me mandate të ndryshme institucionale, por të barabartë para sekretares Rajs, tregon se ata më shumë dukeshin si përfaqësues fisesh afrikane, se sa të një vendi që ka një rend demokratik. Qetësia e tashme në vend është rezultat i vetëpërmbajtjes së qytetarëve, e aspak rezultat i këtij lidershipi të mësuar të bëjë poza qesharake, i cili është i dërrmuar nga joserioziteti, nga jokompetenca, nga demagogjia dhe nga korrupsioni. Por, tejzgjatja e shtyrjeve, mund të sjellë humbjen e durimit dhe të vetëkontrollit të qytetarëve e në atë rast kriza mund të shpërthejë dhe të shndërrohet në argument shtesë kundër pavarësisë së Kosovës.
E katërta, vazhdimi i negociatave të drejtuara nga Perëndimi i lodhur dhe nga Rusia e përtërirë nga dobësia e Perëndimit, ka rrezik që të sjellë lëshime të reja edhe më të rënda në dëm të Kosovës. Rrjedhimisht, tash ekziston rreziku edhe i rikthimit te disa opsione të vjetra, të cilat mund të bëhen atraktive në rrethanat e reja, kur Rusia i dikton rregullat e lojës.

Opsionet e Serbisë

Opsioni i fuqizuar edhe me rezolutën më të re të Kuvendit të Serbisë dhe me kokëfortësinë ruse, e cila e mbështet Serbinë pa kushte, është ai i mbetjes së Kosovës, të lidhur me Serbinë. Por, emërtimi i kësaj oferte si “autonomi substanciale” ose “më shumë se autonomi, më pak se pavarësi”, nuk arrin të fshehë rrezikun që do të paraqiste për konflikte të reja serbo-shqiptare dhe për krizën në rajon.
E para, çfarëdo mbetje e Kosovës në ndonjë lidhje me Serbinë, pavarësisht si do të paketohej e si do të arsyetohej nga liderët e Kosovës dhe nga partnerët e tyre, do të prodhonte konflikte të armatosura të intensitetit të ulët, diktaturë ose qeveri lufte në Serbi, bllokim i procesit të integrimit në BE dhe në NATO, ngrirje e investimeve të huaja, izolim ndërkombëtar i rajonit, veçmas i Kosovës (një version i Çeçenisë), varfëri e mëtejshme në Kosovë dhe në Serbi, ikje e rinisë dhe e intelektualëve, bartja e aksioneve diversante edhe brenda Serbisë, së paku në jugun e Serbisë.
Pra, të gjithë ata që e kërkojnë këtë opsion, janë vazhdues të politikës nacionaliste dhe luftëbërëse të Milosheviqit dhe ithtarë të mbajtjes së Ballkanit në gjendje lufte. Edhe ky opsion dukej krejtësisht i kompromentuar dhe u gjykua nga Plani i Ahtisarit, me eliminimin e atij plani, sërish është në lojë. Për Serbinë do të mjaftonin vetëm disa vegëza, që ta mbajnë Kosovën në kuadër të tërësisë shtetërore të Serbisë, me çka do t’u jepej goditje fatale shqiptarëve të Kosovës dhe shqiptarëve në përgjithësi, por edhe rolit të SHBA-ve në rajon. Në këtë pikë, Serbia nuk është edhe pa ndihmën, sado të fshehtë, të disa shteteve të vetë Bashkimit Evropian.
Opsioni rezervë i Serbisë, ndarja e Kosovës, nga ana tjetër paraqet rrezik potencial, për disa arsye të tjera. Ndarja që do të imponohej nga një proces i tejzgjatur negociatash, të udhëhequra nga Grupi i Kontaktit, do të mund të interpretohej si alibi për elitat politike në Prishtinë dhe në Beograd, që të lajnë duart dhe të thonë se e kanë fituar maksimumin. Por, pothuajse me automatizëm, ndarja e Kosovës do të thoshte rrezik për Maqedoninë dhe për Bosnjë e Hercegovinën, do të provokonte shpërngulje të popullsisë në të dyja drejtimet, incidente të vazhdueshme kufitare, ndoshta edhe rifillim të luftimeve. Rritja e prezencës së NATO-s, do ta shndërronte Kosovën në një llogor ushtarak, ku jeta e qytetarëve do të bëhej e pamundshme. Në planin evropian, ndarja do të provokonte polemika dhe krizë në Bashkimin Evropian, për çka është e interesuar shumë Rusia, gjë që do të thotë se ajo edhe mund ta përkrahë në një moment edhe këtë opsion.

Ngrirja e procesit në favor të Bashkimit Evropian

Shtyrja e tashme në të vërtetë e ka brenda vetes edhe komponentin e ngrirjes së krizës. Fakti që Grupi i Kontaktit në takimin e 25 korrikut në Vjenë nuk arriti të pajtohet as për agjendën dhe në fakt për asgjë, jep indikacionin se ngrirja e procesit mund të shndërrohet në një opsion real. Ngrirja do t’i konvenonte më së shumti Bashkimit Evropian, i cili nuk është i aftë të formulojë një politikë unike për Kosovën. Në rast të ngrirjes së procesit, Bashkimi Evropian do të arsyetohej me formulën “as pavarësi, as në Serbi”, duke e sajuar një status kuazi special për Kosovën. Krahas transferimit të kompetencave të UNMIK-ut te Bashkimi Evropian, do të synohej të fillohej një proces integrimi i rajonit në Bashkimin Evropian, me qëllim që të zbuten kundërthëniet. Por, ky opsion është tërësisht i papranueshëm për popullin shqiptar të Kosovës, të cilit tashmë i është premtuar pavarësia nga administrata e Shteteve të Bashkuara.
Opsioni rezervë i shqiptarëve, i cili në këto vite është degraduar jashtë mase, por që mund të rikthehet, nëse ata tradhtohen përfundimisht, është ai i bashkimit kombëtar. Edhe në kontekstin e zhvillimeve kaq negative për Kosovën, ky opsion po bëhet gjithnjë e më shumë legjitim dhe potencial. Por, ai është i dëmtuar shumë nga vetë elitat politike shqiptare të tredhura, të cilat nuk janë të interesuara për bashkim, po për feudet e veta. Edhe mungesa e integrimit të kombit shqiptar për shkak të ndarjes së gjatë, paraqet pengesë serioze për projektin eventual të bashkimit kombëtar. Nga ana tjetër, kundërshtimi i fortë i komunitetit ndërkombëtar (për shkak të Maqedonisë, por edhe të mosbesimit ndaj shqiptarëve), do ta konfrontonte kombin shqiptar me tërë komunitetin ndërkombëtar, duke përfshirë këtu edhe Shtetet e Bashkuara, të cilat qartë janë në favor të shteteve multietnike jo të krijimit të shteteve të reja etnike në Ballkan.

Kthimi i Kosovës te vetvetja

Kosova urgjentisht duhet t’i kthehet vetvetes e të mos i kullotë sytë në metropolet e dynjasë. Fillimisht, mbajtja e zgjedhjeve në vjeshtë, por me theks te qeveria që i duhet Kosovës e jo te statusi, është hapi i parë i logjikshëm dhe i vetmi i ndershëm në këtë situatë, kur institucionet kanë dështuar në përmbushjen e detyrimeve dhe të premtimeve.
Pastaj zgjedhja e një qeverie me bazë të gjerë dhe me personalitete që kanë integritet moral dhe kombëtar, do të mund të përmirësonte diçka në imazhin e dëmtuar të përfaqësimit të Kosovës. Rasti në Francë ku presidenti Nikolas Sarkozi mori gjashtë socialistë në qeverinë e djathtë, duhet të përdoret si model. Poashtu duhet të bëhet e ditur se ndryshimi i vlerave të shoqërisë së sotme shqiptare të Kosovës, është i domosdoshëm. Eliminimi i kulturës së korrupsionit, përmirësimi substancial i sistemit të arsimit, pavarësia e medieve, ngritja morale me anën e besimit fetar, toleranca më e madhe ndëretnike, janë disa nga vlerat që duhet të aktivizohen urgjentisht në shoqërinë e Kosovës, e cila sot është e dërrmuar nga letargjia. Ndërsa, pa aktivizimin e këtyre vlerave, nuk mund të jepen prova t’pjekurisë së kësaj shoqërie, për të qenë plotësisht e pavarur dhe faktor i stabilitetit në rajon.
Përfundimisht, është e qartë se zgjidhja gjeopolitike nuk është në duart tona, por në duart e të huajve, ndërsa zgjidhja e problemeve të shoqërisë është në duart e qytetarëve të Kosovës. Por, nëse ato probleme zgjidhen dhe Kosova aftësohet për qeverisje të plotë, kjo pashmangshëm e ndryshon edhe qasjen gjeopolitike.
Shkurt, për Kosovën nuk ka zgjidhje ideale e as të mirë, por ne duhet të mësohemi e të aftësohemi që të jetojmë në këtë realitet dhe të punojmë për ndryshimin e tij, e jo të bëjmë sehir dhe të presim poshtërimin e radhës.

Varfëria dhe luksi të ndihet njësoj si tek qytetarët ashtu edhe tek pushtetarët

2007-07-27T04:04:00.000-07:00

Prizren - Pas përfundimit të anketave që ka bërë me qytetarë, përmes organizatës gjakovare "Forumi për Iniciativë Demokratike", OSBE-ja të mërkurën në Prizren ka mbledhur kryesuesit e Grupeve të Fokusit nga të gjitha komunat e rajonit të Prizrenit, për të parë rezultatet e projektit "Urat e Miqësisë", përmes së cilit ka identifikuar problemet nëpër fshatra, për t'ia plasuar më pastaj pushteteve komunale.
Menaxherja e këtij projekti nga OSBE-ja, Juliana Hertweck, tha se ky projekt ka lehtësuar relacionin e komunikimit midis popullatës dhe zyrtarëve komunalë. Sipas saj, pushtetarët duhet më shumë të komunikojnë me popullatën, sepse ata më së miri i dinë hallet e tyre "Zyrtarët komunalë duhet të kontaktojnë më tepër me komunitetin, sepse aty do të mësojnë brengat dhe hallet e tyre. Ndonëse limitet buxhetore nuk lejojnë investime megalomane, gjatë komunikimit mund të gjendet bashkërisht me komunitetin një zgjidhje për secilin problem", tha Hertweck.
Të pranishëm ishin përfaqësuesit e Grupeve të Fokusit nga Prizreni, Sharri, Theranda, Rahaveci, Gjakova dhe Mamusha, si dhe zyrtarë komunalë nga këto komuna.
Përderisa OSBE-ja ka marrë në këtë takim lëvdata nga të gjithë të pranishmit, pushtetet lokale janë kritikuar për ngurtësi në komunikim me popullatën dhe kryelartësinë që po e tregojnë me komoditetin e të qenit në pushtet "Varfëria dhe luksi duhet të ndahen bashkërisht midis pushtetit dhe qytetarëve. Nuk është e drejtë që popullata është zhytur në varfëri të skajshme, ndërkohë që pushtetarët po çmenden nga luksi i tepruar dhe komoditeti që ia kanë krijuar vetes", u tha të pranishmëve kryesuesi i Grupit të Fokusit nga Bellobradi i Opojës së Sharrit.
Ndërkaq, përfaqësuesit nga Rahaveci u shprehen se pushteti i ka harruar krejtësisht disa fshatra të kësaj komune "Në fshati tonë asnjë zyrtarë nuk e ka qit këmbën për të parë se sa shumë po shteret ky vendbanim, pikërisht nga presioni i fukarallëkut. Ndryshe, po të investohet sadopak në infrastrukturë, fshati jonë është mjaftë i bukur dhe piktoresk", tha Avdi Mustafa nga fshati Potoçan i Ulët i Rahovecit, i cili falënderoi OSBE-në që sadopak i ka bërë transparente hallet e tyre.
Rreth 70 pjesëmarrës janë ndarë në dy Grupe punuese, ku për një orë rresht kanë debatuar për të gjetur rrugën dhe format e presionit ndaj pushtetarëve, në mënyrë që të sensibilizohen organet vendimmarrëse për zbutjen e halleve të banorëve nga zonat rurale.
Propozimi i përfaqësuesve nga Sharri që pushtetarët t'i afrohen qytetarit dhe jo të presin qytetarët për t'iu afruar atyre, është përkrahur edhe nga OSBE-ja "Nëse pushtetarët po e shohin që debatet e obligueshme me qytetarë po ju dështojnë për mungesë të qytetarëve, atëherë ata duhet ta aplikojnë formën tjetër. Të shkojnë vetë tek qytetari dhe të bisedojnë me të", ka thënë përfaqësuesi i Grupit të Fokusit nga Bellobradi i Sharrit.
Ndonëse zyrtarët komunalë janë munduar ta arsyetojnë veten me "buxhetet e vogla" komunale, luksi i tepruar i tyre në pushtet ua ka mohuar një gjë të tillë. Kreu i Ekzekutivit nga pilot komuna e Mamushës ka thënë se ata duhet të kenë luks, për hir të imixhit që kanë si pushtetarë.
Në fund, menaxherja e këtij projekti të mbështetur nga OSBE-ja, Juliana Hertweck, tha se nga qytetarët ka marrë kërkesa që ky projekt të vazhdoj edhe në të ardhmen, sepse, megjithatë, ai i ka lëvizur gjërat "Sido që të jetë, qytetarët na kërkojnë që kjo punë të vazhdojë edhe në të ardhmen", tha Hertweck. /b. beqaj

Në Zlipotok zjarri djeg disa shtëpi

2007-07-24T04:02:00.000-07:00

Zlipotok – Disa familje nga fshati Zliotok i Gorës së Sharrit kanë mbetur të hënën pa kulm mbi kokë, pasi një shpërthim zjarri ka kapluar shtëpitë e tyre. Kryeplaku i këtij fshati, Nuhia Tairovci i tha “Lajmit” se zjarri që ka shpërthyer mëngjesin e së hënës ka lënë pa kulm mbi kokë nëntë familje, ndërkohë që dëmtime më të vogla kanë pësuar edhe disa shtëpi tjera në fqinjësi “Nëntë familje aktualisht kanë mbetur pa kulm mbi kokë, pasi zjarri i ka përfshi shtëpitë e tyre. Ndërkohë, ekziston rreziku që zjarri ta përfshij tërë fshatin”, tha Tairovci.
Burime brenda policisë në Sharr e konfirmuan lajmin, ndërkohë që Policia Rajonale në Prizren, përmes një komunikate për publik ka saktësuar se në këtë fshat janë djegur pesë shtëpi.
Ekipet e zjarrfikësve nga Sharri e Prizreni, kanë arritur ta lokalizojnë zjarrin. Në këtë aksion kanë marrë pjesë edhe strukturat tjera relevante, të cilat, edhe përkundër vapës së madhe, kanë arritur ta lokalizojnë shtrirjen e zjarrit në tërë fshatin, i cili gjeografikisht ka pozitën më të keqe në komunën e Sharrit. /b. beqaj

Pesë euro “gjobë” për vandalizëm!

2007-07-10T04:52:00.000-07:00

Sharr - Nxënësit e klasës së nëntë nga tri fshatra të Opojës, të cilët udhëtonin me autobusin e KK-së, janë obliguar që të paguajnë nga pesë euro, për shkak se kanë dëmtuar ulëset e autobusit. Këtë e kumtoi të premten kryeplaku i fshatit Buçe, Kafer Krasniqi. Sipas tij, janë vetëm nxënësit e fshatrave Buçe, Brezne dhe Plavë, të cilët duhet të paguajnë nga pesë euro, për t’i marrë dëftesat e tyre “Vetëm nxënësit tanë janë ngarkuar me këtë haraç, ndërkohë që kjo nuk vlen për të gjithë nxënësit që kanë përfunduar klasën e nëntë”, tha Krasniqi.
Drejtori komunal i Arsimit..., Xhemal Iljazi tha se nuk bëhet fjalë për ndonjë diskriminim, por se vandalizmi i nxënësve i ka detyruar të marrin një hap të tillë “Janë afro nëntëdhjetë nxënës nga kjo anë, të cilët kanë dëmtuar ulëset e autobusit, me të cilin qarkullonin. Dëmtimet janë shkaktuar me qëllim dhe se nuk bëhet fjalë për amortizimin e autobusit, për të cilin destinacion ne kemi paraparë buxhet”, tha Iljazi.
Edhe kryeshefi i ekzekutivit, Bexhet Xheladini, në Tubimin Publik me qytetarë që ka organizuar të premten KK-ja, sqaroi se këta nxënës i kanë dëmtuar ulëset e autobusit me mjete të mprehura “Ulëset janë dëmtuar me qëllim, duke përdorë zhileta, skalpera dhe gjësende të tjera të mprehta. Natyrisht se çdo dëm i shkaktuar me qëllim paguhet. Këtu nuk bëhet fjalë për ndonjë diskriminim financiar, por për dëmshpërblim”, tha Xheladini.
Kryeplaku i fshatit Buçe nuk është pajtuar me arsyet që ka dëgjuar nga krerët komunalë. Ai thotë se diskriminimi, megjithatë, po ndodhë “Nuk mund të thuhet se të gjithë nxënësit kanë qenë vandalistë. Edhe nëse dëmtimi i ulëseve ka ndodhë, atë mund ta kenë shkaktuar një grup nxënësish dhe jo që të gjithë. Prandaj ky është veprim diskriminues që kanë ndërmarrë pushtetarët”.
Qamil Kolloni, nënkryetar i Lidhjes Demokratike të Dardanisë në Sharr (LDD), e ka quajtur diskriminim ngarkesën që u është bërë këtyre nxënësve “Qeveria lokale ka të parapara mjete për mirëmbajtjen e autobusëve të tyre. Ajo nuk është dashur t’i ngarkoj nxënësit me kurrfarë pagese shtesë, sepse kjo është diskriminim”, tha Kolloni. /b. beqaj

Edhe bajgat digjen !

2007-07-09T16:38:00.000-07:00

Brod - Kjo familje nga fshati Brod i Gorës së Sharrit, me kimet i ruan bajgat, të cilat paraprakisht i ka tharë, e që gjatë stinës së dimrit do t’i përdorë për lëndë djegëse bashkë me drutë.
Shumica e familjeve gorane i shfrytëzojnë bajgat si lëndë djegëse, me të cilat kursejnë drutë, e që në këto anë mungojnë së tepërmi. /b. beqaj

Vrasje në tentativë në Gorë të Sharrit

2007-07-05T13:48:00.000-07:00

Sharr - Pajazita Toro nga fshati Krushevë e Gorës, e lindur më 1986, është shtruar në spital me plagë të rënda, të cilat ia ka sakatuar bashkëshorti i saj, Nexhat Rysheni nga fshati Bresanë e Opojës. Policia ka njoftuar të enjten se gjatë aksionit që ka ndërmarrë, ka arritur të arrestoj tre persona të involvuar në ngjarjen, e cila ka ndodhur mbrëmjen e së martës, rreth mesnatës, në familjen Toro, në Krushevë të Gorës së Sharrit “Një banor shqiptar nga fshati Bresanë e Opojës ka plagosur gruan e tij nga rajoni i Gorës, duke i shkaktuar lëndime të rënda trupore. Viktima, pas ndihmës së parë mjekësore që i është ofruar në Shtëpinë e Shëndetit në Sharr, është transferuar në Spitalin Rajonal në Prizren. I dyshuari kishte ikur nga vendi i ngjarjes, mirëpo, me një angazhim të shtuar të policisë nga Sharri, është bërë arrestimi i tij në fshatin Zlipotok të Gorës. Policia ka sekuestruar edhe armën, me të cilën dyshohet se është kryer krimi”, thuhet në komunikatën e policisë rajonale në Prizren.
Zëdhënësi i kësaj policie, Hazir Berisha, tha se qifti i ri bashkëshortor ishte ndarë dhe se procedura gjyqësore për ndarje ishte iniciuar vetëm një ditë më parë “Policia, pos dhëndrit, ka arrestuar edhe dy persona të tjerë, të cilët kanë qenë të pranishëm kur është kryer vepra. Në konsultim me prokurorin, tre të dyshuarit po mbahen në paraburgim”, kumtoi Berisha.
Nga burimet okulare mësohet se qifti i ri kishte jetuar në bashkëshortësi plotë tri vjet, mirëpo Pajazita ka vendosur të ndahej. Dhëndri, Nexhat Rysheni, nga Bresana e Opojës, ka shkuar në shtëpinë e Pajazites, për të gjetur zgjidhje, mirëpo pas pak dëgjohen të shtëna armesh, me ç’rast me tre plumba është goditur viktima. Sipas burimeve të Qendrës Kryesore të Mjekësisë Familjare në Sharr, Pajazita, të martën rreth mesnatës, është sjellë në spital në një gjendje të rëndë shëndetësore. Pas dhënies së ndihmës së parë, ajo me urgjencë është dërguar në spitalin e Prizrenit. Ndërkaq, bëhet e ditur se jeta e Pajazites është në rrezik, prandaj ajo është dërguar për kurim në spitalin e Prishtinës. /b. beqaj

Njëzetë të rinj nga rajoni i Prizrenit përfunduan kampingun në bjeshkët e Sharrit

2007-07-05T03:24:00.000-07:00

Sharr - Gjatë kampingut që ka organizuar Qendra Rinore “Fisnikët” nga Prizreni, me qëllim të ushtrimit të të rinjve për gjeturinë e tyre në raste emergjente, një javë rresht kanë qëndruar në bjeshkët e fshatit Brod të Gorës, njëzet të rinj nga rajoni i Prizrenit. Isuf Halimi, drejtor i kësaj organizate, tha se këtë aktivitet e organizojnë në çdo tre muaj, ndërkohë që ky terren është përzgjedhur, sepse është i shkëputur nga bota. “Është ky vendi më i përshtatshëm për trajnimin e të rinjve në gjeturinë e tyre gjatë katastrofave të mundshme. Gjatë një jave ata mësuan dhënien e Ndihmës së Parë në kushte të jashtëzakonshme, orientimin në natyrë, vendosjen e tendave dhe çmontimin e tyre, si dhe përgatitjen e ushqimit”, tha Halimi.
Trupat Mbrojtëse të Kosovës (TMK) i kanë ushtruar këta të rinj për orientim në natyrë dhe montimin e çmontimin e tendave, ndërkohë që në fundjavë ata kanë demonstruar përgatitjen e ushqimit, në rrethana të jashtëzakonshme. Albulena Krasniqi, njëra nga vajzat pjesëmarrëse në këtë kamping, tha se ushqimi që kishte përgatitur me shoqet, ishte i shijshëm, por se kishin harruar ta kriposnin “Sa mirë e kishim përgatit drekën, por kishim harruar t’i qitnim kripë. Megjithatë, herën tjetër kjo nuk do të ndodhë. Me rëndësi është që ne po mësohemi se si të mbijetojmë në rrethana të jashtëzakonshme, si dhe po njoftohemi me të rinj nga vise të ndryshme”, tha Albulena Krasniqi.
Për ta pasur kampingun më të sigurt, Shoqata e Gjahtarëve nga Sharri “Kaprolli” këtyre të rinjve u ka lëshuar edhe shtëpizën që kanë në këto bjeshkë, e cila dikur u ka shërbyer edhe funksionarëve më të lartë jugosllav për kamping intim. /b. beqaj

Gomari më i popullarizuar në Gorë

2007-07-04T13:06:00.000-07:00

Brod - Një grup fëmijësh nga fshatra të ndryshëm të Sharrit, të cilët ndodheshin në Brod të Gorës për kamping, të organizuar enkas për ta nga Kryqi i Kuq Komunal i Sharrit, ushtrojnë një pjesëtar gjerman të KFOR-it se si duhet "kalëruar" gomari.
Mbi shpinën e këtij gomari ngjitet pothuajse çdo turist që e viziton këtë fshat piktoresk, i cili spontanisht po e merr epitetin e fshatit më turistik të Sharrit. /b. beqaj

Nga 75 rastet e dyshuara, vetëm dy persona të infektuar me Ethe...

2007-07-04T04:08:00.000-07:00

Prizren - Drejtues të Institutit Rajonal të Shëndetësisë Publike në Prizren, konfirmuan se nga fillimi i vitit e deri tash në këtë rajon janë paraqitur 75 raste të dyshuara nga ethet hemorragjike “krime kongo”, por analizat e mostrave të gjakut në Lubjanë kanë treguar se vetëm dy persona, njëri prej të cilëve ka vdekur, janë të prekur nga kjo sëmundje. Pranvera që shkoi dhe stina e verës, në rajonin e Prizrenit është karakterizuar me paraqitjen e rasteve të dyshimta të prekura nga pickimi i rriqrave, ndërsa një grua 35 vjeçare, nga fshati Dragobil i Malishevës ka vdekur, kohë më parë.
Mjekët thonë se sëmundja ka karakter sezonal dhe se zhvillohet në kushte klimatike të duhura, në zona me lartësi të ultë mbidetare.
Dr. Nurishahe Hulaj, drejtoreshë në Institutin rajonale për shëndetësi publike në Prizren, tha se zonat më të prekura në rajon janë komuna e Malishevës, Rahovecit dhe deri diku edhe ajo e Therandës. “Nga fillimi i vitit e deri tash në këtë rajon janë paraqitur 75 raste të dyshimta nga pickimi i rriqrave, shumica prej të cilëve nga Malisheva, por nuk ka vend për panik pasi ekipet përkatëse mjekësore janë në teren dhe se gjendja është nën kontroll, ndërsa në viset e prekura po bëhet dezinfektimi”, tha ajo.
Sipas Hulajt, rastet e dyshimta fillimisht janë dërguar në Klinikën Infektive në Prishtinë, ndërsa më pas mostrat e gjakut të tyre janë dërguar në Lubjanë të Sllovenisë, por deri tash, përpos dy rasteve, një gruaje në Dragobil, që ka vdekur dhe një burri në fshatin Reçan të Prizrenit, që vijon të mjekohet nga infektimi “krime kongo” rastet tjera nuk kanë dalë të jenë të prekur nga ky virus.
“Në bashkëpunim me Institutin kombëtar të Shëndetësisë Publike të Prishtinës, po vijojmë aktivitetin për dezinfektimin e 32 fshatrave të Malishevës, në të cilat çdo ditë janë të angazhuara dy ekipe mjekësore profesionale”, tha Hulaj.
Pas paraqitjes së rasteve të para të etheve hemorragjike, zyrtarët shëndetësor rajonal në Prizren, thonë se ekipet përkatëse po shkojnë nëpër vende të ndryshme për të informuar qytetarët rreth sëmundjes, ndërsa në këtë projekt janë përfshirë rreth 12 mijë anëtarë të komunitetit.
Që nga vitit 2001 e deri tash janë paraqitur mbi 100 raste të dyshuara të prekura nga ethet hemorragjike, ndërsa 16 persona, shumica nga komuna e Malishevës kanë vdekur për shkak të infektimit nga kjo sëmundje. Mjekët thonë se sëmundja është e shërueshme, por rastet fatale, sikurse gruaja nga Dragobili, me vonesë kanë kërkuar ndihmën mjekësore. /kosovalive

Një milion € për dy rrugë të Gorës

2007-07-02T15:16:00.000-07:00

Sharr - I entuziazmuar që para bashkëfshatarëve të vet do ta ketë “faqen e bardhë”, nënkryetari i KK-së nga radhët e komunitetit goranë, Sabedin Çufta, nuk dinte se çfarë të thoshte të premten, përderisa me kryetarin e KK-së, Halim Shemsidinin, ministrin e Transportit... Qemal Ahmetin dhe ministrin e Shëndetësisë... Sadik Idrizin niseshin për në fshatin e tij, më i madhi dhe më i thelli në komunën e Sharrit, Restelicë. “Po shkojmë t’i fillojmë solemnisht punimet në rrugën Restelicë-Sharr. Ndihem krenar që erdhi ky çast”, tha Çufta, i cili në ditën ë çlirimit të Sharrit, më 15 qershor, duke i përgëzuar qytetarët për këtë festë, premtoi se punimet në këtë rrugë do të fillojnë brenda pak ditësh.
Ministria e Transportit ka ndarë rreth një milion euro për dy rrugët e Gorës, të cilat janë të vetmet që i lidhin fshatrat e kësaj treve me qendrën komunale të Sharrit.
Sadik Idrizi, nëpër fshatin e të cilit kalon kjo rrugë e stërdëmtuar, në shpejtësi deklaroi se ky është edhe një sukses i madh i institucioneve, për t’ua përmirësuar jetën qytetarëve të Gorës “Është koha që qytetarët e kësaj treve të kenë lidhje më të mira me botën. Sot po i fillojmë punimet në rregullim e kësaj rruge 25 kilometërshe, ndërkohë që me këto mjete do të ndërtohet edhe rruga deri në Brod, me gjatësi 10 kilometër”, tha Idrizi.
Ndonëse numri i banorëve që jetojnë në Gorë është dy herë më i vogël se ai nga rajoni i Opojës, territori i kësaj treve është dy herë më i madh se Opoja. Pikërisht për këtë duhen më shumë mjete për rregullimin e infrastrukturës rrugore. Me ndërtimin e këtyre dy rrugëve, rajoni i Gorës do të ketë lidhje më komode me Sharrin, ndërkohë që është harruar asfaltimi i një rruge tjetër e këtij rajoni, me gjatësi prej katër kilometra, nga magjistralja Zhur-Sharr, deri në fshatin Rapçë. /b. beqaj

“Dasmë” e madhe për mësimdhënësit e Sharrit

2007-07-01T00:25:00.000-07:00

Sharr - Darka e katërmbëdhjetë, që kur e filloi këtë ide nëpër komunat e vendit anëtari i Ekipit Negociator të Kosovës dhe kryetar i partisë më të madhe opozitare në vend (PDK), Hashim Thaçi, e cila u shtrua në fshatin Zym të Opojës së Sharrit, mbrëmjen e së mërkurës bëri jehonë të bujshme në këtë komunë të varfër.
Paraprakisht, për nderë të delegacionit të PDK-së, njëra nga ndërmarrjet më të fuqishme në komunë, ka shtruar drekë në motelin e vet, të përuruar pak kohë më parë në fshatin Brod të Gorës. Për dallim nga dreka, darkës i është bashkëngjitur edhe Enver Hoxhaj, i cili sapo kishte përfunduar në Prishtinë një debat në lidhje me përpjekjet për shpikje identitetesh. Në Sharr, Hoxhaj është bindur se identiteti i partisë së tij është numerikisht shumë i madh “Nuk kam pritur që në Sharr të ketë kaq shumë simpatizantë të PDK-së. Kjo më bën të mburrem dhe më obligon që të punoj edhe më shumë”, tha Hoxhaj.
Ndërkaq, thashethemeve në lidhje me financimin e këtyre darkave dhe drekave që po shtrohen nga PDK-ja, lideri i saj, Hashim Thaçi, u përgjigjet me modesti. Ai thotë se prania e tij nuk nënkupton edhe barrën financiare të kësaj llonxhe “Unë nuk e di nëse mysafiri duhet të paguaj ushqimin. Merita dhe iniciativa për këtë darkë është e imja, ndërkohë që nderi dhe falënderimet ju takojnë juve”, iu përgjigj shkurt pyetjes kreu i PDK-së. Një përgjigje figurative në lidhje me këtë çështje, jep edhe pronari i motelit në Brod, Rexhep Arifi. Ai duke numëruar mysafirët e rangut më të lartë që vizitonin këtë trevë, edhe kur ky nuk e kishte objektin e vet, pohon se është vendi ai që tërheq mysafirët dhe jo individët, apo partitë “Shtëpia ime, mysafirët e mi. Dera është e hapur për të gjithë, pa dallim”, tha shkurt Arifi, i cili vetëm një javë më parë kishte mysafir edhe kryetarin e LDD-së, Nexhat Dacin.
Qindra të pranishëm në këtë darkë, e cila ka zgjatur deri rreth mesnatës, përbëhej kryesisht nga mësimdhënësit, për të cilët edhe është dedikuar kjo ndejë. Secili nga të pranishmit pozonte me Thaçin, pa ndonjë ngarkesë “Është një nderë i madh kjo iniciativë e liderit të PDK-së, sepse ne kemi mbetur shtresa më e harruar nga të gjitha strukturat, pas asaj të pensionistëve”, tha një veteran i arsimit, pa dashur të identifikohej.
Sido që të jetë, në “darkën e Thaçit” më së paku ka pas diskutime politike. Aty ka dominuar muzika LIVE dhe vallëzimi, ku në disa raste në radhët e vallëzuesve është futur edhe Xhavit Haliti, edhe pse nuk ka treguar shkathtësi vallëzimi. /b. beqaj

As qytetarëve e as këshilltarëve s’ju intereson debati publik i KK-së

2007-07-01T00:21:00.000-07:00

Sharr - Ka dështuar sërish debati publik me qytetarë, i pari për këtë vit që ka tentuar ta organizoj Kuvendi Komunal në Sharr.
Ndonëse ishte paralajmëruar që të mbahej në orën dhjetë, kryetari i KK-së, Halim Shemsidini, me të hyrë në sallën e KK-së (gjysmë ore më vonesë), ka vërejtur se në sallë mungonin qytetarët, por edhe një numër i madh këshilltarësh. “E shoh që nuk kemi qytetarë, por vetëm disa zyrtarë komunalë. Nuk do të kishte efekt nëse zhvillojmë sot debat, por e lejmë për javën tjetër”, tha Shemsidini, i cili premtoi se dy autobusët që ka KK-ja do t’i vej në qarkullim, në mënyrë që qytetarët të vijnë “Njërin do e nisim nga Restelica, e tjetrin nga Zaplluxhja. Ndoshta udhëtimi falas do të ketë efekt”, sqaroi Shemsidini.
Ndryshe nga debatet tjera, kësaj radhe Iniciativa Demokratike e Kosovës (KDI), kishte planifikuar vëzhgimin e këtij debati. /b. beqaj

Thaçi u jep “zemër” prodhuesve të Sharrit

2007-06-28T08:43:00.000-07:00

Sharr - Hashim Thaçi, anëtarë i Ekipit Negociator dhe kryetar i partisë më të madhe opozitare në vend (PDK), i shoqëruar edhe nga Xhavit Haliti, Enver Hoxhaj dhe bashkëpunëtorë të tjerë, të mërkurën vizitoi komunën e Sharrit, ku kryesisht u përqendrua në ndërmarrjet private të kësaj komune të vogël. Stacioni i parë i tij ishte Qumështorja “Sharri” në fshatin Kuk të Opojës, ku u gostit me një fli tradicionale dhe jogurt, të prodhuar në këtë mini-fabrikë “Është ky një biznes i mirë dhe i qëlluar për këtë trevë, edhe pse e di që keni mjaftë vështirësi. Rryma dhe konkurrenca joreale e tregut ju bën të pasigurt në veprimtarinë tuaj, por duroni edhe pak sepse bashkë me statusin e Kosovës, edhe statusi juaj do të jetë më i mirë”, u tha punëtorëve dhe pronarëve të kësaj qumështoreje Thaçi, duke shprehur siguri se ky status është shumë afër. Drejtori i qumështores “Sharri”, Alemi Hajredini, pasi i ka vërtetuar fjalët e mysafirit të tij, tha se vizita e njërit nga anëtarët e Ekipit Negociator është tejet inkurajuese për prodhuesit “Edhe pse jemi të vetëdijshëm se aktualisht ne po diskriminohemi dhe po veprojmë në një pasiguri totale, kemi shumë ymytë që e ardhmja jonë do të jetë më e mirë”, tha Hajredini.
Kreu i PDK-së ka vazhduar udhëtimin e tij në Bellobrad, ku ka vizituar Kooperativën Bujqësore “Sharri”, e cila njihet për djathë cilësor në këto anë. Nga drejtori, Hafiz Rifaj ka mësuar se në rrethanat aktuale, është vështirë të ruash edhe lopë “Në këto rrethana, është rrezik i madh të merresh me veprimtari prodhuese. Ekzistenca jonë edhe më shumë do të rrezikohet, kur tokat bujqësore, të cilat tashmë i ka përvetësuar kooperativa e dikurshme ‘Sharrprodhimi’, do të privatizohen”, u ankua Rifaj.
Mysafiri i lartë i PDK-së, ka qenë shumë i interesuar të mësoj çdo detaj dhe dëshirë të prodhuesve të Sharrit. Ai u ka premtuar atyre më shumë përkrahje, nëse do të arrij të marr timonin e këtij vendi “Do ta keni përkrahjen time maksimale, po qe se do të kem forcë në pushtet”. Thaçi në vazhdim ka vizituar edhe Industrinë e Mishit “Meka” në fshatin Plavë, e cila njihet ndër më të suksesshmet edhe në vend. Ai nga drejtori Burim Piraj, është njohur me sukseset dhe vështirësitë për ta përballuar gjendjen aktuale “Jam i vetëdijshëm se mungesa e energjisë elektrike dhe infrastruktura rrugore ju mundon shumë, por mbahuni edhe pak se do ja dalim mbanë të gjithë”, u shpreh Thaçi. Ndërkohë edhe kreu i kësaj industrie, Burim Piraj, u shpreh se vizitat si kjo u japin më shumë kurajë për t’i përballuar vështirësive “Besoni se jemi demoralizuar krejt... me orë të tëra na mungon rryma, ndërkohë që frigoriferët dhe makinat tona nuk mund t’i lëviz asnjë gjenerator. Por, inshallah stabilizohet kjo trevë se maruam”, tha Piraj. Thaçi më pas ka vizituar edhe një industri të masave plastike në Sharr dhe ka vazhduar rrugën për në fshatin Brod të Gorës, ku kohë më parë ndërmarrja “Kuk-Komerc” ka përuruar një objekt hotelier, duke shpresuar se ky fshat do të bëhet vend turistik. /b. beqaj

Pas më shumë se dy dekadash, Daci vizitoi Sharrin

2007-06-20T11:28:00.000-07:00

Sharr - Kanë kaluar disa dekada, që kur akademiku Nexhat Daci, për herë të fundit kishte qëndruar në Sharr. Ai në takimin që pati të mërkurën me qytetarët e Sharrit, në cilësinë e kreut të Lidhjes Demokratike të Dardanisë (LDD), u shpreh se kjo qytezë ka ndryshuar shumë “Që kur isha këtu në vitet e shtatëdhjeta, po shoh se qyteza juaj paska ndryshuar shumë. Kam ardhur këtu të njihem më përsëafërmi me ju dhe të ju shpalos vizionin e partisë që drejtoj”, u tha qytetarëve të tubuar në sallën e Shtëpisë së Kulturës në Sharr, akademik Nexhat Daci, pasi ka bërë homazhe në varrezat e dëshmorëve në fshatin Buçe dhe në Sharr dhe pasi ka vizituar Brigadën 324 të TMK-së “Sali Saramati” në fshatin Zym të Opojës.
Për ta pritur kreun e LDD-së, kishin dalë turmë e madhe e simpatizantëve nga të gjitha fshatrat e Opojës. Ata patën rast që t’i parashtronin pyetje Dacit, i cili shpeshherë zuri në gojë ndryshueshmërinë që ka partia e tij me “mëmën” e saj, LDK-në “Asgjë nuk kemi të përbashkët me drejtuesit aktual të LDK-së, të cilët menjëherë pas vdekjes së presidentit Rugova, anashkaluan rrugën dhe vizionin e tij. LDD do ta vazhdojë rrugën e të ndjerit Rugova, sepse ai ishte kreatori i krijimit të një identiteti të ri shtetëror”.
Daci më tej potencoi se programi i partisë së tij nuk do të jetë “Fontanë Dëshirash” por një legjislacion që mund të arrihet dhe që do të ndryshoj për secilën komunë veç e veç “Programi jonë do të jetë specifik për secilën komunë, sepse secili rajon ka veçoritë dhe specifikat e veta në zhvillimin ekonomik. Është lehtë të përpilosh një program unik për tërë vendin dhe pastaj ai të mbetët vetëm një listë e ëndrrave dhe dëshirave”, tha Daci, duke e publikuar për herë të parë se kjo parti ka themeluar një trupë, prej më shumë se dyzetë ekspertësh, të cilët do të merren me forcimin e politikave operacionale “Në këtë trupë janë të përfshirë ekspertë të njohur, nga të cilët 17 nuk janë fare anëtarë të partisë sonë, por që janë ekspertë të mëdhenj”.

Kosova identitet në vete

Në pyetjen e “Lajmit”, nëse LDD angazhohet për një identitet të ri kombëtarë, i cili Kosovën do ta dallonte nga Shqipëria, Daci nuk deshi të përgjigjej, por tha se kjo çështje iu takon ekspertëve “LDD nuk ka fuqi të vendosë për këtë çështje. Unë nuk dua të spekuloj se si do të përfundojë një debat i këtillë, të cilin e përcjell me vëmendje, por angazhohemi që Kosova të njihet si identitet në vete, kudo në botë”. Daci nuk i është përgjigjur drejtpërsëdrejti as pyetjes nga kreu i Ballit Kombëtarë në Sharr, Xhevdet Tahiri, nëse e mbështet bashkimin kombëtar dhe flamurin aktual shqiptar “Ne angazhohemi për një Kosovë liberale dhe të hapur me të gjithë fqinjët, shpresojmë edhe me Serbinë, por me kufij të hekurt për të gjithë ata që merren me punë të pista. Flamuri dhe himni i propozuar nga Rugova, duhet të konkurrojnë për t’u bërë elemente që e dallojnë Kosovën nga shtetet tjera”, tha Daci

Në Ekipin e Unitetit – budallenjtë!

Disa herë Daci e ka zënë në gojë Ekipin e Unitetit, për të cilin ka thënë se nuk ka nevojë tashmë të ekzistojë dhe se ky Ekip ka bërë më shumë budallakina se sa çdo gjeneratë tjetër e kombit tonë “Në fillim, Ekipi i Unitetit, i cili u themelua nga presidenti Rugova, kishte legjitimitet dhe ishte i nevojshëm. Tani ky ekip nuk ka nevojë të ekzistoj, sepse çështja finale e procesit të pavarësisë, tashmë është në tavolinat e fuqive më të mëdha të dynjasë. Budallakinat që ka bërë ky ekip, mund të konkurrojnë edhe për Librin e Ginisit. Ata tashmë ekzistojnë në skenë vetëm për interesa personale dhe për asgjë më shumë”. /b. beqaj

Edhe një seancë gjyqësore pa sukses, për ujin e Bellobradit

2007-06-20T11:22:00.000-07:00

Bellobrad - Të mërkurën është mbajtur seanca e katërt gjyqësore, në lidhje me një kontest midis mëhallëve në Bellobrad, për shfrytëzimin e ujit të pijshëm, por edhe kjo seancë ka përfunduar pa ndonjë vendim. Ajo është shtyrë për një ditë tjetër, në mënyrë që të gjendet ndonjë zgjidhje, pasi që eksperti i cili ka qenë në teren, të jap vlerësimin e tij, e që në këtë seancë ka munguar. “Duhet ta sjellim ekspertin që të na jap sqarime për gjendjen faktike në terren. Nuk e di pse ai sot mungon”, tha gjykatësi i lëndës, Fazlian Mushka, i cili kërkoi që të shtyhet seanca, përderisa Agron Daka, ekspert për çështjet e ujit, të mos i japë sqarimet për gjendjen faktike që ka parë në teren.
Më shumë se tri dekada, pasi që e ka zgjidhur problemin e ujit të pijes, Bellobradi është zhytur në këtë problem, edhe pse ka ujë të mjaftueshëm për secilën familje. Një investim që ka bërë Kuvendi Komunal dhe CIMIC-u gjerman, për ta meremetuar rezervuarin e vjetër të Bellobradit, në Opojë të Sharrit, nga furnizohen aktualisht rreth 40 familje që nuk kanë ndërtuar rezervuar të rinj, është bërë mollë sherri për banorët. Disa familje, ndonëse kanë ndërtuar rezervuar të rinj për nevojat e tyre, i kanë paditur familjet që furnizohen nga rezervuari i vjetër, se me ndërrimin e rrjetit, i kanë shkëputur ata.
Kryetari i KK të Sharrit, Halim Shemsidini, në një prononcim të mëhershëm për “Lajm” ka thënë se i vjen keq që bellobradasit janë zhytur në tensione, por ai është krenar që ka mundur të ndaj mjete financiare për meremetimin e këtij rezervuari “Unë i falënderoj bellobradasit që gjithmonë kanë qenë të gatshëm të grumbullojnë mjete, për ta përmirësuar infrastrukturën. Ne do të lëshojmë mjete për secilin fshat, i cili është i interesuar në këtë drejtim dhe që arrin të grumbulloj sadopak mjete nga buxhetet familjare”, tha Shemsidini.Në padinë e këtyre familjeve thuhet se ata kanë mbetur pa ujë, pas ndërrimit të rrjetit, por familjet të cilat e kanë meremetuar rrjetin thonë se kjo është “lajkë” për ta fituar simpatinë e gjykatës “Absolutisht nuk është e vërtetë... Asnjë familje që nuk ka rezervuar, nuk ka mbetur pa ujë. Ne kemi vepruar në bazë të një marrëveshjeje që është arritur në fshat, e cila ua ka mundësuar çdokujt ndërtimin e rezervuarit të ri, pavarësisht se ku e mbledh ujin dhe pavarësisht se ku kalojnë gypat. Kusht i vetëm për ta ka qenë që të shkëputen nga rrjeti ekzistues”, tha Rexhep Rifaj, njëri nga të paditurit.Aktualisht, në Bellobrad janë ndërtuar 14 rezervuar uji, por vetëm furnizuesit e nga njëri prej këtyre rezervuarë, kërkojnë që të kenë qasje edhe në rezervuarin e vjetër. Familjet tjera janë deklaruar edhe me shkrim se rezervuari i vjetër nuk iu intereson. /b. beqaj

Të shtunën në Sharr u zhvilluan garat e pehlivanëve dhe revy e qenve

2007-06-17T13:33:00.000-07:00

Sharr - Ndonëse shiu që kaploi Sharrin në paraditen e së shtunës dhe incidenti në Akademinë solemne, një ditë më parë, ndikuan që gara e pehlivanëve këtë vit të mos jetë madhështore, ato megjithatë u zhvilluan. Njëkohësisht, në arenë munguan edhe shumë pehlivanë, ndërkohë që nga Turqia nuk kishte ardhur asnjë prej tyre. Të gjitha këto i pasuan pengesat paraprake, e që si rezultat doli se kjo garë ishte më e zbehtë se vitet e kaluara.
Për t’i përcjellë garat nga afër, kishte ardhur edhe ministrja Melihate Tërmkolli dhe mysafir të tjerë nga institucionet e vendit, por jo edhe ministri i Kulturës dhe Sportit, Astrit Haraqia, i cili e mbështet këtë aktivitet.
Pa ndonjë shfaqje kulturore, si vitet e kaluara, të pranishmit i ka përshëndetur fillimisht drejtori komunal për Kulturë, Rini e Sport, Muharrem Qafleshi dhe kryetari, Halim Shemsidini e nënkryetari nga komuniteti gorano-boshnjak, Sabedin Çufta.
Menjëherë ka filluar “lufta” mes pehlivanëve të Dorës së Tretë, e cila simbolizon trashëgiminë e këtij sporti popullor në këto troje.
Në Dorën e Dytë, pas një lufte të gjatë, vendin e parë dhe të dytë e kanë ndarë Hamid Bakiu nga Shkupi dhe Sahit Prizreni nga Durrësi, të cilët garën e kanë përfunduar pa e mposhtur njëri-tjetrin. Në vendin e tretë është radhitur Ramazan Bakiu nga Shkupi.
Në Dorën e Parë (finale), pas një gare interesante midis Elis Gurit nga Shkodra dhe Isa Berishës nga Prizreni, shkodrani korr fitore, pasi djaloshi prizrenas ia rrah shpinën, në shenjë të dorëzimit të garës.
Në përfundim të garës, Elis Guri tha se fitorja në garat e Sharrit është kulminacioni në karrierën e tij “Ky është suksesi më i madh në karrierën time, sepse gara në këtë komunë është më e madhja në Kosovë. Duhet të mburreni edhe ju me këtë aktivitet”, tha Guri.
Për ta referuar këtë garë janë angazhuar profesionistë të kësaj fushe nga “Shoqata e trajnerëve të Mundjes e Kosovës”, me në krye Ridvan Kalanderin. Kjo ka ndikuar që gara e pehlivanëve të jetë i vetmi aktivitet në Ditën e Çlirimit të Sharrit, që kaloi në atmosferë sportive dhe pa asnjë aksident.

Pakënaqësi edhe në klasifikimin e qenve!

Ndonëse numri i qenve të ekspozuar në revynë tradicionale, nuk kaloi më shumë se dhjetë, ndër pronarët e qenve pati moskënaqësi. Pasi u ndanë çmimet, njëri nga pronarët protestoi publikisht se ia kanë zhvlerësuar qenin e tij, të cilit nuk i dhanë asnjë çmim.
Tasim Sherifi, veterinar i njohur goran, i cili ishte anëtar i komisionit për vlerësimin e qenve, tha se vërtetë ndarja e çmimeve nuk ka qene korrekte. Sipas tij, edhe në këtë garë ka ndikuar intervenimi “Nuk them se protestuesi ka të drejtë, por klasifikimi nuk është bërë si duhet. Janë disa kritere strikte që e karakterizojnë qenin e Sharrit, e ato nuk janë përfillur”, tha Sherifi.
Ndryshe, vendin e parë e zuri qeni me emrin “Korabi” i pronarit Rexhep Gërdellaj nga fshati Rrenc. Vendin e dytë qeni me emrin “Murgja” nga Plava, ndërsa vendin e tretë e zuri qeni me emrin “Beliq” nga fshati Lybevisht i Gorës.

Ministrja Tërmkolli u kënaq në Sharr

Garën e sivjetme të Pehlivanëve, ministrja e Shërbimeve Publike, Melihate Tërmkolli, e ka karakterizuar mjaftë të rëndësishme. Sipas saj, ajo është ndier këndshëm në Sharr, të cilin e konsideroi mjaftë mikpritës “Ishte një organizim i mirë dhe ndjeva kënaqësi që prezantova këtu. Kjo traditë duhet të ruhet në këtë komunë, sepse në vetë ngërthen pasuri kulturore dhe sportive”, tha Tërmkolli, e cila deri në fund e ka përcjellë garën. /b. beqaj

Në Bellobrad përfundoi gara në vrapimin e kuajve

2007-06-15T15:18:00.000-07:00

Bellobrad - Behar Salihu nga fshati Bresanë e Opojës, nuk e kishte menduar para gjashtë muajsh, kur e blen kalin e tij me emrin “Daniel” për 3 mijë e 500 euro në Novi Pazar të Sanxhakut, se pikërisht në ditën e çlirimit të komunës së Sharrit do të mburret me të. Ai me emocione të thella tha, pasi ka përfunduar gara, se ky trofe ia ka shpaguar shumën e dhënë për këtë kalë, ndonëse nga Kuvendi Komunal ka fituar vetëm 300 euro për këtë titull “Vërtetë është shumë e vogël kjo për vendin e parë, por e rëndësishme është që pushteti lokal i mori parasysh kërkesat tona që kjo garë të rikthehet në komunën tonë”, tha Salihu, i cili nga bashkëfshatarët e vet u prit në Bresanë me curle dhe lodra, sikur hero.
Në praninë e shumë qytetarëve, në qendër të Opojës së Sharrit, në Bellobrad, pas afro dy dekadash, të premten u zhvillua gara në vrapimin e kuajve, për nderë të ditës së çlirimit të komunës së Sharrit. Staza prej dy kilometrash, nga Bellobradi, në drejtim të fshatit Buzez, ishte mjaftë e përshtatshme për zhvillimin e këtyre garave, ndërkohë që nga afër i kanë përcjellë ato edhe krerët komunalë, kryetari Halim Shemsidini dhe kryeshefi i ekzekutivit, Bexhet Xheladini.
Për të marrë pjesë në këto gara, kanë ardhur kalorës nga shumë troje shqiptare, por vendi i parë, megjithatë, mbeti në Opojë, ndërkohë që i dyti në Gorë. Kali me emrin “Daniel” nga fshati Bresanë, i pronarit Behar Salihu, u tregua më i shpejtë dhe ka arritur cakun për një kohë tejet të shkurtër. Në vendin e dytë u radhit Restelica e Gorës, ndërkohë që në të tretin, Lipjani.
Gara në vrapimin e kuajve, në komunën e Sharrit organizohej për nderë të festës së punëtorëve, deri në fund të viteve të tetëdhjeta, kur shqiptarët u sprovuan nga pushteti serb. Për nderë të Ditës së Çlirimit të Sharrit, institucionet komunale e kanë rikthyer këtë garë në komunë, e cila ka zgjuar emocione tek shumë qytetarë opojanë dhe më gjerë. Kryeshefi i ekzekutivit, Bexhet Xheladini, tha se është shumë i lumtur që e ka rikthyer këtë garë tradicionale, ndërkohë që ka falënderuar qytetarët që kanë krijuar atmosferë festive dhe sportive “Populli jonë vërtetë meriton aktivitete të tilla, sepse din t’i organizojë dhe t’i respektoj. Shpresojmë që vitin e ardhshëm të kemi më shumë garues, për t’i dhënë kësaj gare më shumë popullaritet”, tha Xheladini. /b. beqaj

Veteranët e UÇK-së, alergjik ndaj “himnit të Rugovës”!

2007-06-15T14:26:00.000-07:00

Sharr - Në sallën e Qendrës së Kulturës në Sharr, e cila ishte gjysmë e zbrazur, të premten është mbajtur akademi solemne, për ta shënuar Ditën e Çlirimit të komunës.
Që në fillim plasi sherri, kur pas intonimit të himnit kombëtar, filloi “himni i Kosovës”, i propozuar nga kryetari i ndjerë, Ibrahim Rugova. Sekretari i OVL të UÇK-së në Sharr, Lulzim Rifaj, i ka shkyçur kabllot e rrymës, për ta ndërprerë intonimin, duke u shprehur se në këtë ditë nuk bën të luhet me gjëra madhore “Mos bëni hajgare me gjërat që janë mbarëkombëtare, vetëm sa për t’i plotësuar dëshirat e individëve”, u tha krerëve komunalë Rifaj, duke e braktisur sallën. Pas tij sallën e ka lëshuar edhe kryetari i OVL-së, Shpetim Kamberi dhe veteranë të tjerë të UÇK-së.
Pas një heshtjeje dhe nervozizmi, fjalim rasti ka mbajtur kryetari i KK-së, Halim Shemsidini, i cili pa e zënë në gojë incidentin paraprak, lexoi fjalimin e përgatitur për këtë ceremoni “Gjaku i dëshmorëve lë të jetë arsye për bashkëjetesë dhe tolerancë, duke i respektuar institucionet e zgjedhura nga populli”, tha mes tjerash Shemsidini, duke i përmendur në vazhdim të arriturat e KK-së në përmirësimin e infrastrukturës.
Pas tij, fjalim ka mbajt edhe nënkryetari i KK-së nga radhët e minoritetit gorano-boshnjakë, Sabedin Çufta, i cili ka vërejtur se popullata e tij synim e ka Sharrin dhe Kosovën “Në sytë e qytetarëve vërejta se synimi i tyre, ndonëse i ka kapluar varfëria, është Dragashi dhe Kosova. Unë si nënkryetar, ju premtoj se do të punoj vetëm në këtë aspekt. Shpresoj se në përvjetorin e ardhshëm të çlirimit, do të jemi në një ambient më të favorshëm”, tha Çufta.
Në mungesë të kryetarit të OVL të UÇK-së, i cili, megjithatë, u ftua që ta merr fjalën, nga një fjalim të shkurtër mbajtën edhe përfaqësuesi i Brigadës 324 të TMK-së “Sali Saramati” dhe ai i familjeve të dëshmorëve. Këtyre të fundit, kryeshefi i Ekzekutivit të Sharrit, Bexhet Xheladini, ua ndau nga 100 euro, si dhuratë, ku nuk e ka ndarë as një oficer turk të KFOR-it, i cili ka humbur jetën gjatë pastrimit të minave në këtë komunë. /b. beqaj

Gara e pehlivanëve, amanet edhe nga presidenti i ndjerë Ibrahim Rugova

2007-06-13T04:17:00.000-07:00

Sharr - Xhafer Bojaxhiu, nga fshati Plavë, në Opojë të Sharrit, ndonëse i ka kaluar të tetëdhjetat, ende duket vital dhe i mbushur me energji. Ai mezi pretë ditën e shtunë, kur në Sharr do të zhvillohet gara më e madhe në mundje, e që tradicionalisht njihet si “Gara e Pehlivanëve”, e trashëguar brez pas brezi për shumë dekada e shekuj. Ai nuk di shumë për trashëgiminë e këtij sporti në këto troje, por me nostalgji fletë për atë që ka përjetuar gjatë jetës së tij “Kur isha i ri, ndonëse punoja në mërgim për ta siguruar kafshatën e gojës për familjen time, këtë sport nuk e anashkaloja, sepse e kam merak. Në Beograd, përkundër punëve të rënda që bënim, të dielave mblidheshim në ‘Kalamejdan’ të rinj nga vise të ndryshme shqiptare të ish-Jugosllavisë, për t’i treguar shkathtësitë e garës së pehlivanëve. Kërshëri zgjonim tek çdo qytetarë që dilte për pushimet e fundjavës në këtë park historik të Beogradit. Edhe sot, këtë sport nuk e zëvendësoj me asnjë tjetër. Mezi presë ditën kur do të zhvillohen këto gara”, thotë plaku Xhafer Bojaxhiu.
Në Opojë, mundja, gjithnjë ka qenë sporti më i popullarizuar, ku ende mbahen në mend gjeneratat e para të kësaj gare, si Bajram Piraj, Hysni Bojaxhiu, Enver Musliu, Nasuf Veliu dhe shumë të tjerë, sikurse që mbahen në mend pehlivanët nga Shqipëria, Maqedonia dhe Turqia.
Këto gara, në komunën e Sharrit ngërthejnë ne vete një histori të pasur. Sa herë që janë zhvilluar ato, tek banorët e këtushëm, por edhe më gjerë kanë zgjuar kërshëri të jashtëzakonshme. Në këto gara, pehlivanë nga të gjitha trojet shqiptare, por edhe nga vende të tjera, si Turqia dhe Bullgaria, tregojnë shkathtësitë, forcën dhe shpirtin luftarak të një malësori.
Sipas historianëve, sporti i mundjes ka zanafillën sa edhe vetë njerëzimi. Në kohërat më të lashta, mundja ka shërbyer si stërvitja më e mirë për t’u përgatitur për frontet luftarake. Në komunën e Sharrit, sporti i mundjes, është trashëguar që nga sundimi otoman, nga edhe merr emrin “pehlivan”.
Gjatë gjithë kohës, sa zhvillohet gara e pehlivanëve, lodrat dhe curlet para dhe gjatë daljes së garuesve në arenë, zhvillojnë programin e tyre, enkas për këtë ceremoni.
Arena duhet të jetë një livadh, me barë të gjelbër dhe të butë, i cili bën amortizimin gjatë rrëzimit të pehlivanëve në tokë. Në arenë hyjnë edhe gjykatësit, furnizuesit me ujë dhe organizatori. Shikuesit mbesin jashtë arenës së rrethuar me litarë të thjeshtë. Në një kënd të rrethit, vendosen lodraxhinjtë dhe cyrlexhinjtë, të cilët me muzikën e tyre i japin ritëm garës duke krijuar atmosferë festive, e cila ndikon shumë edhe në disponimin e shikuesve.
Pehlivanët vishen me pantallona të shkurtër nga lëkura, të punuara me dorë, e që njihen me emrin “Kismete”. Ato peshojnë deri në 8 kg. Në bel, kismetet shtrëngohen me një lidhëse nga lekura që gjatë orvatjes nuk mund të zgjidhen kurrsesi. Nëse kundërshtari e nxjerr nga kismetet rivalin e tij, ai shpallet fitues.
Pehlivanët para se të fillojnë garën, e lyejnë njëri-tjetrin me vaj, jo vetëm trupin por edhe kismetet. Qëllimi i lyerjes është që gjithmonë kapja nga kundërshtari të rrëshqasë, njëherësh edhe që të mbrohet lëkura nga lëndimet që mund të shkaktohen nga bari.
Pasi t’i kenë veshur kismetet dhe të janë lyer me vaj, pehlivanët krenarë hyjnë në arën. Lodraxhinjtë më me forcë u bien lodrave (tupanëve) për t’u tërhequr vëmendjen shikuesve.
Pehlivanët më me nam, hyjnë në rreth, duke vrapuar dhe duke bërë akrobacione të ndryshme. Këto ushtrime i bëjnë për ta tërhequr vëmendjen e publikut dhe si përgatitje fizike.
Gjykatësit kryesisht rekrutohen nga pehlivanët e njohur, të cilët e kanë ndërprerë garën, qoftë nga lëndimet apo edhe nga mosha e vjetër. Gjykatësit, së bashku me organizatorin, kujdesën për propozicionet.
Në Kosovë janë të njohura katër kategori të pehlivanëve, e që të gjitha janë fjalë turke; Çardak (kategoria më e ulët), Orta (kategoria e mesme), Bashali (kategoria dytë) dhe Bash (kategoria e parë).
Në Sharr, gara e pehlivanëve organizohej për nderë të festave fetare dhe gazmendeve familjare. Pas luftës së dytë botërore, në këtë komunë gara e pehlivanëve bëhet tradicionale. Ajo organizohej më Një Maj, për ta shënuar festën ndërkombëtare të punëtorëve. Kjo traditë ishte aktuale, deri në vitet e nëntëdhjeta, kur shqiptarët u sprovuan nga pushteti serb.
Pas luftës së fundit në Kosovë, Kuvendi Komunal i Sharrit e rikthen këtë garë tradicionale, por në një datë tjetër. Për nderë të Ditës së Çlirimit të Sharrit, pehlivanë nga vende të ndryshme të Ballkanit, sërish ekspozojnë muskujt dhe shkathtësitë e tyre. Ky manifestim, i mbështetur edhe nga institucionet qendrore të vendit, në vitin 2004 u shpall tradicional nga presidenti i ndjerë, Ibrahim Rugova, i cili në një prononcim për “Lajmin” pat deklaruar se institucioneve lokale “ua lë amanet që kjo garë të vazhdoj traditën historike të kësaj komune”.
Të shtunën, për nderë të Ditës së Çlirimit të Sharrit, institucionet komunale kanë paralajmëruar garë të madhe të këtij sporti, ku është paraparë që këtë vit të jetë edhe më madhështore.
Një ditë më herët, sipas këtij paralajmërimi, ne Bellobrad do të zhvillohet gara në vrapimin e kuajve, e cila do të jetë edhe një sport i rikthyer tradicional i Një Majit, por që deri më tash nuk është zhvilluar. /b. beqaj

Ora e Ymer Prizrenit i shpëtoi dështimit !

2007-06-11T15:10:00.000-07:00

Zgatar - Pas shumë ballafaqimeve rreth konsolidimit të kryesisë së Klubit Letrarë “Luigj Gurakuqi” nga Sharri, të dielën u shënua manifestimi “Ora Letrare e Ymer Prizrenit”.
Ndonëse ende ky klub është pa kryetar, aktivistët e tij arritën të tubohen në fshatin Zgatar të Opojës, ku dhe shënuan këtë datë tradicionale kulturore, në kuadër të aktiviteteve të klubit. Ky manifestim mblodhi qindra dashamirë të letërsisë dhe historisë kombëtare, si dhe letrarë nga troje të ndryshme shqiptare. /b. beqaj

Kremtimi i fundit në Zym të Sharrit i brigadës 324 "Sali Saramati"

2007-06-08T01:07:00.000-07:00

Sharr - Për herë të fundit, të mërkurën u kremtua dita e Brigadës 324 "Sali Saramati", në Zym të Opojës së Sharrit. Sipas informacioneve që disponojmë, vitin e ardhshëm kjo kazermë nuk do të ekzistoj. Aty, me gjasë, do të vendosët policia, sikurse që ka ekzistuar edhe para luftës "Brigada 324 do të transferohet në Prizren, por nuk do të shuhet. Ndërkohë, kazerma do të mbes si objekt për destinime të tjera", tha komandanti i deritashëm i kësaj brigade, Ruzhdi Saramati. Ai ia ka dorëzuar detyrën kapitenit, Sejdi Krasniqi, i cili deri në gusht, sipas burimeve tona, do t'i bëj përgatitjet e nevojshme për transferim.
Në ceremoninë e shënimit të ditës së kazermës dhe rënies së dëshmorit Sali Saramati, emrin e të cilit e mban kjo brigadë, morën pjesë strukturat më të larta civile dhe ushtarake të kësaj komune.
Para se ta dorëzonte detyrën, komandanti Ruzhdi Saramati tha se i vjen mirë që ndodhet në trevën, e cila, sipas tij, ka bërë shumë për çlirimin e vendit "Bijtë tuaj kanë rënë, por ende nuk prehen të qetë, përderisa nuk realizohet ëndrra e tyre. Këtë jemi të obliguar ta bëjmë ne, e nëse nuk e bëjmë këtë, do të jemi të mallkuar nga gjaku i tyre", tha Saramati.
Edhe ushtruesi i detyrës së komandantit të Zonës së Dytë në Prizren, Enver Cikaqi, i falënderoi opojanët, për kontributin e dhënë për çlirimin e vendit "Opoja dhe Sharri në përgjithësi, duhet të krenohen, sepse kanë dhënë shumë kontribut në luftën çlirimtare dhe pas saj".
Kryetari i Sharrit, ndërkaq, Halim Shemsidini, tha se takimet e tilla, sa janë të dhimbshme, po aq janë edhe krenare "Kënaqësia më e madhe do të jetë, kur ju të jeni pjesëtarë të ushtrisë së ardhshme të Kosovës, ndërkohë që ne, si pushtet, të punojmë për zhvillimin ekonomik", u tha Halimi ushtarakëve.
Kremtimi i fundit i brigadës 324 në Zym të Sharrit, ka përfunduar me një program kulturo-artistik, të ekzekuatuar nga vetë pjesëtarët e TMK-së. /b. beqaj

Reshiti i zhgënjyer me PDK-në !

2007-06-06T11:31:00.000-07:00

Sharr - Këshilltari i LPK-së në Asamblenë e Sharrit, Demir Reshiti, nuk është përkrahur të martën nga asnjë kolegë i tij në propozimin që në seancën e rregullt të diskutohet për zvarritjen e emërtimit të institucioneve të Sharrit me emrat e dëshmorëve. “Kam pritur përkrahje të paktën nga këshilltarët e PDK-së”, tha pas mbledhjes Reshiti, i zhgënjyer që propozimi i tij nuk kaloi. “Nuk është hera e parë që këtë çështje e kam ngritur në seancat e asamblesë, por kësaj radhe kisha një obligim plus, sepse një gjë të tillë e kanë kërkuar edhe shoqatat e dala nga lufta e UÇK-së, nëpërmjet një letre qarkore, të cilën ua kanë adresuar të gjitha subjekteve politike të përfaqësuar në asamble”, tha ai për “Lajm”.
Gazeta nuk mundi ta marrë prononcimin e përfaqësuesve të PDK-së në Sharr, ndërkohë që kryetari i PDK-së në Prizren, Zafir Berisha, ka shprehur habinë për këtë veprim të kolegëve të tij. “Është skandaloze që këshilltarët e PDK-së nuk e përkrahën propozimin për futjen në rend të ditës të çështjes së zvarritjes së emërtimit të institucioneve të Sharrit me emrat e dëshmorëve të kësaj ane. Ata me këtë veprim kanë bërë shkelje të programit të PDK-së, i cili dëshmorët dhe luftëtarët e lirisë i trajton si të shenjtë”, tha Berisha.
Në seancën e së martës pati përplasje ndërmjet pozitës dhe opozitës, lidhur me vazhdimin e kontratave të drejtorëve komunalë, të cilëve me shumicë votash iu zgjat mandati deri pas zgjedhjeve të ardhshme. /lajm

Klubi Letrar “Luigj Gurakuqi” në Sharr, ende i shkapërderdhur

2007-06-04T07:35:00.000-07:00

Sharr - Manifestimi tradicional mbarëkombëtarë "Ora e madhe letrare e Ymer Prizrenit", i cili organizohej nga Klubi Letrar “Luigj Gurakuqi” në Sharr, këtë vit rrezikon të dështoj, për shkak se klubi ka ngelur pa udhëheqës, pas dorëheqjes së parevokueshme që ka dhënë Bedri Halimi, kryetar i fundit i klubit. Ai, përmes një komunikate, i ka njoftuar anëtarët e klubit se nuk është më në gjendje ta ushtroj këtë post, për shkak të angazhimit të tij në Prishtinë, ku edhe ka transferuar familjen “Kur më skadoi mandati, unë thirra mbledhjen zgjedhore të Klubit, por asnjëri nga të pranishmit nuk shprehi gatishmëri që ta marrë udhëheqjen. Bile disa anëtarë fare nuk morën pjesë në mbledhje. Me insistimin e disa anëtarëve të kryesisë, vazhdova edhe më tutje drejtimin e Klubit, por vetëm sa për ta organizuar manifestimin, kushtuar Ymer Prizrenit, vitin e kaluar në Zgatar. Për shkak të problemeve shëndetësore, jam transferuar me familje në Prishtinë dhe, në njëfarë mënyre, jam shkëputur fizikisht nga Sharri”, tha Halimi.
Pas dështimit të organizimit të “Flakës së Janarit”, era dështim i vjen edhe "Orës së Madhe Letrare të Ymer Prizrenit", e cila, sipas kalendarit kulturor të klubit, duhet të mbahet më 9 qershor. Demir Reshiti, njëri nga themeluesit e Klubit, shprehet të jetë i shqetësuar për dështimin e mundshëm këtë vit “Ia kemi dalë që në këtë manifestim të sjellim poetë nga e gjithë gjeografia shqiptare, që nga Vlora, Tirana, Tetova, Presheva e deri në Prishtinë dhe të gjitha komunat e Kosovës. Mirëpo, këtë vit mund të dështoj organizimi, nëse anëtarët e kryesisë së klubit nuk mblidhen urgjentisht, për të bërë diçka, në mënyrë që të mos dështoj ky manifestim i rëndësishëm në komunën tonë, i cili fatkeqësisht nuk ka as përkrahjen e udhëheqësve komunalë”, tha Reshiti
Ndërkohë që Nëntë Qershori po afrohet, nuk vërehen përgatitje, sikur vitet tjera në këtë kohë. Edhe në kalendarin e Lidhjes së Shkrimtarëve të Kosovës (LSHK), e cila është bashkorganizatore e këtij manifestimi, figuron kjo datë, por nuk shihen as aty lëvizje për mbajtjen e tij. Burime nga kryesia e LSHK-së bëjnë me dije se ata presin nga "Luigj Gurakuqi" që ta ruaj vazhdimësinë e organizimit, përkundër vështirësive me të cilat po ballafaqohet ky klub i Sharrit “Ne do të japim kontributin tonë maksimal, me qëllim që manifestimi të zhvillohet me sukses”, tha ky burim.
Të shtunën janë bërë përpjekjet e fundit të klubit letrar “Luigj Gurakuqi”, në mënyrë që edhe këtë vit të mbahet manifestimi, por nuk janë qartësuar detajet. Disa nga anëtarët e klubit shprehën gatishmëri që, ndonëse jo si vitet e kaluara, manifestimi megjithatë të mbahet. Ata u morën vesh që brenda pakë ditësh të marrin përgjegjësitë, vetëm sa për ta mbrojtur nga dështimi këtë manifestim tradicional, të cilin e shpallën vetë si të tillë, para ca vitesh. /b. beqaj

Një 40 vjeçare nga Prizreni gjendet e mbytur në liqe

2007-06-01T05:06:00.000-07:00

Vërmicë - Policia e rrethit të Hasit, në Kukës të Shqipërisë, konfirmoi të enjten se ka gjetur një kufomë të dekompozuar të një gruaje nga Prizreni, e cila, pasi ishte mbytur në lum, uji e ka bartur deri në liqe, afër Morinit të Shqipërisë.
Shefi i policisë së Hasit të Shqipërisë, Bujar Gjana, konfirmoi gjetjen e kufomës, e cila është nxjerrë nga uji dhe është dërguar në morgun e spitalit të Kukësit.
“Një bari, i cili ishte duke ruajtur bagëtinë, ka parë mbi ujë një kufomë dhe menjëherë e ka lajmëruar policinë, me ç’rast kufoma e dekompozuar është nxjerrë nga uji dhe menjëherë është dërguar në morgun e spitalit të Kukësit për obduksion”, tha Gjana.
Mjeku ligjor në Kukës, Nikolin Martini, ka konfirmuar vdekjen nga mbytja në ujë dhe ka mohuar faktin që ajo të ketë vdekur para se të binte në lum. Sipas tij, kufoma nuk kishte plagë të marra në trup.
Rastin e ka konfirmuar edhe policia në Prizreni, ku sipas tyre, gruaja e vdekur është nga Prizreni, është 40 vjeçare dhe quhet Myqereme Dibra. Viktima është identifikuar edhe nga familja e saj që jeton në Prizren, ku sipas tyre, ajo ishte e sëmurë mentale dhe ishte zhdukur pa gjurmë, që prej 23 majit të këtij viti. /b. beqaj

Në Sharr... Krejt OK !

2007-05-29T05:54:00.000-07:00

Sharr, 29 maj - Ministri i Punëve të Brendshme, Blerim Kuçi, i shoqëruar nga kreu i SHPK-së, Sheremet Ahmeti, pozojnë para ndërtesës së KK-së në Sharr, me kryetarin Halim Shemsidini dhe nënkryetarët Asllan Zejnullahu e Sabedin Çufta, pas vizitës që i bëri të hënën kësaj komune. Ata fillimisht kanë qëndruar në stacionin policorë të Sharrit, e më pas janë njoftuar me gjendjen e sigurisë në këtë komunë, nga kryetari Halim Shemsidini.
Mendim i përbashkët ishte se, aktualisht, gjendja e sigurisë në Sharr është e lakmueshme. /b. beqaj

Udhëtimi Sharr-Prizren, sfidë e madhe !

2007-05-28T03:44:00.000-07:00

Sharr - Sherif Salihu, pronar i ndërmarrjes për qarkullim të udhëtarëve “Bres-Turs” nga fshati Bresanë, në Opojë të Sharrit, nuk e kishte pritur se do të ketë probleme, kur nga një ndërmarrje simotër e kishte blerë linjën e qarkullimit Sharr-Prizren. Ai sapo fillon të qarkulloj me autobusët e tij në këtë linjë, bie në konflikt me pronarët e kombibusëve, të cilët e akuzojnë se “po ua merr bukën”. Në një prononcim për “Lajm”, Salihu tha se ka mundur të bëhet edhe më keq, sikur të kishte ndërmarrë veprime me gjak të nxehtë “Po t’i kisha qëndruar fesatit me gjak të nxehtë, do të kishte ndodhur edhe më e keqja. Por, unë jam duke pritur që ta zgjidh këtë problem përmes institucioneve. Pres që organet komunale ta zgjidhin njëherë e mirë këtë problem me qarkullimin e udhëtarëve”, tha Salihu.
Pronarët e kombibusëve thonë se ata janë tradhtuar nga organet komunale. Sipas tyre, ata kanë paguar të gjitha taksat dhe posedojnë leje nga qeveria lokale, deri më 19 shkurt të vitit të ardhshëm. Ndërkaq, kryeshefi i ekzekutivit në Sharr, Bexhet Xheladini, thotë se kombistët nuk janë tradhtuar nga qeveria lokale, e as nga KK-ja, por pengesa është në Ministrinë e Transportit... “Nuk është e vërtetë se ne i kemi tradhtuar. Ata mund të qarkullojnë lirshëm brenda territorit të komunës sonë, ku nuk i pengon askush”, tha Xheladini.
Pronari i linjës së autobusit në relacionin Sharr-Prizren, Sherif Salihu, thotë se ai nuk mund të qarkulloj në këtë linjë pa udhëtar, sepse harxhimet janë tepër të larta “Unë nuk mund të qarkulloj dy herë në ditë nga 70 kilometra, me nga dy-tre udhëtarë, sepse harxhimet janë të mëdha. Le të ma paguajnë naftën, do ta bëj këtë, qoftë edhe për formalitet. Ndryshe, udhëtarët t’i mbledhin kombibusët e unë të qarkulloj me autobusë të zbrazur, nuk e përballoj dot”.
Pronarët e kombibusëve ankohen se inspektori komunal po i pengon në punë e tyre, e cila u është lejuar me një konkluzion të qeverisë lokale. Sipas tyre, ata disa herë janë ndëshkuar nga inspektori komunal. Por, kryeshefi i ekzekutivit e mohon këtë “Nuk është e vërtete se inspektori komunal i komunikacionit ka ndaluar kombistët, e aq më pak ta këtë dënuar ndonjërin pre tyre. Nëse i pengon policia me urdhër të ministrisë, unë këtë nuk mund ta komentoj, sepse nuk kam kompetenca mbi ta. Me kompetencat që kam, iu kam ndihmuar mjaftë atyre që të ushtrojnë veprimtarinë, por instancat më të larta duhet t’i respektojmë”, tha Xheladini.
Aktualisht, Stacioni i Autobusëve në Sharr, më shumë i ngjason një qendre tregtare se sa një objekti për çfarë është ndërtuar. Shefi i këtij stacioni, Fejzi Dedari, thotë se askush nuk e ka paraqitur orarin e qarkullimit të autobusëve në këtë institucion “Ne nuk dimë asgjë për orarin e qarkullimit, sepse askush nuk e ka paraqitur tek ne. E di që ekzistojnë linjat, por asgjë nuk kam zyrtarisht. Aktualisht janë të rregullta vetëm linjat e kontraktuara për bartjen e nxënësve”, tha Dedari, duke iu bërë thirrje organeve kompetente që sa më parë ta normalizojnë transportin e udhëtarëve, i cili, sipas tij, është kaotik. /b. beqaj

Çfarë kanë boshnjakët e serbët me goranët, bre?!

2007-05-27T11:27:00.000-07:00

Shruan: BESIM CENGU

Para disa kohësh, në revistën “Sharri” (nr. 56-57 viti 2006-2007) u botua një artikull imi, në të cilin me sinqeritet pata shtruar shqetësimin, se pse goranët po tentojnë të arratisen prej identitetit të vet. Këtë dukuri (për mua absurde) vërtet unë nuk po e kuptoj, ose nuk po arrij ta kuptoj.
Përnjëmend, pse ky “pasion”, apo edhe opsesion me sindromë negative për këtë komunitet, që realisht është vlerë e pamohueshme e shqiptarëve, është prezent tek shumë pjesëtarë të këtij komuniteti?!. Kush më thotë e më sqaron mua, për ç’arsye bëhet kjo?!
Nëse kjo lojë shkon në të mirë të goranëve, ma argumentoni, të bindem edhe unë, e që publikisht të them, se paskam qenë gabim. Nëse nuk shkon, pse veprohet kështu që pashmangshmërisht shpie drejt asimilimit që të paktën ne shqiptarët kurrsesi nuk e dëshirojmë. Unë kam qenë shumë i ndërgjegjshëm kur e strukturova artikullin, me qëllimin se kështu do t’i shërbej interesit të Gorës dhe goranëve, të cilët jo vetëm se i respektoj, por edhe në situatën që ne jemi dua që ata të prosperojnë dhe të kenë dinjitetin e nëpërkëmbur për shekuj me radhë.
Kam shfletuar në internet reagime rreth shkrimit tim dhe jam ndeshur me shumë kundërshti naive të disa goranëve (kryesisht nga Shishtaveci), të cilët fatkeqësisht, as nuk kishin arritur të kuptonin shkrimin, por nga ana tjetër, as nuk kishin asnjë forcë argumentuese e vlerësuese për t’i përballuar faktet reale dhe të vërteta si drita e diellit. Madje, për shkak të mungesës së argumentit dhe njohjeve elementare shkencore, arrinin deri në etiketime të pakulturuara dhe krejtësisht të pabaza. Nuk kishin faj. Edhe unë nuk iu përgjigja (jo për ofendim), pasi nxora lehtësisht konkluzionin se në atë faqe të internetit, nuk shkruanin individë kompetentë, por vetëm emigrantë që kanë lindur në fshatrat gorane, por nuk kanë lidhje me historinë e Gorës në të kaluarën dhe ecurinë e saj në situatat e reja politike dhe sociale. Unë jam një nga njohësit e kësaj treve që kam pasur rastin ta shkel me këmbë dhe njëkohësisht një nga miqtë e shumë goranëve, me të cilët fati më ka lidhur që në rininë e hershme. Nuk kam lënë fshat të pjesës së Gorës në territorin e Kukësit pa shkelur dhe pa fjetur në shtëpitë e tyre. Pas lufte, njoha edhe fshatrat gorane në komunën e Sharrit.
Nejse, t’i lëmë këto, por të analizojmë dy takime që sqarojnë edhe më tej drojën time të shprehur në atë artikull të botuar në revistën “Sharri”.
Në të dy takimet, flitet për komunitet boshnjak e serb, por nuk zihet në gojë Gora dhe goranët me veçoritë e tyre, pa asnjë lidhje as etnike e as historike, si me Bosnjën, ashtu edhe me Serbinë.
Xhezair Murati, shef i koalicionit boshnjak “Vakat”, i shoqëruar nga ministri i Shëndetësisë nga Gora, Sadik Idriz(i), ishin në Gorë. Asgjë të keqe nuk ka nga një takim me një komunitet. Por, kur atij i mohon identitetin e tij shekullor, atëherë puna qëndron ndryshe. Për mua kësaj i thonë mohim i së drejtës themelore të një populli, madje edhe ofendim.
Shefi i koalicionit, Murati, tha para shumë goranëve se “qe një vit po marrim pjesë në Ekipin Negociator, për të avancuar sa më shumë komunitetin tonë (për cilin komunitet e ka fjalën, për atë goran apo boshnjak). Më tej ai vijoi: “Sa i përket statusit, të gjithë e kanë të qartë atë. Këshilli i Sigurimit, deri në fund të vitit, do ta përfundojë këtë problem. Ne si minoritet nuk duhet të merremi me statusin, sepse ka kush merret, por ne duhet të interesohemi për pozitën tonë në Kosovë”. Deri këtu mirë, por ende nuk e marrim vesh qartë se për cilin minoritet e ka fjalën. Atë e sqaron më mirë, me guxim të “çartur” Sadik Idriz(i), kur në këtë takim u shpreh: “Plani i Ahtisarit është përqendruar në masë të madhe në mbrojtjen e minoriteteve, jo vetëm atij serb. Në dokumentin e tij ekziston garanci e madhe për minoritetet, e që do ta mbikëqyrë bashkësia ndërkombëtare. Prandaj, nuk duhet të frikësohemi, aq më pak që jemi boshnjakë (!!!)”.
E çuditshme shprehja “...nuk duhet të frikësohemi, aq më pak që jemi boshnjakë (!!!)”. Çdo të thotë kjo?! Me ndërgjegje të plotë e thotë gorani Sadik këtë pohim?!
Nuk do të doja ta besoja një gjë të tillë! Mirëpo, është reale kjo shprehje dhe sigurisht që “kjo lojë politike ditore” e ndihmon atë personalisht. Ani çka, nëse nuk i konvenon komunitetit goran, pjesë e të cilit është ai.
A nuk është arratisje prej identitetit ky akt? Si mundet ta thotë një intelektual goran një gjë të tillë, duke shkelur e nëpërkëmbur, jo vetëm historinë e traditën e Gorës, por edhe dinjitetin e një komuniteti të tërë. Unë kurrë nuk besoj se banorët e Shishtavecit, Restelicës, Borjes e Brodit, Zapodit e Rapçes, Orgjostit e Vraniçit etj, do ta pranojnë këtë identitet të ri të stisur, me të cilin kurrë nuk kanë pasur lidhje dhe afri. Edhe më indiferentët e kuptojnë se këto takime dhe këto definime antishkencore e antihistorike, bëhen për efekt të politikës që nuk i shërben askujt e sidomos Gorës e goranëve. Thënë më shkoqur; pse takime të tilla u shërbejnë disa individëve që paguhen për këtë punë, aspak nuk ndihmon në përcaktimin e goranëve në pozicionin e vërtetë, brenda përbrenda vetvetes, trevës ku jetojnë dhe identitetit të tyre në mesin e shqiptarëve. Duhet ditur mirë e saktë tanimë, se populli i kësaj treve, nuk duhet të vuajë më prej instrumentalizimit që e kanë shpënë deri në kufijtë e asimilimit. Kultura dhe tradita gorane është pasuri e padiskutueshme shpirtërore e një populli që do lirinë, gjuhën e tij, veçoritë e traditën, që e dallojnë prej të tjerëve. Ajo evidencohet e praktikohet vetëm duke qenë si goranë, duke mësuar gjuhën nashke nëpër shkolla, duke kënduar këngët tradicionale dhe duke praktikuar festat, dasmat, ritet... sipas traditës gorane. Ndryshe, pas një kohe, jo fort të gjatë, zor se do të ketë identitet goran. E humbja e këtij identiteti, do të thotë humbje e shumçkaje prej shpirtit tonë të përbashkët, goranë e shqiptarë.

P. S. Autori është shef i Departamentit të Arsimit dhe Kulturës në prefekturën e Kukësit.
Është gazetar aktiv në shtypin e ditës në Prishtinë dhe Tiranë.
Në Kukës ka botuar dhe udhëhequr gazetat “Kukësi i Ri”, “Luma” dhe “Shpresa”.

Bresanasit kërkojnë më shumë investime në kulturë

2007-05-25T04:17:00.000-07:00

Bresanë - Me një aktivitet kulturor në fshatin më të madh të Opojës, Bresanë, Qendra Rinore nga Prishtina kishte për qëllim të sensibilizonte opinionin, për meremetimin e Shtëpisë së Kulturës në këtë fshat, e cila rrezikon të shembet gjatë vibrimeve, kur rrallëherë zhvillohet ndonjë aktivitet në brendi të saj. Lindita Loshi, menaxhere e projekteve në Qendrën Rinore nga Prishtina, tha se të rinjtë e kësaj ane duhet të kenë kushte për aktivitete kulturore, sikurse të rinjtë e gjithë botës “Duhet bërë më shumë për këta të rinj në zonat rurale dhe jo të fokusohemi vetëm nëpër qytete. Këtë duhet ta kenë parasysh edhe institucionet, të cilat duhet të investojnë edhe në këto anë”, tha Loshi.
Fshati Bresanë, me një lartësi mbidetare mbi njëmijë metra dhe me një largësi prej 15 kilometrash nga qendra komunale, me dekada ka objektin e Qendrës Kulturore, por që ai ka mbetur në mëshirën e kohës gjatë dekadave të fundit. Duke e marrë parasysh numrin e madh të të rinjve, bresanasit ndjejnë nevojën që të bëhen investime në këtë objekt kulturor.
Kryetari i fshatit, Ymer Ademi, i cili njëherësh është edhe këshilltar komunal nga partia në pushtet (LDK), thotë se është mëkat që të mos investohet në këtë objekt, ku numri i të rinjve çdo ditë e më tepër po shtohet. “Të rinjtë kanë nevojë për më shumë hapësirë, qoftë për ta kaluar kohën e lirë, apo edhe për të mësuar. Në fshatin tonë kushtet janë të mira, por për të rinjtë është shumë keq. Ata nuk kanë shumë mundësi për shkollim, e as për ndonjë aktivitet kulturor, pasi Shtëpia e Kulturës që dikur i ka mbledhur ata, tani është jashtë funksionit”, tha Ademi, duke i kujtuar me nostalgji ditët kur ky objekt ishte funksional. “Organizimet që janë mbajtur në këtë objekt, nga ana e Shoqërisë Kulturo-Artistike ‘Bresana’, i kanë dhënë jehonë dhe gjallëri këtij vendbanimi. Mirëpo sot askush nuk brengoset nga institucionet tona. Ata na vizitojnë vetëm në kohën e zgjedhjeve, ku na premtojnë shumë investime, sa për të fituar më shumë vota. Por, kur vjen koha për t’i realizuar ato premtime, ata heshtin”, tha Ademi.
Demir Reshiti, këshilltar komunal nga LPK-ja, i cili gjithashtu është nga ky fshat, thotë se në objektin e vetëm kulturor të fshatit Bresanë nuk është bërë asgjë, edhe pse ka pasur premtime “Bresana meriton shumë më tepër... Gjendja në të cilën ndodhet shtëpia e kulturës, është për t'u çuditur. Nuk e di se si po e marrin guximin të zhvillojnë aktivitete në brendi të saj anëtarët e SHKA ‘Bresana’... Mund të ndodhë që t’iu kushtoj me jetë, sepse kulmi i këtij objekti rrezikon të shembet mbi ta. Në mos për asgjë tjetër, atëherë për hir të rezultateve të mëdha që ka arritur kjo shoqëri, duke e prezantuar denjësisht, jo vetëm komunën e Sharrit, por edhe Kosovën në aktivitete kulturore, ky objekt duhet të meremetohet”, tha Reshiti, i cili ishte i bindur se pushteti komunal mund ta meremetoj këtë objekt, por ata investimet po i orientojnë në baza politike “Investimet po përqendrohen në rajonin e Gorës, për t'ua bërë qejfin partnerëve goranë qe i kanë në bashkëqeverisje”, konstaton Reshiti.
Nga ana tjetër, kryeshefi i Ekzekutivit në Sharr, Behxhet Xheladini, edhe ky banor i fshatit Bresanë, pranoi për “Lajm” se nga kjo trevë kanë dalë shumë intelektualë të profileve të ndryshme, falë angazhimit vetanak të banorëve të këtij lokaliteti. Xheladini shpreson se shumë shpejt Shtëpia e Kulturës në Bresanë do t’i kthehet gjendjes së mëparshme. “Ne ia kemi dorëzuar një projekt Ministrisë së Kulturës për rindërtimin e këtij objekti dhe kemi premtime se ai do të realizohet”, tha Xheladini.
Ndryshe, në kuadër të Shtëpisë së Kulturës, dikur funksiononte edhe kinemaja, e cila deri në vitin 1990, shfaqte së paku nga dy filma në javë. Ky objekt është përdorë edhe për destinime tjera, si ato sportive, politike, e sidomos arsimore. /b. beqaj

Nxënësit e Kukit, qe dy vjet mësojnë nëpër lokale private

2007-05-22T14:28:00.000-07:00

Kuk - Rreth katërqind nxënës të shkollës fillore “Muhamet Çami” në Kuk të Opojës, të hënën e rifilluan mësimin, pas një ndërprerje disajavëshe, për shkak të mungesës së kushteve për mësim. Ka dy vite që këta nxënës mësojnë nëpër objekte private, duke pritur që objekti shkollor të meremetohet në tërësi. Drejtori i shkollës, Fatmir Mehmeti, e konfirmoi lajmin për rifillimin e mësimit, pasi ai ishte ndërprerë më 27 prill “Nxënësit do ta vazhdojnë mësimin nëpër objekte private të fshatit, përderisa të përfundojnë punimet në objektin shkollor”, tha Mehmeti.
Drejtori i Arsimit në Sharr, Xhemal Iljazi, tha se objekti do të jetë i gatshëm kur të filloj viti i ri shkollor “Me fillimin e vitit të ri shkollor, nxënësit do të kthehen në objektin e tyre, pasi atëherë do të përfundojnë të gjitha punimet në meremetimin e shkollës”, tha Iljazi.
Për dy vjet rresht, prindërit e nxënësve kanë kundërshtuar që fëmijët e tyre të mësojnë si dikur, nën masa të dhunshme, por ata kanë lëshuar pe, pasi kanë marrë siguri se viti i ri shkollor, kësaj radhe vërtetë do të filloj në objektin e rinovuar. /b. beqaj

Veteranët e UÇK-së kërkojnë emërtimet e institucioneve

2007-05-22T00:02:00.000-07:00

Sharr - Drejtuesit e Organizatës së Veteranëve të Luftës së UÇK-së në Sharr e akuzojnë pushtetin lokal se është duke bërë ndarje të dëshmorëve në baza partiake, sa i përket emërtimit të institucioneve publike. Lulzim Rifaj, sekretar i kësaj organizate, thotë se zyrtarët komunalë e kanë lënë në gjysmë punën e nisur para katër vjetësh. "Deri më tani është zëvendësuar vetëm emri i gjimnazit ‘Emin Duraku’ me atë të dëshmorit Ruzhdi Berisha, dhe kjo lë të kuptohet se veprimet nuk janë në harmoni me deklarimet publike", tha Rifaj. Sipas tij, drejtori i Drejtorisë së Arsimit, Xhemal Iljazi, me rastin e ndërrimit të emrit të Gjimnazit, ka deklaruar se do të angazhohet edhe për zyrtarizmin e emrave të institucioneve të tjera arsimore. Ai theksoi se edhe shefi i ekzekutivit, Bexhet Xheladini, me rastin e rivarrimit të dëshmorit Samidin Emini, ka premtuar se shkolla e Kukit do të emërtohet me emrin e këtij dëshmori. "Nga ajo kohë nuk është bërë ndonjë lëvizje, dhe kjo lë të kuptohet se këta zyrtarë po mundohen t'i ndajnë dëshmorët sipas përkatësive politike. Me emrin e dëshmorit, familja e të cilit është deklaruar pro LDK-së, emërtohen institucionet, ndërkaq të tjerët anashkalohen", tha Rifaj. Ai sqaroi se para disa ditësh, nëpërmjet një shkrese zyrtare, u janë drejtuar organeve komunale, për të kërkuar që kjo procedurë të përfundojë sa më parë. "U kemi parashtruar disa herë kërkesa pushtetarëve lokalë, por asnjëherë nuk kemi marrë përgjigje. Kërkesa e parë u është drejtuar në mars të vitit 2003, e dyta një muaj më vonë dhe e treta në prill të vitit 2004. Kjo është hera e katërt që u dërgojmë kërkesë, që punën e nisur vite me parë ta përfundojnë", tha Rifaj, duke shprehur habinë që personalitetet e pushtetit gjithnjë u thonë se i përkrahin propozimet e tyre, por në detyrat që ushtrojnë nuk punojnë për t'i jetësuar ato.
Në anën tjetër, Xhemal Iljazi, drejtor i Drejtorisë së Arsimit, tha se është deklaruar pro ndryshimeve dhe emërtimeve të institucioneve arsimore, por për një kohë të pacaktuar, nëpërmjet një vendimi, MASHT-i i ka pezulluar këto ndryshime. "Në vendimin e MASHT-it, i datës 28.2.2006, thuhet se në pajtim me Rregulloren e UNMIK-ut pezullohet përkohësisht emërtimi dhe riemërtimi i shkollave, ndalesë kjo që është në fuqi deri në caktimin e rregullave dhe të kritereve, në bazë të së cilave do të bëhet emërtimi dhe riemërtimi i shkollave nga grupi i ekspertëve". Ndërkaq, sa i përket konstatimit të veteranëve se nuk po trajtohen të gjithë dëshmorët njësoj, ai theksoi se mund të ketë mendime të ndryshme, por detyra e tij është t'i respektojë ligjet në fuqi.
Kryeshefi i ekzekutivit, Bexhet Xheladini, në lidhje me këto probleme tha se procedura e emërtimeve të shkollave është në relacionin Shkollë-Drejtori-Ministri dhe nuk ka të bëjë me ekzekutivin lokal. "Vetëm kur ta kenë ndjekur procedurën secila shkollë, pastaj t'ia ketë përcjellë Drejtorisë së Arsimit, e kjo e fundit ia përcjell MASHT-it, atëherë mund të fuqizohet ky propozim. Një procedurë të tillë e ka ndjekur vetëm shkolla e mesme, prandaj edhe emri i kësaj shkolle tashmë është ndryshuar", tha Xheladini. /b. beqaj